វៀតណាម៖នាវាដឹកយន្តហោះចម្បាំងអាមេរិក « USS Ronald Reagan » ចូលចតនៅកំពង់ផែក្រុងដាណាង
នៅថ្ងៃអាទិត្យ ទី២៥ មិថុនា នាវាដឹកយន្តហោះចម្បាំងអាមេរិក « USS Ronald Reagan » ដែលមានកងម៉ារីនជាង ៥ ០០០នាក់ និងអមដំណើរដោយនាវាពីរគ្រឿងទៀតឈ្មោះ USS Antietam និង USS Robert Smalls បានចូលចតនៅកំពង់ផែក្រុងដាណាង ប្រទេសវៀតណាម។ ការឈប់សំចតរបស់នាវា « USS Ronald Reagan » ជានិមិត្តរូបដែលមានគោលដៅចូលរួមអបអរសាទរទំនាក់ទំនងរវាងវៀតណាម និងអាមេរិកដែលជាអតីតគូសត្រូវ។ កំណត់សម្គាល់មិនអាចខ្វះបានមួយទៀត គឺការរឹតចំណងទាក់ទងរវាងប្រទេសទាំងពីរប្រឈមនឹងកំណើនឥទ្ធិពលរបស់ចិននៅក្នុងសមុទ្រចិនខាងត្បូង។
ចុះផ្សាយនៅថ្ងៃ៖
ស្តាប់ - ០២:២៤
ជាវត្តមានដ៏កម្រ តែមិនចៃដន្យ។ កម្រ និងមិនចៃដន្យ ព្រោះការឈប់សំចតរបស់នាវាអាមេរិក « USS Ronald Reagan » ជាមួយនឹងកងម៉ារីនជាង ៥ ០០០នាក់នៅកំពង់ផែក្រុងដាណាងពេលនេះបានធ្វើឡើង ចំពេលដែលវៀតណាម និងអាមេរិកប្រារព្ធខួប ១០ឆ្នាំនៃដៃគូយុទ្ធសាស្រ្តរវាងគ្នា។ សម្រាប់ក្រុងហាណូយ និងក្រុងវ៉ាស៊ីនតោន ដៃគូយុទ្ធសាស្រ្តនេះនឹងកាន់តែរឹងមាំជាងពេលណាទាំងអស់នាពេលសព្វថ្ងៃ ខណៈដែលចិនបាន និងកំពុងបន្តពង្រីកឥទ្ធិពលរបស់ខ្លួននៅក្នុងសមុទ្រចិនខាងត្បូង។ ជាក់ស្តែងថ្មីៗនេះ នាវាចិនមួយគ្រឿង នាវាឆ្មាំសមុទ្រចិន រួមទាំងទូកនេសាទចិនច្រើនគ្រឿងបានបើកចូលក្នុងតំបន់សេដ្ឋកិច្ចពិសេសវៀតណាមស្ថិតក្នុងសមុទ្រចិនខាងត្បូងរយៈពេលច្រើនសប្តាហ៍។ តែក្រោយពីមានការប្រឆាំងតវ៉ាពីរដ្ឋាភិបាលវៀតណាមមកទើបនាវា និងទូកនេសាទចិនទាំងអស់នោះបានចាកចេញវិញនៅដើមខែមិថុនានេះ។
លោក Nguyen The Phuong បណ្ឌិតផ្នែកសន្តិសុខដែនសមុទ្រនៅសាកលវិទ្យាល័យអូស្រា្តលីបានពន្យល់ប្រាប់ AFP ថា វត្តមាននាវាអាមេរិក « USS Ronald Reagan » ជាសក្ខីកម្មបង្ហាញថា វៀតណាមបន្តទប់ទល់នឹងឥទ្ធិពលរបស់ចិនដោយធ្វើឲ្យប្រសើរឡើងនូវទំនាក់ទំនងសន្តិសុខជាមួយអាមេរិក និងមហាអំណាចបរទេសផ្សេងទៀត។ ក្រៅពីទទួលនាវាអាមេរិក « USS Ronald Reagan » វៀតណាមក៏ធ្លាប់បានទទួលនាវាកងម៉ារីនឥណ្ឌានៅកំពង់ផែដាណាងដែរកាលពីខែឧសភា។ មួយវិញទៀតនាដើមសប្តាហ៍នេះ វៀតណាមបានទទួលនាវាសង្រ្គាមរបស់ជប៉ុនដ៏ធំ។
លោក Pham Thu Hang អ្នកនាំពាក្យក្រសួងការបរទេសវៀតណាមបានថ្លែងថា ការទទួលនាវាបរទេសទាំងអស់នេះជាការដោះដូរធម្មតាដើម្បីសន្តិភាព ស្ថិរភាព កិច្ចសហប្រតិបត្តិការ និងការអភិវឌ្ឍន៍នៅក្នុងតំបន់ និងនៅក្នុងពិភពលោកទាំងមូល។ អ្វីជាការកត់សម្គាល់ វត្តមាននាវាអាមេរិក « USS Ronald Reagan » នៅវៀតណាមបានធ្វើឡើង ២ខែក្រោយទស្សនកិច្ចរបស់ប្រមុខការទូតអាមេរិកលោកអង់តូនី ប៊្លីនកិននៅវៀតណាម។ គួរបញ្ជាក់ថា « USS Ronald Reagan » ជានាវាដឹកយន្តហោះចម្បាំងអាមេរិកទី៣ ដែលបានឈប់សំចតនៅវៀតណាម។ តាមគម្រោង « USS Ronald Reagan » នឹងស្ថិតនៅវៀតណាមរហូតដល់ថ្ងៃទី៣០ មិថុនា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ