ឡាវ៖ រលកបង្ក្រាប សម្លាប់ សំឡុត កំពុងបោកសង្គ្រប់ ទៅលើសកម្មជនទាមទារសិទ្ធិសេរីភាពនិងប្រជាធិបតេយ្យ
អ្នកខ្លះបានបាត់ខ្លួនយ៉ាងចម្លែក អ្នកខ្លះត្រូវគេបាញ់សម្លាប់។ ទាំងនេះ គឺជាវាសនារបស់សកម្មជនទាមទារសិទ្ធិសេរីភាព និងលទ្ធិប្រជាធិបតេយ្យឡាវ។ ករណីទាំងនេះ បានកើនឡើងយ៉ាងខ្លាំង មួយរយៈចុងក្រោយនេះ បន្ទាប់ពីលោកនាយករដ្ឋមន្ត្រីថ្មីឡាវចូលកាន់តំណែង និងស្របពេលដែលឡាវ ត្រៀមខ្លួនធ្វើជាប្រធានវិលជុំអាស៊ាន នៅឆ្នាំ២០២៤។ យោងតាមក្រុមអង្គការសិទ្ធិមនុស្ស រដ្ឋអំណាចកុម្មុយនីស្តឡាវ កំពុងតែព្យាយាមខ្ទប់សំឡេងប្រឆាំង រិះគន់ទាំងអស់ មិនថានៅក្នុងប្រទេសឡាវ ឬនៅក្រៅប្រទេស។
ចុះផ្សាយនៅថ្ងៃ៖
ស្តាប់ - ០៣:១៧
ជាប្រទេសក្រីក្រមួយ ហ៊ំព័ទ្ធដោយដងភ្នំ ព្រមទាំងបំណុលចិនដ៏ច្រើនសន្ធឹក រដ្ឋាភិបាលកុម្មុយនីស្តឡាវ បានក្តោបក្តាប់អំណាចយ៉ាងណែន ខណៈបណ្តាញព័ត៌មានឯករាជ្យលែងមានទាល់តែសោះ នៅក្នុងប្រទេសនេះ។ បណ្តាញសង្គម បានក្លាយជាបង្អួចចំហរ សម្រាប់សកម្មជនមួយចំនួនតូច ដែលមានសេចក្តីក្លាហាន ដើម្បីបញ្ចេញមតិ រិះគន់ និងទាមទារសិទ្ធិសេរីភាព។ តែមួយរយៈចុងក្រោយនេះ មានករណីឃាតកម្ម បាញ់សម្លាប់ ប៉ុនប៉ងសម្លាប់ និងបាត់ខ្លួន បានកើតទៅលើសកម្មជនឡាវ ដែលធ្វើសកម្មភាពបញ្ចេញមតិរិះគន់រដ្ឋាភិបាលក្រុងវៀងចន្ទ។
លោក Anousa Luangsuphom អាយុ២៥ឆ្នាំ ដែលគេស្គាល់តាមរយៈឈ្មោះហៅក្រៅថា Jack ត្រូវបានជនមិនស្គាល់មុខ បាញ់ជាច្រើនគ្រាប់ នៅក្នុងហាងកាហ្វេមួយក្នុងក្រុងវៀងចន្ទ កាលពីដើមខែឧសភា។ ដើម្បីការពារសុវត្ថិភាពទៅថ្ងៃមុខ ក្រុមគ្រួសារ លោក Anousa Luangsuphom ប្រកាសដោយកុហកថា លោកបានស្លាប់ហើយ។ បុរសអាយុ២៥ឆ្នាំរូបនេះ ត្រូវគេស្គាល់ថា គឺជាអ្នកសម្របសម្រួល ទំព័រហ្វេសបុកមួយដ៏មានប្រជាប្រិយភាពនៅឡាវ ដែលមានសមាជិកតែងតែងចូលមកបញ្ចេញមតិ និងចែករំលែកព័ត៌មាននាៗ រិះគន់ទៅលើរដ្ឋាភិបាល។ ផ្អែកតាមលោក Joseph Akaravong សកម្មជននិងជាមិត្តរបស់លោក Anousa គឺការប៉ុនប៉ងសំលាប់នេះ បានស្តែងឲ្យឃើញថា រដ្ឋអំណាចកុម្មុយនីស្តឡាវ ភ័យខ្លាចណាស់ចំពោះការបញ្ចេញមតិរិះគន់ និងការទាមទារសិទ្ធិសេរីភាពជាទូទៅ។
នៅខែឧសភាដែរ ថ្ងៃទី៩ សកម្មជនជនជាតិឡាវម្នាក់ទៀត ឈ្មោះ Savang Phaleuth ដែលបានភៀសខ្លួនទៅរស់នៅប្រទេសថៃ អស់រយៈពេល១៦ឆ្នាំ បានបាត់ដំណឹងឈឹងសូន្យ នៅពេលសកម្មជនរូបនេះ បានត្រលប់ទៅដល់ប្រទេសឡាវវិញ ហើយត្រូវឆ្លងកាត់ការិយាល័យនគរបាលព្រំដែន។ ហើយមួយសប្តាហ៍ក្រោយមក ជនជាតិឡាវម្នាក់ទៀតឈ្មោះ Bounsuan Kitiyano ត្រូវបានគេបាញ់សម្លាប់ចំនួន៣គ្រាប់ នៅក្នុងខេត្ត ឧប៊ុនរាចាថានី ប្រទេសថៃ។ បុរសជាតិឡាវទាំង២នេះ ត្រូវគេស្គាល់ថា ជាសមាជិកក្រុមចលនាប្រជាធិបតេយ្យ ឈ្មោះ Free-Lao ដែលធ្លាប់បានធ្វើសកម្មភាពមួយចំនួន ដូចជាធ្វើបាតុកម្មនៅខាងមុខស្ថានទូតឡាវ នៅទីក្រុងបាងកកជាដើម។
យ៉ាងណាមិញ ករណីបាត់ខ្លួនសកម្មជនបរិស្ថាន ឈ្មោះ Sambath Somphone កាលពីឆ្នាំ២០១២ ក្រោយការចាប់ឃាត់ខ្លួនពីសំណាក់នគរបាលឡាវ ក៏នៅមិនទាន់មានពន្លឺអ្វីដែរ។ លោក Andrea Giorgetta អ្នកទទួលបន្ទុកតំបន់អាស៊ី នៃសហព័ន្ធអន្តរជាតិដើម្បីសិទ្ធិមនុស្ស បានលើកឡើងថា រដ្ឋអំណាចឡាវ កំពុងបង្កើនការបង្ក្រាប បំបិទសំឡេងប្រឆាំងទាំងក្នុងប្រទេសឡាវ ទាំងនៅក្នុងប្រទេសថៃ ដែលមានសកម្មជនឡាវភៀសខ្លួនរស់នៅ។
ដូចគ្នាដែរ លោកស្រី Emilie Pradichit តំណាងអង្គការ Manushya Foundation បានលើកឡើងថា លោកនាយករដ្ឋមន្ត្រីថ្មីរបស់ឡាវ ឈ្មោះ Sonexay Siphandone ដែលទើបតែចូលកាន់តំណែងកាលពីខែធ្នូ ត្រូវគេជឿថា គឺជាអ្នកនៅពីក្រោយ ប្រតិបត្តិការបង្ក្រាប គំរាម សំឡុតទាំងអស់នេះ ដើម្បីបំបិទសំឡេង ដែលប្រឆាំងរិះគន់មកលើខ្លួន និងមកលើរដ្ឋាភិបាលកុម្មុយនីស្តឡាវ ខណៈដែលប្រទេសនេះ ត្រៀមខ្លួនលេចមុខលើឆាកអន្តរជាតិ ក្នុងនាមជាប្រធានវិលជុំអាស៊ាន នៅដើមឆ្នាំ២០២៤៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ