នូវែលសេឡង់អំពាវនាវឱ្យប៉េកាំងកាត់បន្ថយភាពតានតឹងនៅតំបន់ប៉ាស៊ីហ្វិក
នៅថ្ងៃចន្ទនេះ នាឱកាសបើកជំនួបកំពូលChina Business Summit នាយករដ្ឋមន្ត្រីនូវែលសេឡង់ លោក Chris Hipkins បានជំរុញឱ្យចិនកាត់បន្ថយភាពតានតឹងនៅតំបន់ប៉ាស៊ីហ្វិក ដែលបានក្លាយជាតំបន់ដ៏ប្រទាញប្រទង់ និងពិបាកព្យាករ។ លោកប្រមុខរដ្ឋាភិបាលចង់ឃើញចិនជួយរក្សាការពារចរាចរណ៍ពាណិជ្ជកម្មនៅប៉ាស៊ីហ្វិកដែលជាផ្លូវដង្ហើមសេដ្ឋកិច្ចរបស់ពិភពលោក និងពិសេសរបស់នូវែលហ្សេឡង់ផ្ទាល់តែម្តង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៣
របៀបពង្រីកឥទ្ធិពលរបស់ចិន នៅលើពិភពលោក តាមរយៈការពន្លាតវត្តមានការទូត សេដ្ឋកិច្ច និងយោធា យ៉ាងលឿនរហ័សនៅតំបន់ប៉ាស៊ីហ្វិក គឺក្បាលម៉ាស៊ីនដ៏ចម្បងនាំឱ្យមានភាពតានតឹងនិងប្រកួតប្រជែងយុទ្ធសាស្ត្រក្នុងតំបន់អាស៊ីប៉ាស៊ីហ្វិក។ នេះជាប្រសាសន៍របស់លោកនាយករដ្ឋមន្ត្រីនូវែលសេឡង់នៅក្នុងជំនួបChina Business Summit ដែលកំពុងរៀបចំធ្វើនៅក្រុងអូក្លង់ ដោយអះអាងទៀតថា ពេលនេះ តំបន់អាស៊ីប៉ាស៊ីហ្វិកយើង កាន់តែប្រទាញប្រទង់ខ្លាំង កាន់តែពិបាកស្មានឡើងៗ និងកាន់តែលែងប្រាកដរឿងសន្តិសុខ។
លោកនាយករដ្ឋមន្ត្រីព្រួយបារម្ភនឹងស្ថានភាពដុនដាបក្នុងតំបន់ដោយហេតុតែបរិបទយុទ្ធសាស្ត្រនិងភាពតានតឹងកើនឡើងនៅតំបន់ឥណ្ឌូប៉ាស៊ីហ្វិក ជាពិសេសជុំវិញតំបន់សមុទ្ទចិនខាងត្បូងនិងច្រកតៃវ៉ាន់។ លោកបានទាមទារឱ្យចិនប្រឹងប្រែងធ្វើយ៉ាងណាការពារចរាចរណ៍ផ្លូវទឹកនិងផ្លូវអាកាសដែលជាអាយុជីវិតរបស់នូវែលហ្សេឡង់ ប្រព្រឹត្តទៅបានដោយសេរី ព្រោះជិតពាក់កណ្តាលនៃការផ្តោះប្តូរពាណិជ្ជកម្មរបស់នូវែលសេឡង់ ត្រូវឆ្លងកាត់តាមសមុទ្ទចិនខាងត្បូង។ ជាតំបន់ដែលផ្តល់ផលប្រយោជន៍ផ្ទាល់ដល់នូវែលសេឡង់ និងដែលចាំបាច់ត្រូវគ្រប់គ្រងភាពតានតឹងដោយប្រុងប្រយ័ត្នបំផុត ដើម្បីជាប្រយោជន៍តំបន់ប៉ាស៊ីហ្វិកជាទូទៅ។ នេះជាប្រសាសន៍បន្ថែមរបស់លោកនាយករដ្ឋមន្ត្រីដែលជំរុញចិនឱ្យដើរតួនាទីបន្ធូរភាពតានតឹងនេះ។
តាំងពីប៉ុន្មានឆ្នាំចុងក្រោយមកនេះ ចិនបានបង្កើនសម្ពាធយោធានិងការទូតលើតៃវ៉ាន់ដោយគំរាមប្រើកម្លាំងក្រសោបយកកោះតៃវ៉ាន់វិញផងបើចាំបាច់ និងបានវាតទីទាមទារគ្រប់គ្រងតំបន់សមុទ្ទចិនខាងត្បូងកាន់តែធំឡើងៗ ហើយពង្រីកឥទ្ធិពលនៅតំបន់ប៉ាស៊ីហ្វិកខាងត្បូង តាមរយៈការចុះកិច្ចព្រមព្រៀងសន្តិសុខជាមួយបណ្តាប្រទេសកូនកោះ មានជាអាទិ៍កោះសាឡូម៉ុង។
បើតាមសម្ព័ន្ធមិត្តលោកខាងលិច នូវែលសេឡង់ផ្ទាល់ក៏រំពឹងខ្លាំងជ្រុលលើពាណិជ្ជកម្មជាមួយចិនដែរ។ នាយករដ្ឋមន្ត្រីធ្លាប់បានដឹកនាំប្រតិភូពាណិជ្ជកម្មទៅជួបប្រធានាធិបតីចិនស៊ីជីនពីង នៅទីក្រុងប៉េកាំងផងកាលពីខែមុន។ តែលោកHipkins បានប្រកាសថាការនាំចេញនូវែលសេឡង់មានលក្ខខណ្ឌពាណិជ្ជកម្មប្រសើរក្នុងទីផ្សារសំខាន់ៗផ្សេងទៀតដូចជាកិច្ចព្រមព្រៀងដោះដូរសេរីជាមួយអង់គ្លេស សហភាពអឺរ៉ុប និងប្លុកពាណិជ្ជកម្មអន្តរប៉ាស៊ីហ្វិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ