អង្គការសុខភាពពិភពលោកបើកសន្និសីទលើកដំបូងស្តីពីការព្យាបាលតាមបែបបុរាណ
អង្គការសុខភាពពិភពលោករៀបចំជំនួបកំពូលលើកទី១ស្តីពីការព្យាបាលតាមបែបបុរាណ។ សន្និសីទរយៈពេល២ថ្ងៃរៀបចំឡើង នៅទីក្រុងGandhinaga ក្នុងរដ្ឋGujaratរបស់ប្រទេសឥណ្ឌា ជាទីដែលអង្គការសុខភាពពិភពលោកបើកសម្ពោធ មជ្ឈមណ្ឌលព្យាបាលតាមបែបបុរាណ កាលពីឆ្នាំ ២០២២។ នៅក្នុងសន្និសីទរយៈពេល២ថ្ងៃ អង្គការសុខភាពពិភពលោកត្រូវផ្តោតពិភាក្សាលើការស្វែងរកឯកសារ ភស្តុតាង និងទិន្នន័យ ដើម្បីបើកផ្លូវទៅថ្ងៃអនាគត ឲ្យគេអាចប្រើប្រាស់វិធីសាស្រ្តព្យាបាលតាមបែបបុរាណ ប្រកបដោយសុវត្ថិភាព គ្មានគ្រោះថ្នាក់។
ចុះផ្សាយនៅថ្ងៃ៖
ស្តាប់ - ០២:៥២
តាមអង្គការសុខភាពពិភពលោក មានមនុស្សជាច្រើនលាននាក់នៅក្នុងពិភពលោកដែលជ្រើសរើសយកការព្យាបាលតាមបែបបុរាណជាជម្រើសមុនគេបង្អស់ មុននឹងទៅរកគ្រូពេទ្យ។ ប៉ុន្តែសម្រាប់អង្គការសុខភាពពិភពលោក ធម្មជាតិមិនមែនមានន័យថា សុទ្ធតែសុវត្ថិភាព ហើយការអនុវត្តជាប្រពៃណីរាប់សតវត្សរ៍មិនមែនសុទ្ធតែធានាថា មានប្រសិទ្ធិភាពនោះទេ។ គេត្រូវការចាំបាច់ការស្រាវជ្រាវវិទ្យាសាស្រ្ត ដើម្បីបញ្ជាក់ពីប្រសិទ្ធិភាព និងសុវត្ថិភាព។
សម្រាប់ប្រធានអង្គការសុខភាពពិភពលោក លោក តេដ្រូ ការព្យាបាលតាមបែបបុរាណអាចជួយបំពេញការខ្វះខាតខាងផ្នែកសេវាសុខភាព ប៉ុន្តែ វានឹងមានតម្លៃ ប្រសិនបើវាត្រូវបានគេអនុវត្តដោយត្រឹមត្រូវ ដោយប្រសិទ្ធិភាព ដោយផ្អែកទៅលើអំណះអំណាងវិទ្យាសាស្រ្ត។ ម្យ៉ាង ការសិក្សាវិទ្យាសាស្រ្តស្តីពីការព្យាបាលតាមបែបបុរាណត្រូវគោរពតាមស្តង់ដារម៉ត់ចត់ ច្បាស់លាស់ដូចការសិក្សាស្រាវជ្រាវដទៃទៀតខាងផ្នែកសុខភាព។
ការស្វែងរកភស្តុតាងវិទ្យាសាស្រ្ត និងទិន្នន័យ ស្តីពីការព្យាបាលតាមបែបបុរាណ ជាគោលដៅចំបងនៃសន្និសីទអន្តរជាតិលើកដំបូងរបស់អង្គការសុខភាពពិភពលោក ដែលកំពុងប្រព្រឹត្តទៅប្រទេសឥណ្ឌា នៅថ្ងៃព្រហស្បតិ៍ ទី ១៧ និង១៨សីហា។
តាមនិយមន័យរបស់អង្គការសុខភាពពិភពលោក ការព្យាបាលតាមបែបបុរាណផ្តោតទៅលើចំណេះដឹង សមត្ថភាព និងការអនុវត្តដោយយោងទៅលើទ្រឹស្តី ជំនឿ និងបទពិសោធន៍ផ្ទាល់របស់វប្បធម៌នីមួយៗ ដែលគេអាចពន្យល់ ឬមិនអាចពន្យល់បាន។ លើសពីនោះ ការព្យាបាលតាមបែបបុរាណ ជាវិធីសាស្រ្តដែលគេប្រើដើម្បីថែរក្សាសុខភាព ក៏ដូចជាការបង្ការ ការរកប្រភេទជំងឺ ឬការព្យាបាលជំងឺផ្លូវកាយ និងផ្លូវចិត្ត។
លោកនាយករដ្ឋមន្រ្តីឥណ្ឌា ណារិនដ្រា ម៉ូឌី ដែលត្រូវថ្លែងបើកសន្និសីទរបស់អង្គការសុខភាពពិភពលោក នៅថ្ងៃព្រហស្បតិ៍ធ្លាប់ជំរុញផ្សព្វផ្សាយ ការធ្វើយោគៈ Yoga ថាជាថ្នាំព្យាបាលរោគស្ត្រេស និងការស្អប់គុំអ្នកដទៃ។
នៅក្នុងចំណោមប្រទេសសមាជិកទាំង១៩៤របស់អង្គការសុខភាពពិភពលោក មានប្រទេស១៧០ដែលនៅប្រើការព្យាបាលតាមបែបបុរាណ។ ប៉ុន្តែ មានតែ១២៤ប្រទេសប៉ុណ្ណោះដែលបង្កើតច្បាប់គ្រប់គ្រងការប្រើប្រាស់ថ្នាំបុរាណ។
ការព្យាបាលតាមបែបបុរាណត្រូវបានអនុវត្តយ៉ាងទូលំទូលាយនៅក្នុងពិភពលោក ប៉ុន្តែ ក៏ប្រឈមនឹងការរិះគន់។ ក្រៅតែពីគ្មានមូលដ្ឋានវិទ្យាសាស្រ្ត ការព្យាបាលតាមបែបបុរាណក៏ជាដើមហេតុនាំឲ្យមានការជួញដូរសត្វព្រៃខុសច្បាប់ ជាពិសេសសត្វដែលកំពុងប្រឈមនឹងការរលាយផុតពូជ ដូចជារមាស ពង្រូ ខ្លា និងរុក្ខជាតិកម្រ។ ការប្រើថ្នាំបុរាណ ឬការព្យាបាលតាមបែបបុរាណបានកើនឡើងខ្លាំងនៅក្នុងសម័យកូវីដ ដូចជាទឹកបៃតងធ្វើពីដើម artemisia ជាដើម ដែលប្រធានាធិបតីរបស់ប្រទេសម៉ាដាហ្កាស្កាផ្សព្វផ្សាយប្រាប់ប្រជាជនថា ជាថ្នាំដ៏វិសិទ្ធិ ព្យាបាលជំងឺកូវីដ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ