សភាថៃបោះឆ្នោតយល់ព្រម តែងតាំងលោក សេដ្ឋា ថៈវីស៊ីន ធ្វើជានាយករដ្ឋមន្ត្រីថ្មី
សភាថៃទាំង២អង្គ បានបើកសម័យប្រជុំ នៅថ្ងៃទី២២សីហា ដើម្បីបោះឆ្នោតលើបេក្ខភាពនាយករដ្ឋមន្ត្រីស្នើដោយគណបក្សភឿថៃ គឺលោក សេដ្ឋា ថៈវីស៊ីន។ លទ្ធផលបោះឆ្នោតបានបង្ហាញថា ក្នុងចំណោមសមាជិករដ្ឋសភា និងសមាជិកព្រឹទ្ធសភា មានវត្តមានទាំងអស់៧៤៧នាក់ គឺបេក្ខភាពលោកសេដ្ឋា ថៈវីស៊ីន បានទទួលសំឡេងឆ្នោតគាំទ្រ ចំនួន៤៨២ ដែលក្នុងនោះមានសំឡេងឆ្នោតសមាជិកសភា ៣៣០ និងសមាជិកព្រឹទ្ធសភា ១៥៣។ ចំណែកសំឡេងឆ្នោតប្រឆាំង មានចំនួន១៦៥ និងអនុប្បវាទ ចំនួន៨១។
ចុះផ្សាយនៅថ្ងៃ៖
ស្តាប់ - ០៣:១០
តាមរយៈលទ្ធផលនេះ លោកសេដ្ឋា ថៈវីស៊ីន នឹងក្លាយជានាយករដ្ឋមន្ត្រីថ្មី នៃរដ្ឋាភិបាលថៃ។ ជារដ្ឋាភិបាលចម្រុះ ដែលគណបក្សភឿថៃ បានរៀបចំបង្កើតសម្ព័ន្ធភាព ជាមួយគណបក្សមួយចំនួនទៀត ក្នុងនោះមានគណបក្ស ដែលស្និទ្ធនឹងក្រុមយោធាអភិរក្សនិយមថៃផងដែរ។ ដោយឡែក បក្សកាវក្លៃ ដែលជាបក្សឈ្នះបានអាសនៈច្រើនជាងគេ នៅក្នុងការបោះឆ្នោតសភាថ្ងៃទី១៤ឧសភា ត្រូវគេផាត់ចេញឲ្យនៅក្រៅរដ្ឋាភិបាល ហើយក្លាយជាបក្សប្រឆាំងនៅក្នុងសភា។
សូមរំលឹកថា កាលពីពេលឃោសនាបោះឆ្នោត គណបក្សភឿថៃ ដែលបានទទួលចំនួនអាសនៈលំដាប់ទី២បន្ទាប់ពីបក្សកាវក្លៃ បានសន្យាថាទោះជាយ៉ាងណា ខ្លួននឹងមិនទៅចូលរួមចាប់ដៃជាមួយក្រុមយោធារបបសិក ដែលបានធ្វើរដ្ឋប្រហារជាដាច់ខាត។ តែទីបំផុត បក្សភឿថា បានសម្រេចបោះបង់ចោល បក្សកាវក្លៃ របស់លោកភិថា លីមចៈរើនរ៉ាត់ ហើយបានងាកទៅបង្កើតសម្ព័ន្ធភាពជាមួយក្រុមយោធា។
លោក សេដ្ឋា ថៈវីស៊ីន អ្នកជំនួញអចលនទ្រព្យ មានឈ្មោះល្បី វ័យ៦០ឆ្នាំ បានចូលប្រឡូកក្នុងឆាកនយោបាយ ដោយបានចូលរួមជាមួយបក្សភឿថៃ នៅខែតុលាឆ្នាំ២០២២។ លោកត្រូវគេស្គាល់ ថាគឺជាមនុស្សស្និទ្ធស្នាលបំផុត ជាមួយក្រុមគ្រួសារលោកថាក់ស៊ីន ស៊ីណាវ៉ាត្រ។ យ៉ាងណាមិញ សម្ព័ន្ធភាពរដ្ឋាភិបាលចម្រុះ ដែលបក្សភឿថៃ បានយល់ព្រមធ្វើជាមួយក្រុមគណបក្សស្និទ្ធនឹងក្រុមយោធាថៃនេះ ត្រូវបានអ្នកវិភាគខ្លះ ជឿថា គឺជាយុទ្ធសាស្ត្ររកវិធី ដើម្បីឲ្យលោក ថាក់ស៊ីន អាចត្រឡប់ចូលស្រុកវិញ។ ទន្ទឹមគ្នានេះ រដ្ឋាភិបាលចម្រុះនេះ នឹងអនុញ្ញាតឲ្យក្រុមយោធាអភិរក្សនិយមថៃ អាចបន្តរក្សាការពារអំណាចខ្លួនឲ្យនៅដដែល។
សូមបញ្ជាក់ដែរថា នៅព្រឹកថ្ងៃអង្គារទី២២សីហា ស្របពេលដែលសភាកំពុងប្រជុំបោះឆ្នោតជ្រើសតាំងលោកសេដ្ឋា ថៈវីស៊ីន លោកថាក់ស៊ីន បានធ្វើដំណើរទៅដល់ក្រុងបាងកក ហើយត្រូវបានសមត្ថកិច្ចថៃ ចាប់ឃាត់ខ្លួនភ្លាមៗដែរ ទៅតាមដីកាបង្គាប់របស់តុលាការ។ លោកសាស្ត្រាចារ្យ Aaron Connelly នយោបាយវិទូ បានលើកឡើងថា សម្ព័ន្ធភាពរវាងបក្សភឿថៃ និងក្រុមយោធារាជានិយមថៃ មានលក្ខណៈផុយស្រួយខ្លាំងណាស់។ អ្វីដែលបក្សភឿថៃ រំពឹងរងចាំ គឺការប្រោសព្រះរាជទានទោសជូនលោកថាក់ស៊ីន ពីសំណាក់ព្រះមហាក្សត្រថៃ។ ប្រសិនបើលោកថាក់ស៊ីន នឹងមិនត្រូវបានលើកលែងទោសទេនោះ មានន័យថា សម្ព័ន្ធភាពរដ្ឋាភិបាលចម្រុះ រវាងបក្សភឿថៃ និងក្រុមបក្សយោធារាជានិយមថៃ អាចនឹងត្រូវបែកបាក់ប្រេះស្រាំជាក់ជាមិនខាន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ