ការសិក្សា៖ចំនួនអ្នកធ្វើអត្តឃាតនៅសិង្ហបុរីបានកើនខ្លាំងមិនធ្លាប់មានគិតតាំងពី ២២ឆ្នាំ
នៅក្នុងប្រទេសសិង្ហបុរី អង្គការក្រៅរដ្ឋាភិបាលក្នុងស្រុកហៅកាត់ SOS បានទាញសញ្ញាអាសន្នស្តីពីចំនួនអ្នកធ្វើអត្តឃាត។ SOS បានបញ្ជាក់នៅក្នុងសេចក្តីប្រកាសព័ត៌មានប្រចាំឆ្នាំរបស់ខ្លួនថា ចំនួនអ្នកធ្វើអត្តឃាតបានកើនជិត ២៦% ក្នុងឆ្នាំ ២០២២ កន្លងទៅ។ នេះជាកំណើនខ្ពស់ខ្លាំងមិនធ្លាប់មានគិតតាំងពី ២២ឆ្នាំកន្លងទៅ។ តាម SOS យុវជនមានអាយុចន្លោះពី ១០ឆ្នាំ ទៅ ២៩ឆ្នាំ និងមនុស្សចាស់មានអាយុពី ៧០ឆ្នាំទៅ ៧៩ឆ្នាំជាក្រុមមនុស្សដែលបានធ្វើអត្តឃាតច្រើនជាងគេ។
ចុះផ្សាយនៅថ្ងៃ៖
ស្តាប់ - ០២:១៩
៤៧៦នាក់ នេះជាចំនួនអ្នកធ្វើអត្តឃាតនៅសិង្ហបុរីក្នុងឆ្នាំ ២០២២ ពោលច្រើនជាងក្នុងឆ្នាំ ២០២១ ដែលមានចំនួន ៣៧៨នាក់។ តែបើគិតតាំងពីឆ្នាំ ២០០០ ចំនួនអ្នកធ្វើអត្តឃាតក្នុងឆ្នាំ ២០២២ មានច្រើនខ្លាំងមិនធ្លាប់មាន។ កំណើនអ្នកធ្វើអត្តឃាតមិនធ្លាប់មាននៅសិង្ហបុរីនេះជារឿងគួរឲ្យខ្លោចចិត្តខ្លាំងណាស់ នេះជាការថ្លែងរបស់គ្រូពេទ្យវិកលវិទ្យា និងអ្នកពិគ្រោះយោបល់សុខភាពលោក Jared Ng។ តាមលោក Jared Ng ការកើនឡើងអ្នកធ្វើអត្តឃាតនេះជាការបង្ហាញពីទុក្ខសោកផ្លូវចិត្តមើលមិនឃើញដែលកំពុងមាននៅក្នុងសង្គមសិង្ហបុរី ពិសេសក្រុមយុវជន និងក្រុមមនុស្សចាស់។
ដូច្នេះសម្រាប់គ្រូពេទ្យវិកលវិទ្យា និងអ្នកពិគ្រោះយោបល់សុខភាពលោក Jared Ng វាជារឿងសំខាន់ដែលគេត្រូវរក្សាការប្រុងប្រយ័ត្នចំពោះបញ្ហាបន្ទាន់ដែលកំពុងបន្តមានផលប៉ះពាល់ខ្លាំងដល់សុខភាពផ្លូវចិត្ត ដូចជាភាពឯកា និងភាពនៅឆ្ងាយពីសង្គម។ នៅក្នុងសេចក្តីប្រកាសព័ត៌មានប្រចាំឆ្នាំរបស់អង្គការក្រៅរដ្ឋាភិបាលក្នុងស្រុកហៅកាត់ SOS ការធ្វើអត្តឃាតជាបុព្វហេតុចម្បងនៃការស្លាប់យុវជនដែលមានអាយុពី ១០ឆ្នាំទៅ ២៩ឆ្នាំនៅសិង្ហបុរីនារយៈពេល ៤ឆ្នាំជាប់គ្នា។ ក្នុងឆ្នាំ ២០២២ មានអ្នកបញ្ចប់ជីវិតខ្លួនឯងចំនួន ១២៥នាក់មានអាយុចន្លោះពី ១០ឆ្នាំទៅ ២៩ឆ្នាំ និង ៤៨នាក់មានអាយុចន្លោះពី ៧០ឆ្នាំទៅ ៧៩ឆ្នាំ។
អ្វីជាការកត់សម្គាល់ កំណើនចំនួនអ្នកធ្វើអត្តឃាតនៅសិង្ហបុរីបានកើតមានឡើង ក្នុងពេលដែលប្រទេសអាស៊ីអាគ្នេយ៍មួយនេះកំពុងស្គាល់អត្រាកំណើតទាបខ្លាំងមួយក្នុងលោក និងអត្រាកំណើនមនុស្សចាស់ឆាប់រហ័ស។ ពលរដ្ឋសិង្ហបុរីម្នាក់ក្នុងចំណោម ៤នាក់នឹងមានអាយុ ៦៥ឆ្នាំ ឬច្រើនជាងនេះនៅឆ្នាំ ២០៣០។ ប្រធានអង្គការ SOS បានថ្លែងថា SOS សន្យាបន្តចាត់វិធានការប្រឆាំងទប់នឹងកំណើនអ្នកសម្លាប់ខ្លួន និងផ្តល់ការគាំទ្រចំពោះអ្នកដែលត្រូវការជំនួយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ