អាស៊ានប្តូរទីតាំងធ្វើសមយុទ្ធយោធារួម ដោយមិនធ្វើនៅក្នុងតំបន់ជម្លោះសមុទ្រចិន
នៅថ្ងៃអង្គារ៍ អាជ្ញាធរយោធាឥណ្ឌូណេស៊ី ប្រកាសឲ្យដឹងថា សមាគមប្រជាជាតិអាស៊ីអាគ្នេយ៍ ហៅកាត់ អាស៊ាន យល់ព្រមប្តូរទីតាំងធ្វើសមយុទ្ធយោធារួមគ្នា ដោយមិនធ្វើនៅក្នុងតំបន់ជម្លោះសមុទ្រចិន ដូចការប្រកាសពីសប្តាហ៍មុនទេ។ ក្នុងន័យនេះ គឺថា សមយុទ្ធយោធារួមគ្នា របស់អាស៊ាន គឺនៅតែរក្សាបន្តធ្វើ នៅក្នុងខែកញ្ញាខាងមុខដដែល ប៉ុន្តែ នឹងត្រូវធ្វើ«នៅឆ្ងាយ»ពីតំបន់មានជម្លោះប្រទាញប្រទង់គ្នាជាមួយចិន។ នេះក៏ព្រោះតែមានការជំទាស់ពី«ប្រទេសសមាជិកអាស៊ានដែលស្និទ្ធជាមួយចិន»។
ចុះផ្សាយនៅថ្ងៃ៖
ស្តាប់ - ០២:៤១
ការធ្វើសមយុទ្ធយោធារួមគ្នា លើកទី១ របស់អាស៊ាន ទាំង១០ប្រទេស និងទីម័រខាងកើត នឹងរៀបចំធ្វើ ចន្លោះថ្ងៃទី១៨ ទៅថ្ងៃ២៥ កញ្ញាខាងមុខនេះ ប៉ុន្តែ ត្រូវបញ្ជៀសចេញពីតំបន់កន្លែងដែលកំពុងមានជម្លោះប្រទាញប្រទង់ប្រទេសជាមួយចិន ក្នុងសំណុំបញ្ហាសមុទ្រចិនខាងត្បូង។ នេះបើតាមខ្លឹមសារ ក្នុងសេចក្តីប្រកាសព័ត៌មានថ្មី នៅថ្ងៃអង្គារ ដែល ទីភ្នាក់ងារព័ត៌មានបារាំង AFP ទទួលបានពីអាជ្ញាធរយោធាឥណ្ឌូណេស៊ី។
សូមរំលឹកថា ប្រមាណ១០ថ្ងៃមុន អាជ្ញាធរយោធាឥណ្ឌូណេស៊ី ក្នុងនាមជាប្រធានផ្លាស់វេនអាស៊ាន បានប្រកាសថា សមយុទ្ធយោធារួមគ្នា នឹងត្រូវធ្វើនៅសមុទ្រ Natunaប៉ែកខាងជើង។ ត្រង់កន្លែងនេះ មហាយក្សចិន បានទាមទារថាជាដែនអធិបតេយ្យភាពរបស់ខ្លួន ហើយឥណ្ឌូណេស៊ី ក៏ទារថាជារបស់ខ្លួនដែរ។ បើតាមភាគីឥណ្ឌូណេស៊ី ក្នុងព័ត៌មានជាង១០ថ្ងៃមុន គឺ ការប្រកាសធ្វើសមយុទ្ធពេលនេះ មានរដ្ឋសមាជិកខ្លះយល់ព្រម ខ្លះទៀតរក្សាភាពស្ងៀមស្ងាត់។ ក៏ប៉ុន្តែ ភាគីកម្ពុជា ដែលមជ្ឈដ្ឋានអន្តរជាតិ មើលឃើញថាស្និទ្ធជាមួយចិនខ្លាំង តាមរយៈ អគ្គបញ្ជាការនៃកងយោធពលខេមរភូមិន្ទ បានចេញសេចក្តីប្រកាសព័ត៌មានមួយ ដែរ នៅថ្ងៃទី៨មិថុនា ថា កិច្ចប្រជុំអគ្គមេបញ្ជាការកងទ័ពអាស៊ានលើកទី២០ មិនទាន់សម្រេចលើគម្រោងសមយុទ្ធរួមគ្នានៅសមុទ្រចិនខាងត្បូង នោះទេ និងថា អគ្គមេបញ្ជាការនៃប្រទេសជាច្រើនទៀត ក៏មិនបានឆ្លើយតបទេ។
គួរបញ្ជាក់ដែរថា តំបន់ប្រជុំកោះ Natuna ដែលឥណ្ឌូណេស៊ី ចង់ឲ្យធ្វើសមយុទ្ធអាស៊ានរួមគ្នានៅទីនោះ គឺនៅប៉ែកខាងជើង ត្រូវ នាវាកងទ័ព ចិន តែងតែចូលទៅរុកកួនជារឿយៗ។ មិនមែនតែ ឥណ្ឌូណេស៊ី ទេ ដែលមានបញ្ហានឹងចិន គឺប្រទេសសមាជិកអាស៊ាន តួយ៉ាង ម៉ាឡេស៊ី វៀតណាម និងហ្វ៊ីលីពីន សុទ្ធតែមានវិវាទដែនសមុទ្រជាមួយមហាយក្ស ចិន នៅក្នុងសំណុំបញ្ហាតំបន់សមុទ្រចិនខាងត្បូង។ ទោះយ៉ាងនេះក្តី រដ្ឋសមាជិកអាស៊ាន បែងចែកបក្សពួករៀងខ្លួន ដើម្បីផលប្រយោជន៍រៀងខ្លួន។ ប្រទេសខ្លះ បានធ្វើសមយុទ្ធរួមគ្នាជាមួយសហរដ្ឋអាមេរិក រីឯប្រទេសខ្លះទៀតបានធ្វើសមយុទ្ធជាមួយកងទ័ពប្រជាជនចិន។
ដោយឡែក ការធ្វើសមយុទ្ធយោធាអាស៊ាន រួមនិងទីម័រខាងកើត នៅខែកញ្ញាខាងមុខ គឺត្រូវ អគ្គមេបញ្ជាការកងទ័ពជើងទឹកឥណ្ឌូណេស៊ី Yudo Margono បញ្ជាក់ប្រាប់ពួកអ្នកកាសែត ថា សមយុទ្ធនេះផ្តោតលើសុវត្ថិភាព សមយាមល្បាតការពារសន្តិសុខក្នុងសមុទ្រ និងហាត់សមជួយសង្គ្រោះតាមផ្លូវសមុទ្រ តែពុំមែនជាសមយុទ្ធប្រយុទ្ធចម្បាំងបាញ់បោះច្បាំងគ្នាទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ