ប្រធានសភាថៃលើកពេល បោះឆ្នោតជ្រើសរើសនាយករដ្ឋមន្រ្តីថៃថ្មី ដោយគ្មានកាលកំណត់
ថៃទំនងមិនអាចរកឃើញច្រកចេញសម្រាប់ការជាប់គាំងនយោបាយ។ បន្ទាប់ពីបេក្ខជននាយករដ្ឋមន្រ្តី លោក ភិថា លីមចៈរើនរ៉ាត់មកពីគណបក្សកាវក្លៃ បរាជ័យពីរលើក នៅក្នុងការបោះឆ្នោតសភា កាលពីថ្ងៃទី ១៣ និងថ្ងៃទី ១៩កក្កដា កន្លងទៅ ការបោះឆ្នោតជាលើកទី៣ នៅសភាថៃ ដើម្បី ជ្រើសរើសនាយករដ្ឋមន្រ្តីថៃថ្មី ដែលគ្រោងធ្វើនៅថ្ងៃព្រហស្បតិ៍ ត្រូវលើកពេលដោយគ្មានកាលកំណត់។ នេះបើតាមការប្រកាសរបស់ប្រធានសភាថៃ លោក លោកវ៉ាន់ មូហាម៉ាត់ ណរម៉ៈថា កាលពីថ្ងៃអង្គារទី២៥កក្កដា។
ចុះផ្សាយនៅថ្ងៃ៖
នៅពេលបិទអង្គប្រជុំសភា កាលពីថ្ងៃទី ១៩កក្កដា ដោយមិនអាចឈានដល់ការបោះឆ្នោតជ្រើសរើសលោក ភិថា លីមចៈរើនរ៉ាត់ជានាយករដ្ឋមន្រ្តីថៃថ្មី ប្រធានសភាថៃ លោក វ៉ាន់ មូហាម៉ាត់ ណរ ម៉ៈថាធា្លប់បានប្រកាសយកថ្ងៃទី ២៧កក្កដា ថ្ងៃ ព្រហស្បតិ៍ស្អែក ជាថ្ងៃបោះឆ្នោតជ្រើសរើសនាយករដ្ឋមន្រ្តីសាជាថ្មី។
ប៉ុន្តែ នៅតែ២ថ្ងៃមុនការបោះឆ្នោតជាលើកទី៣ លោកវ៉ាន់ មូហាម៉ាត់ ណរ មៈថា បានប្រកាសប្រាប់អ្នកកាសែតថា គ្មានទេ ការបោះឆ្នោតនៅថ្ងៃព្រហស្បតិ៍ស្អែក។ “ការបោះឆ្នោតជ្រើសរើសនាយករដ្ឋមន្ត្រីថ្មីមិនអាចដំណើរការទៅបានទេ ដរាបណា នៅមិនទាន់មានការសម្រេចជាផ្លូវការណាមួយរបស់តុលាការធម្មនុញ្ញថៃ ស្តីពីភាពស្របច្បាប់នៃបេក្ខភាពនាយករដ្ឋមន្រ្តីរបស់លោកភិថា លីមចៈរើនរ៉ាត់”។
ប្រធានគណបក្សកាវក្លៃ លោកភិថា លីមចៈរើនរ៉ាត់បរាជ័យ២លើក នៅក្នុងការបោះឆ្នោតសភា ជ្រើសរើសនាយករដ្ឋមន្រ្តី កាលពីថ្ងៃទី ១៣ និងថ្ងៃទី១៩កក្កដា។ នៅក្នុងការបោះឆ្នោតជាលើកទី២ នៅថ្ងៃទី១៩កក្កដា តុលាការធម្មនុញ្ញ ទៅតាមពាក្យបណ្តឹងរបស់គណៈកម្មការបោះឆ្នោតដែលចោទលោកភិថាថា រំលោភច្បាប់បោះឆ្នោត បានសម្រេចព្យួរសមាជិកភាពជាតំណាងរាស្រ្តរបស់លោកភិថា ក្នុងពេលរង់ចាំការបើកសវនាការនាពេលខាងមុខ។
ម្យ៉ាង តាមប្រធានសភាថៃ ការបោះឆ្នោតជ្រើសរើសនាយករដ្ឋមន្រ្តី ដែលគ្រោងធ្វើនៅថ្ងៃព្រហស្បតិ៍ ត្រូវលើកពេលដោយគ្មានកាលកំណត់ ព្រោះគេត្រូវរង់ចាំការសម្រេចរបស់តុលាការធម្មនុញ្ញទៅលើពាក្យបណ្តឹងថ្មីមួយទៀត ដែលមានអ្នកគាំទ្ររបស់លោកភិថា ជាម្ចាស់បណ្តឹងតវ៉ា។ នៅក្នុងពាក្យបណ្តឹងដែលការិយាល័យអន្តរការីជាអ្នកតំណាង អ្នកគាំទ្ររបស់លោកភិថា ទាមទារចង់ឲ្យតុលាការធម្មនុញ្ញបកស្រាយពីភាពស្របច្បាប់នៅក្នុងការឈរឈ្មោះជាលើកទី២ សម្រាប់បេក្ខភាពនាយករដ្ឋមន្រ្តី។ គួររំលឹកថា នៅមុនការសម្រេចរបស់តុលាការធម្មនុញ្ញថៃព្យួរសមាជិកភាពតំណាងរាស្រ្ត របស់លោកភិថា សមាជិកសភាទាំងថ្នាក់ ដែលភាគច្រើនជាសមាជិកព្រឹទ្ធសភា និងគណបក្សយោធានិយម បានបោះឆ្នោតបដិសេធ មិនឲ្យលោកភិថា លីមចៈរើនរ៉ាត់ដាក់ស្នើបេក្ខភាពជាលើកទី២ទេ ព្រោះវាផ្ទុយមាត្រាទី៤១នៃបទបញ្ជាផ្ទៃក្នុងរបស់សភា ដែលចែងថា គេមិនអាចបោះឆ្នោត២ដងលើរឿងតែមួយ ពោលគឺគេមិនអាចបោះឆ្នោតលើបេក្ខភាពដដែល ដែលមិនបានទទួលសំឡេងគាំទ្រគ្រប់គ្រាន់ក្នុងការបោះឆ្នោតនៅលើកទី១នោះទេ។
ការប្រកាសរបស់ប្រធានសភាថៃលុបចោលគម្រោងបោះឆ្នោត ជ្រើសរើសនាយករដ្ឋមន្រ្តី បានធ្វើកិច្ចប្រជុំដែលគណបក្សចម្រុះទាំង៨ នាំមុខដោយគណបក្សភឿថៃគ្រោងធ្វើនៅថ្ងៃអង្គារ ជាមួយ គណបក្សអភិរក្សនិយម គាំទ្រដោយពួកយោធា ត្រូវលុបចោលទៅវិញ នៅនាទីចុងក្រោយ។
ដឹកនាំដោយត្រកូលថាក់ស៊ីន បក្សភឿថៃដែលចាប់ដៃគូជាមួយគណបក្សកាវក្លៃ មានបេក្ខជនពីរនាក់ ដើម្បីអាចជំនួសលោកភិថា ដែលនៅក្នុងនោះ ម្នាក់ ជាមហាសេដ្ឋីអចលទ្រព្យ សេដ្ឋា ទ្វីសិនដែលអាចទទួលទំនុកចិត្តច្រើនពីសម្ព័ន្ធបក្សប្រជាធិបតេយ្យទាំង៨។ ដើម្បីឲ្យបេក្ខជននាយករដ្ឋមន្រ្តីរបស់ខ្លួន ទទួលបានសំឡេងភាគច្រើន នៅក្នុងការបោះឆ្នោតសភា គណបក្សភឿថៃ កំពុងស្ទង់រកសំឡេងគាំទ្រពីគណបក្សផ្សេងទៀតដែលនិយមយោធា។ ប៉ុន្តែ យុទ្ធនាការរបស់បក្សភឿថៃអាចជួបឧបសគ្គ ព្រោះថា អ្នកនយោបាយអភិរក្សនិយមភាគច្រើន មិនចង់ចាប់ដៃបង្កើតរដ្ឋាភិបាលចម្រុះ ដែលមានគណបក្សកាវក្លៃរបស់លោកភិថា ចូលរួម ដោយសារតែបក្សកាវក្លៃមានកម្មវិធីនយោបាយសើរើច្បាប់ជេរប្រមាថព្រះមហាក្សត្រ និងសើរើផលប្រយោជន៍របស់ពួកយោធាថៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ