អូស្ត្រាលី ៖ តុលាការលុបលាងទោសឱ្យស្ត្រីជាប់ទោសសម្លាប់កូនឯង
ស្ត្រីជាតិអូស្ត្រាលីម្នាក់ បានឃុំឃាំងក្នុងពន្ធនាគាររយៈពេល២០ឆ្នាំហើយ ពីបទសម្លាប់កូនខ្លួនឯងបួននាក់។ ប៉ុន្តែនៅថ្ងៃចន្ទទី ៥មិថុនានេះ តុលាការអូស្ត្រាលី បានសម្រេចលុបលាងទោស និងដោះលែង ស្ត្រីរូបនេះឱ្យមានសេរីភាពវិញ ក្រោយពីការអង្កេតថ្មីរកឃើញមូលហេតុសង្ស័យនាំឱ្យក្មេងទាំងនោះស្លាប់។
ចុះផ្សាយនៅថ្ងៃ៖
ស្តាប់ - ០២:០៤
ជាប់ឈ្មោះជាឃាតករសេរីដ៏អាក្រក់បំផុតនៅអូស្ត្រាលី កូនទាំងបួនរបស់អ្នកស្រី Kathleen Folbigg អាចរស់បានត្រឹម៩អាទិត្យ និងយ៉ាងច្រើនដល់បីឆ្នាំ ប៉ុន្តែអ្នកស្រីជាម្តាយបានច្រានចោលរាល់ពាក្យចោទប្រកាន់របស់តុលាការ និងបានអះអាងថាកូនទាំងបួនបានស្លាប់ដោយឯងៗ។
ដោយគ្មានភស្តុតាងតាមបែបវេជ្ជសាស្ត្របញ្ជាក់ពីការស្លាប់ដោយឯងៗ រដ្ឋអាជ្ញាពេលនោះយល់ថាវាមិនទំនងទាល់តែសោះដែលក្មេងទាំងបួនត្រូវស្លាប់មួយរំពេចដោយគ្មានមូលហេតុដូច្នេះ ទើបតុលាការកាត់ទោសនៅឆ្នាំ២០០៣ ឱ្យជាប់ពន្ធនាគារពីបទសម្លាប់កូនឯង ដោយចេតនាបីនាក់ និងដោយអចេតនាម្នាក់។
ប៉ុន្តែចៅក្រមចូលនិវត្តន៍ Tom Bathurst បានដឹកនាំការអង្កេតថ្មី និងបានរកឃើញមូលហេតុបែបវិទ្យាសាស្ត្រមកពន្យល់អំពីករណីស្លាប់ដ៏ចម្លែកនេះ។ បើតាមលោកចៅក្រម កូនពីរនាក់ បានស្លាប់ដោយមានផ្ទុកហ្សែនបំប្លែងដ៏កម្រ ឯកូនទីបីស្លាប់ព្រោះមានជំងឺប្រព័ន្ធប្រសាទដែលទំនងបណ្តាលមកពីហ្សែនបំប្លែង។ ដោយសារកត្តាបីខាងលើ គេមិនអាចសង្ស័យលើករណីស្លាប់របស់កូនទីបួនទេ។ ភស្តុតាងបែបវេជ្ជសាស្ត្រថ្មីអាចបំភ្លឺបានថាការស្លាប់ដោយឥតមូលហេតុនៃក្មេងទាំងបួន ទំនងជាដោយមូលហេតុពាក់ព័ន្ធនឹងការបំប្លែងហ្សែនដ៏កម្រ ឬដោយមកពីភាពមិនប្រក្រតីពីកំណើត។
នៅឆ្នាំ២០២១ អ្នកវិទ្យាសាស្ត្រអូស្ត្រាលីនិងបរទេសជាច្រើននាក់បានធ្វើញត្តិទាមទារឱ្យដោះលែងអ្នកស្រីFolbigg ដោយផ្អែកលើភស្តុតាងថ្មីនេះ។ បន្ទាប់ពីបានអង្កេតពិនិត្យឡើងវិញឃើញថាមានហេតុផលសមរម្យជុំវិញមូលហេតុនៃការស្លាប់ ទើបតុលាការអូស្ត្រាលីបានសម្រេចនៅថ្ងៃចន្ទទី ៥មិថុនានេះ លើកលែងទោស និងផ្តល់សេរីភាពឱ្យអ្នកស្រីដែលពេលនេះមានអាយុ៥៥ឆ្នាំ។ រាជបណ្ឌិតវិទ្យាសាស្ត្រអូស្ត្រាលីដែលបានចូលរួមធ្វើអង្កេតដែរ បានប្រកាសអំណរនៅពេលឃើញអ្នកស្រីFolbiggបានទទួលយុត្តិធម៌៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ