អាមេរិកនិងអង់គ្លេសដកខ្លួនពីការជួបជុំក្រុមកាយឫទ្ធិនៅកូរ៉េខាងត្បូង ដោយសាររលកកំដៅក្តៅខ្លាំង
នៅកូរ៉េខាងត្បូង នៅក្រោយរលកកំដៅក្តៅប៉ុន្មានថ្ងៃជាប់គ្នា ក្រុមកាយឫទ្ធិអង់គ្លេស និងអាមេរិកបានសម្រេចដកខ្លួនចេញពីព្រឹត្តិការណ៍ជួបជុំក្រុមកាយឫទ្ធិពិភពលោក World Scout Jamboree ដែលកំពុងប្រព្រឹត្តទៅនៅខេត្តJeollaខាងជើងរបស់កូរ៉េខាងត្បូង។ អាកាសធាតុក្តៅខ្លាំងបានធ្វើឲ្យអ្នកចូលរួមជាច្រើនរយនាក់ឈឺ សន្លប់បាត់ស្មារតី ដែលជាហេតុធ្វើឲ្យអ្នករៀបចំអំពាវនាវឲ្យអាជ្ញាធរកូរ៉េខាងត្បូងកាត់បន្ថយចំនួនថ្ងៃជួបជុំក្រុមកាយឫទ្ធិលើកនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៩
ព្រឹត្តិការណ៍ជួបជុំក្រុមកាយឫទ្ធិពិភពលោក World Scout Jamboree ដែលកូរ៉េខាងត្បូងធ្វើជាម្ចាស់ផ្ទះ បានទាក់ទាញអ្នកចូលរួមជាង ៤៣០០០នាក់ មកពីប្រទេស ១៥០ នៅក្នុងពិភពលោក។ នៅថ្ងៃ សៅរ៍ អ្នករៀបចំបានកោះប្រជុំបន្ទាន់ដើម្បីរកដំណោះស្រាយ បន្ទាប់ពីអ្នកចូលរួមជាង ៦០០នាក់ធ្លាក់ខ្លួនឈឺ រងគ្រោះ ដោយសារអាកាសធាតុក្តៅខ្លាំង។
នៅប៉ុន្មានថ្ងៃមកនេះ នៅកូរ៉េខាងត្បូង ជាពិសេស នៅតំបន់ភាគនិរតីប្រទេស ដែលមានការប្រមូលផ្តុំក្រុមកាយឫទ្ធិពិភពលោក កំដៅសីតុណ្ហភាពចាប់មានពី ៣៥ ទៅ ៣៨អង្សា សឹងជារៀងរាល់ថ្ងៃ ដែលជាហេតុធ្វើឲ្យមានការទាញអាសន្នអតិបរមាស្តីពីគ្រោះថ្នាក់ រលកកំដៅ នៅកូរ៉េខាងត្បូង។
នៅចំពោះមុខបញ្ហាអាកាសធាតុក្តៅខ្លាំង និងសើមធុញថប់ ចលនាអង្គការកាយឫទ្ធិពិភពលោកបានទាមទារឲ្យភាគីកូរ៉េខាងត្បូងដែលជាម្ចាស់ផ្ទះ កាត់បន្ថយចំនួនថ្ងៃជួបជុំក្រុមក្រុមកាយឫទ្ធិ ដែលតាមគម្រោង ចាប់ធ្វើពីថ្ងៃទី ១ រហូតដល់ថ្ងៃទី ១២សីហា។
ប៉ុន្តែ អ្នករៀបចំកូរ៉េខាងត្បូង នៅតែបន្តរក្សា ការជួបជុំក្រុមកាយឫទ្ធិ។ ប្រឈមនឹងស្ថានការណ៍ បន្ទាន់ រដ្ឋាភិបាលកូរ៉េខាងត្បូង ដែលចង់យកព្រឹត្តិការណ៍ប្រមូលផ្តុំក្រុមកាយឫទ្ធិពិភពលោកដើម្បីជំរុញវិស័យទេសចរណ៍ បានប្រកាសផ្តល់ជំនួយថវិកាបន្ទាន់ ជាង៤,៦ដុល្លារ។ លោកប្រធានាធិបតីកូរ៉េខាងត្បូង យូន សុខយោល វិញ បានបញ្ជាឲ្យគេបញ្ជូនរថយន្តក្រុងមានម៉ាស៊ីនត្រជាក់ ឬឡានដឹកទឹកកកសម្រាប់អ្នកចូលរួមដែលជាយុវជនមានអាយុ ពី១៤ ទៅ ១៨ឆ្នាំ។
វិធានការរបស់អាជ្ញាធរកូរ៉េខាងត្បូងនៅតែមិនអាចបញ្ចុះបញ្ចូលអ្នករៀបចំក្រុមកាយឫទ្ធិបរទេស។ បន្ទាប់ពីអង់គ្លេស ដកក្រុមកាយឫទ្ធិជាង៤០០០នាក់ចេញពីកន្លែងប្រមូលផ្តុំកាលពីថ្ងៃ សុក្រ អ្នករៀបចំក្រុមកាយឫទ្ធិអាមេរិក បានប្រកាសដកខ្លួន និងផ្ទេក្រុមកាយឫទ្ធិអាមេរិកទៅនៅជំរំកងទ័ពអាមេរិកHumphrreys ក្នុងខេត្តPyeongtaek ភាគខាងត្បូង ទីក្រុងសេអ៊ូល។ អ្នកទទួលខុសត្រូវរបស់ក្រុមកាយឫទ្ធិប៊ែលហ្ស៊ិក និងសិង្ហបុរីកំពុងពិចារណា ចាត់វិធានការដូចអាមេរិក និងអង់គ្លេស។
ក្រៅពីបញ្ហាអាកាសធាតុក្តៅសើមខ្លាំង កាសែតក្នុងស្រុកកូរ៉េខាងត្បូងបានសរសេរបរិយាយពីកង្វះអនាម័យ គ្មានទឹកបង្គន់គ្រប់គ្រាន់ និងការរៀបចំមិនបានល្អ ព្រោះថា ទីតាំងបោះជំរំរបស់ក្រុមកាយឫទ្ធិធ្វើឡើងនៅក្នុងតំបន់ ដែលក្រដើមឈើ ដើម្បីជ្រកពីកំដៅក្តៅ។
ម្តាយរបស់យុវជនកាយឫទ្ធិអាមេរិកម្នាក់នៅរដ្ឋVirginia បាននិយាយប្រាប់ទីភ្នាក់ងារព័ត៌មានអង់គ្លេសReuters ថា គាត់បានចំណាយប្រាក់៦៥០០ដុល្លារសម្រាប់ឲ្យកូនចូលរួមនៅក្នុងព្រឹត្តិការណ៍នៅកូរ៉េខាងត្បូង ប៉ុន្តែគាត់ត្រូវជួបសុបិន្តអាក្រក់ ព្រោះកូនរបស់គាត់អាយុ១៧ឆ្នាំដែលសន្លប់ ដោយសារអាកាសធាតុក្តៅខ្លាំងវិះតែនឹងបាត់បង់ជីវិតដោយសារសកម្មភាពសង្រ្គោះយឺតយ៉ាវរបស់ក្រុមពេទ្យកូរ៉េខាងត្បូង នៅក្នុងជំរំកាយឫទ្ធិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ