ថៃ៖ លោកថាក់ស៊ីន ប្រកាសចូលស្រុកថ្ងៃទី២២សីហា ចំថ្ងៃសភាបោះឆ្នោតជ្រើសរើសនាយករដ្ឋមន្ត្រី
លោកថាក់ស៊ីន ស៊ីណាវ៉ាត្រ អតីតនាយករដ្ឋមន្ត្រីថៃ ដែលបានភៀសខ្លួនទៅនៅក្រៅស្រុក ប្រមាណ១៥ឆ្នាំមកហើយនោះ បានប្រកាសថានឹងត្រឡប់ចូលស្រុកវិញ នៅថ្ងៃអង្គារ ទី២២សីហា។ ជាការប្រកាសសន្យា បើទោះបីជាដឹងថាខ្លួនលោក អាចនឹងរងការចាប់ខ្លួនពីសំណាក់ សមត្ថកិច្ចថៃក៏ដោយ។ ថ្ងៃទី២២សីហា ក៏គឺជាថ្ងៃដែលសភាថៃទាំង២អង្គ នឹងបើកការប្រជុំបោះឆ្នោតជាថ្មីម្តងទៀត ដើម្បីជ្រើសតាំងនាយករដ្ឋមន្ត្រី ដោយលើកនេះ បេក្ខជននាយករដ្ឋមន្ត្រីគឺលោក សេដ្ឋា ថៈវីស៊ីន ស្នើដោយគណបក្សភឿថៃ។
ចុះផ្សាយនៅថ្ងៃ៖
ស្តាប់ - ០៤:០៨
គួរកត់សំគាល់ថា ជាច្រើនដងមកហើយ ដែលមានដំណឹងលេចឮថាលោកថាក់ស៊ីននឹងត្រលប់ចូលស្រុក តែលើកនេះ លោកបានអះអាងប្រាប់ទូរទស្សន៍ BBC ថៃ ថាលោកនឹងត្រលប់ចូលស្រុកពិតមែន។ លោកស្រី ភែថងថាន កូនស្រីលោកថាក់ស៊ីន ហើយដែលជាតំណាងរាស្ត្រម្នាក់ក្នុងបក្សភឿថៃ បានអះអាងប្រាប់អ្នកកាសែតថា លោកស្រីនឹងទៅទទួលឪពុកលោកស្រី នៅព្រលានយន្តហោះដនមឿង ក្រុងបាងកក នៅព្រឹកថ្ងៃអង្គារទី២២សីហា វេលាម៉ោង៩ព្រឹក។
បច្ចុប្បន្នមានអាយុ ៧៤ឆ្នាំ លោកថាក់ស៊ីន គឺជាមហាសេដ្ឋី និងធ្លាប់ធ្វើជានាយករដ្ឋមន្ត្រីថៃ ពីឆ្នាំ២០០១ដល់ ឆ្នាំ២០០៦ មុននឹងត្រូវបានក្រុមយោធាថៃធ្វើរដ្ឋប្រហារទំលាក់ពីតំណែង។ តែយ៉ាងណា លោកនៅតែបន្តមានប្រជាប្រិយភាពខ្លាំង ក្នុងចំណោមប្រជាជនថៃមួយចំនួនធំ ជាពិសេសគឺអ្នកដែលធ្លាប់គាំទ្រចលនាអាវក្រហមរបស់បក្សភឿថៃ។
គួរបញ្ជាក់ដែរថា ជាង៣ខែមកហើយ ពោលគឺក្រោយការបោះឆ្នោតតំណាងរាស្ត្រ ថ្ងៃទី១៤ឧសភា ដែលថៃបន្តជាប់គាំងក្នុងវិបត្តិនយោបាយ។ គណបក្សកាវក្លៃ ដឹកនាំដោយលោក ភិថា លីមចៈរឿនរ៉ាត់ បានឈ្នះអាសន្នៈនាំមុខគេពិតមែន តែមិនអាចឈានក្លាយទៅដឹកនាំរដ្ឋាភិបាលបាន បន្ទាប់ពីសភាថៃបានបោះឆ្នោតបដិសេធបេក្ខភាពនាយករដ្ឋមន្ត្រីរបស់លោកភិថា។ ក្នុងក្រសែភ្នែករបស់ក្រុមសមាជិកសភា និងសមាជិកព្រឹទ្ធសភាថៃ ដែលស្និទ្ធនឹងក្រុមយោធាអភិរក្សនិយម និងរាជានិយមថៃ គឺលោកភិថា លីមចៈរើនរ៉ាត់ មានគោលគំនិតនយោបាយចម្រើននិយមជ្រុលពេក ដែលអាចធ្វើឲ្យរង្គោះរង្គើ ដល់មូលដ្ឋានអំណាចរបស់ពួកគេ។
យ៉ាងណាមិញ ដើម្បីរកច្រកចេញពីវិបត្តិនេះ បក្សភឿថៃ បានសម្រេចបង្កើតសម្ព័ន្ធថ្មីជាមួយបក្សមួយចំនួន ក្នុងនោះមានបក្សដែលស្និទ្ធនឹងក្រុមយោធាអភិរក្សនិយមផងដែរ ដើម្បីឈានទៅបង្កើតរដ្ឋាភិបាលចម្រុះ ហើយបានផាត់ចោលគណបក្សកាវក្លៃរបស់លោកភិថា ឲ្យក្លាយជាបក្សប្រឆាំង។ បក្សភឿថៃ សង្ឃឹមថាកម្រោងថ្មីនេះ នឹងអាចធ្វើឲ្យសភាថៃ យល់ព្រមទទួលយកបេក្ខភាពនាយករដ្ឋមន្ត្រីរបស់លោក សេដ្ឋា ថៈវីស៊ីន។ តែសម្រាប់អ្នកគាំទ្របក្សកាវក្លៃ និងអ្នកគាំទ្របក្សភឿថៃមួយជំនួន គឺបក្សភឿថៃបានក្បត់សំដីខ្លួនឯង ដែលធ្លាប់បានសន្យាកាលពីពេលឃោសនាបោះឆ្នោតថា “ទោះជាយ៉ាងណាក៏បក្សភឿថៃ មិនទៅចងសម្ព័ន្ធភាព ជាមួយក្រុមយោធាដែលធ្វើរដ្ឋប្រហារជាដាច់ខាត”។
សំណួរសួរថា តើវត្តមានចូលស្រុកវិញរបស់លោកថាក់ស៊ីន ដែលជាស្ថាបនិកបក្សភឿថៃ អាចនឹងធ្វើឲ្យប្រែប្រួលយ៉ាងណា ដល់បរិបទនយោបាយថៃ នាពេលនេះ?
យោងតាមការវិភាគខ្លះ គឺលោកថាក់ស៊ីន អាចប្រហែលជាបានទទួលការធានាការពារ ពីក្រុមយោធាអភិរក្សនិយម ទើបបានជាសម្រេចចិត្តចូលស្រុកវិញបែបនេះ។ លោកបណ្ឌិត Jade Donavanik អ្នកវិភាគនយោបាយថៃម្នាក់ បានលើកឡើងថា រវាងជម្រើសដែលមានតែ២ចំពោះមុខ គឺក្រុមយោធាថៃ ប្រាកដជារើសយកជម្រើសដែលមិនប្រឆាំងនឹងខ្លួនខ្លាំងពេក ពោលគឺរើសយកបក្សភឿថៃ ជាជាងបក្សកាវក្លៃ។ ដូចគ្នាដែរ លោកស្រី Korakot Sangyenpan អ្នកវិភាគនៅក្រុមស្រោចស្រង់ប្រជាធិបតេយ្យថៃ បានលើកឡើងថា ក្មេងជំនាន់ក្រោយបែបមិនសូវស្គាល់លោកថាក់ស៊ីន ពិតមែន តែសម្រាប់ក្រុមយោធាអភិរក្សនិយម គឺវត្តមានរបស់លោកថាក់ស៊ីន អាចជាក្តីសង្ឃឹមថ្មី ដើម្បីទប់កុំឲ្យមានការផ្លាស់ប្តូរក្រឡាប់ចាក់ ខ្លាំងជ្រុលហួសហេតុពេក បើប្រៀបធៀបទៅនឹងអ្វី ដែលលោកភិថា លីមចៈរើនរ៉ាត់ ចង់ធ្វើកំណែទម្រង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ