សិង្ហបុរី៖ នាយករដ្ឋមន្ត្រី បញ្ជារដ្ឋមន្ត្រីដឹកជញ្ជូន«ឈប់សម្រាក» ក្រោយពាក់ព័ន្ធអំពើពុករលួយ
នាថ្ងៃពុធ ទី១២កក្កដា នាយករដ្ឋមន្ត្រីសិង្ហបុរី បានចេញបញ្ជាឲ្យ រដ្ឋមន្ត្រីដឹកជញ្ជូន «ឈប់សម្រាក»។ នេះគឺបន្ទាប់ពី លោករដ្ឋមន្ត្រីក្រសួងដឹកជញ្ចូន បានជាប់ពាក់ព័ន្ធនឹងសំណុំរឿងពុករលួយ ដែលគណៈកម្មាធិការប្រឆាំងអំពើពុករលួយ បានបើកសំណុំរឿងស៊ើបអង្កេត។ លោក លី សៀនឡុង ប្រមុខរដ្ឋាភិបាលសិង្ហបុរី សរសេរនៅក្នុងបណ្តាញសង្គមផ្ទាល់ខ្លួនថា «ខ្ញុំបានស្នើទៅកាន់លោក S. Iwaran រដ្ឋមន្ត្រីក្រសួងដឹកជញ្ចូន សូមឈប់សម្រាក រហូតដល់ ការស៊ើបអង្កេត ត្រូវចប់សព្វគ្រប់»។
ចុះផ្សាយនៅថ្ងៃ៖
ការថ្លែងលើកឡើងយ៉ាងដូច្នេះ គឺក្រោយពីពេលដែល ថ្នាក់ដឹកនាំកំពូលសិង្ហបុរី ត្រូវ ការិយាល័យប្រឆាំងអំពើពុករលួយ ជូនដំណឹងទៅថា រដ្ឋមន្ត្រីដឹកជញ្ជូនពាក់ព័ន្ធនឹងការស៊ើបអង្កេតមួយ អំពីអំពើពុករលួយ ហើយនិងស្នើសុំលោកនាយករដ្ឋមន្ត្រីដើម្បីអនុញ្ញាតឲ្យសាកសួរចម្លើយលោករដ្ឋមន្ត្រី។
សេចក្តីថ្លែងការណ៍របស់ អង្គភាពប្រឆាំងអំពើពុករលួយសិង្ហបុរី គឺបានប្រកាសអំពីការស៊ើបអង្កេតស៊ីជម្រៅនៅក្នុងសំណុំរឿងមួយនេះ ដើម្បីតម្កល់ផលប្រយោជន៍សាធារណៈ ហើយការសាកសួររដ្ឋមន្ត្រីរូបនេះក៏នៅក្នុងហេតុផលដើម្បីឲ្យយល់កាន់តែច្បាស់អំពីអង្គហេតុនិងពីការពិត ហើយក៏ដើម្បីគោរពគោលការណ៍នីតិរដ្ឋដែរ។
បើតាមប្រភពដដែល សិង្ហបុរីមិនលើកលែងទាល់តែសោះចំពោះអំពើពុករលួយ។ អង្គភាពប្រឆាំងអំពើពុករលួយសិង្ហបុរី ស៊ើបអង្កេតដោយគ្មានភាពភ័យខ្លាច គ្មានទំនាស់ផលប្រយោជន៍ ហើយគ្មានញញើតនឹងចាត់វិធានការច្បាប់ចំពោះបុគ្គលឬភាគីណាដែលពាក់ព័ន្ធនឹងសកម្មភាពពុករលួយ។
សិង្ហបុរី ជាកូនប្រទេស តែជាមជ្ឈមណ្ឌលហិរញ្ញវត្ថុដ៏ធំសម្បើមនៅក្នុងតំបន់អាស៊ី ហើយនិងជាប់ឈ្មោះជាប្រទេសមានកម្រិតអំពើពុករលួយតិចតួច។ មន្ត្រីរដ្ឋការសិង្ហបុរី ទទួលបានប្រាក់ខែច្រើនជាង អ្នកធ្វើការវិស័យឯកជន។ នេះក៏ជាគោលការណ៍១ដើម្បីលើកទឹកចិត្ត កុំឲ្យមន្ត្រីរដ្ឋការ ប្រព្រឹត្តអំពើពុករលួយ។
បើផ្អែកតាមមន្ទីរមុខងារសាធារណៈសិង្ហបុរី មុខតំណែងនាយករដ្ឋមន្ត្រីសិង្ហបុរី ត្រូវទទួលប្រាក់បៀវត្សរ៍ប្រចាំឆ្នាំ ចំនួន ២,២ លានដុល្លារសិង្ហបុរី រួមនឹងអត្ថប្រយោជន៍ផ្សេងទៀត។ ប្រសិនបើប្រៀបធៀបទៅ គឺច្រើនជាង ៤ដងនៃប្រាក់ខែប្រធានាធិបតីអាមេរិក។ ចំណែក តំណែងរដ្ឋមន្ត្រី គឺទទួលប្រាក់បៀវត្សរ៍ ៩៥០ ០០០ ដុល្លារសិង្ហបុរី ក្នុង១ឆ្នាំ រួមនឹងអត្ថប្រយោជន៍ផ្សេងៗ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ