ថៃ៖ គណៈកម្មការជាតិរៀបចំការបោះឆ្នោត បើកការស៊ើបអង្កេតលើលោក ភិថា លឹមចារើនរ៉ាត់
ស្រមោលខ្មៅ ចាប់ផ្តើមគ្របពីលើទំព័រនយោបាយថៃ ប្រមាណជិតមួយខែក្រោយការបោះឆ្នោតសភា កាលពីខែឧសភា។ កាលពីថ្ងៃចន្ទ ទី១២មិថុនា គណៈកម្មការជាតិរៀបចំការបោះឆ្នោតថៃ បានប្រកាសអំពីការបើកការស៊ើបអង្កេត ទៅលើរូបលោក ភិថា លឹមចារើនរ៉ាត់ ប្រធានគណបក្សកាវក្លៃ ដែលបានទទួលសម្លេងឆ្នោតនាំមុខគេ។ គណៈកម្មការជាតិរៀបចំការបោះឆ្នោតថា សង្ស័យថាបេក្ខជននាយករដ្ឋមន្ត្រីរូបនេះ បានបំពាននឹងច្បាប់បោះឆ្នោត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៣
លោក Ittiporn Boonprakong ប្រធានគណៈកម្មការជាតិរៀបចំការបោះឆ្នោតថៃ បានឲ្យដឹងថា ការស៊ើបអង្កេតមួយ ត្រូវបានចាប់ផ្តើមបើកហើយ ទៅលើរូបលោក ភិថា លឹមចារើនរ៉ាត់ ប្រធានគណបក្សកាវក្លៃ។ ប្រធានគណៈកម្មការជាតិរៀបចំការបោះឆ្នោតថៃ បានបញ្ជាក់ថា មានធាតុផ្សំគ្រប់គ្រាន់ ដែលតម្រូវឲ្យគេត្រូវតែស៊ើបអង្កេតឲ្យបានស៊ីជម្រៅ ចង់ដឹងថា តើលោក ភិថា លឹមចារើនរ៉ាត់ បានបំពាននឹងច្បាប់បោះឆ្នោតដែរឬទេ។
មន្ត្រីថៃខាងលើ បានបញ្ជាក់ថា គេបានបង្កើតគណៈកម្មាធិការពិសេសមួយ ដើម្បីស្រាវជ្រាវ ទាក់ទិននឹងករណីសង្ស័យថា លោក ភិថា លឹមចារើនរ៉ាត់ មានភាគហ៊ុននៅក្នុងបណ្តាញទូរទស្សន៍មួយ។ ច្បាប់បោះឆ្នោតថៃ បានហាមឃាត់យ៉ាងច្បាស់ ថាបេក្ខជនឈរឈ្មោះទាំងអស់ មិនអាចមានចំណែកភាគហ៊ុន នៅក្នុងបណ្តាញផ្សព្វផ្សាយព័ត៌មានគ្រប់ទម្រង់ មិនថាកាសែត វិទ្យុ និងទូរទស្សន៍ ជាដើម។
សូមបញ្ជាក់ថា ប្រសិនបើ គេរកឃើញថា លោកភិថា លឹមចារើនរ៉ាត់ ប្រធានគណបក្សកាវក្លៃ ពិតជាបានបំបាននឹងច្បាប់បោះឆ្នោតមែន គឺលោកនឹងត្រូវគេលុបឈ្មោះពីបញ្ជីបេក្ខជនឈរឈ្មោះជានាយករដ្ឋមន្ត្រី។ លោកភិថា លឹមចារើនរ៉ាត់ ក៏អាចប្រឈមនឹងទោសជាប់ពន្ធនាគារ ពី១ឆ្នាំ ទៅ១០ឆ្នាំ និងត្រូវគេដកហូតសិទ្ធិបោះឆ្នោតរយៈពេល២០ឆ្នាំ។
ដោយឡែក លោកភិថា លឹមចារើនរ៉ាត់ ធ្លាប់បានពន្យល់ថា ជាការពិត លោកមានភាគហ៊ុននៅក្នុងបណ្តាញ ទូរទស្សន៍ iTV ដែលឪពុករបស់លោកបានផ្ទេរមកឲ្យ។ ក៏ប៉ុន្តែ បណ្តាញទូរទស្សន៍នេះ បានបិទបញ្ឈប់ការផ្សាយ តាំងតែពីឆ្នាំ២០០៧មកម្លេះ។ លោក ភិថា លឹមចារើនរ៉ាត់ បានអះអាងថា ការចោទប្រកាន់ពីគណៈកម្មការជាតិរៀបចំការបោះឆ្នោត ថាលោកបានលាក់បាំងរឿងនេះ គឺជាការចោទក្នុងហេតុផលនយោបាយសុទ្ធសាធ។
គួររំលឹកថា គណបក្សកាវក្លៃរបស់លោក ភិថា លឹមចារើនរ៉ាត់ បានទទួលបានសំឡេងឆ្នោតនាំមុខ ក្នុងការបោះឆ្នោតសភា កាលពីខែឧសភា។ បក្សនេះបានប្រកាសចងសម្ព័ន្ធភាពជាមួយគណបក្សភឿថៃ ដឹកនាំដោយកូនស្រីលោកថាក់ស៊ីន ដើម្បីបង្កើតរដ្ឋាភិបាលចម្រុះ។ តែយ៉ាងណា មិនទាន់ច្បាស់ប្រាកដថាលោក ភិថា លឹមចារើនរ៉ាត់ នឹងអាចក្លាយជានាយកមន្ត្រីបាននោះឡើយ ព្រោះសមាជិកព្រឹទ្ធសភាថៃដែលត្រូវបានបានតែងតាំងដោយក្រុមយោធាថៃ បានប្រកាសគោលជំហរហើយ ថាគេនឹងបោះឆ្នោតប្រឆាំងនឹងបេក្ខភាពរបស់លោក ភិថា លឹមចារើនរ៉ាត់។ ម្យ៉ាងវិញទៀត អ្នកវិភាគបារម្ភថា ក្រុមយោធាថៃដែលស្និទ្ធនឹងលោកប្រាយុទ្ធ ចាន់អូចា អាចនឹងប្រើប្រាស់ប្រព័ន្ធតុលាការ ដើម្បីប្រកាសរំលាយគណបក្សកាវក្លៃ ដូចកាលពីករណីគណបក្ស អាណាឃុតម៉ៃ ដឹកនាំដោយលោក ថាណាថន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ