ប៉ាគីស្ថានសង្រ្គោះដោយជោគជ័យមនុស្ស៨នាក់ដែលជាប់គាំងក្នុងទូខ្សែកាបដឹកអ្នកដំណើរឆ្លងកាត់ភ្នំ
នៅក្រោយប្រតិបត្តិសង្រ្គោះយ៉ាងស្វិតស្វាញអស់ជាច្រើនម៉ោង កងកុម្ម៉ង់ដូរប៉ាគីស្ថានបានសង្រ្គោះមនុស្ស៨នាក់ ដែលជាប់គាំងក្នុងទូខ្សែកាប ដឹកអ្នកដំណើឆ្លងកាត់ភ្នំ។ សិស្សសាលា៦នាក់ ស្ថិតក្នុងចំណោមមនុស្សដែលទាហានប៉ាគីស្ថានបានសង្រ្គោះ នៅយប់ថ្ងៃអង្គារទី ២២ សីហា។ នៅក្នុងសារនៅលើបណ្តាញសង្គមX នាយករដ្ឋមន្រ្តីស្តីទីប៉ាគីស្ថាន លោកអាន់វារ អុល ហាក កាការ សរសេរសរសើរ ការងាររបស់ក្រុមជួយសង្រ្គោះ ដែលលោកចាត់ទុកជាវីរជនរបស់ប្រទេសជាតិ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៥
ប្រតិបត្តិការជួយសង្រ្គោះមនុស្ស៨នាក់ដែលជាប់គាំងក្នុងទូខ្សែកាបឆ្លងកាត់ភ្នំ ជាច្រើនម៉ោង ចាប់ផ្តើមឡើងនៅរសៀលថ្ងៃអង្គារ នៅជ្រលងភ្នំមួយ ភាគខាងជើងប្រទេសប៉ាគីស្ថាន។
នៅព្រឹកថ្ងៃអង្គារ ទូខ្សែកាបដឹកសិស្សសាលា៦នាក់ និងមនុស្សធំ២នាក់ ត្រូវជាប់គាំង ព្យួរបន្តោងយោលយោក នៅក្នុងកំពស់ ៣៥០ម៉ែត្រពីដី ដោយសារតែខ្សែរ៉កមួយខូចមិនដំណើរការ។ បន្ទាប់ពីទទួលសញ្ញាស្រែករកជំនួយពីប្រជាជននៅក្នុងភូមិ ឧទ្ធម្ភាគចក្ររបស់កងទ័ពប៉ាគីស្ថានបានធ្វើដំណើរទៅដល់កន្លែងកើតហេតុ និងបានសណ្តោងជួយសង្រ្គោះសិស្សសាលា១នាក់ដំបូងគេ។ ប្រតិបត្តិការជួយសង្រ្គោះតាមឧទ្ធម្ភាគចក្រត្រូវផ្អាកទៅវិញ ដោយសារលក្ខខណ្ឌអាកាសធាតុមិនល្អ។
តាមកងទ័ពប៉ាគីស្ថាន បន្ទាប់ពីឧទ្ធម្ភាគចក្រត្រលប់ចូលមូលដ្ឋានទ័ព កងកុម្ម៉ង់ដូរប៉ាគីស្ថានបន្តប្រតិបត្តិការជួយសង្រ្គោះ តាមរយៈការចងខ្លួនអូសតាមខ្សែរ៉ក ទៅសណ្តោងមនុស្ស៧នាក់ដែលនៅសល់ពីក្នុងទូខ្សែកាប។
ប្រតិបត្តិការជួយសង្រ្គោះមនុស្សពីក្នុងទូខ្សែកាបធ្វើឡើងនៅក្រោមក្រសែភ្នែកតាមដាន និងការបន់ស្រន់របស់ក្រុមគ្រួសារ និងអ្នកភូមិ។ នៅក្រោយមនុស្សធំពីរនាក់ចុងក្រោយគេត្រូវអមសណ្តោងមកដល់កន្លែងសុវត្ថិភាព គេលឺសំឡេងទះដៃស្រែកអបអររបស់ប្រជាជន ដែលបានបន់ស្រន់ និងតាមដានមើលដំណើរការជួយសង្រ្គោះ ដោយមិនដាក់ភ្នែក។
អមដោយមនុស្សធំ២នាក់ យុវជនសិស្សសាលា៦នាក់ បានឡើងជិះទូខ្សែកាប សំដៅសាលារៀនរបស់ពួកគេ ដែលស្ថិតនៅម្ខាងទៀតនៃជ្រលងភ្នំ។ តាមនាយកសាលា ក្មេងប្រុសខាងលើ រស់នៅក្នុងភូមិ ក្នុងតំបន់ភ្នំដែលគ្មានផ្លូវ ស្ពាន។ ដើម្បីធ្វើដំណើរ ទៅសាលារៀន អ្នកភូមិបានប្រើប្រាស់មធ្យោបាយផ្ទាល់ខ្លួន ដើម្បីតបណ្តាញខ្សែកាប សម្រាប់សណ្តោងទូដឹកសិស្សសាលា និងអ្នកភូមិឆ្លងកាត់ជ្រលងភ្នំ។ នៅប៉ាគីស្ថានមធ្យោបាយធ្វើដំណើរតាមទូខ្សែកាប សំបូរមានច្រើន ជាពិសេស នៅតំបន់ភ្នំ។ នៅឆ្នាំ ២០១៧ មនុស្ស១០នាក់ស្លាប់នៅក្នុងគ្រោះថ្នាក់ដាច់ទូខ្សែកាប នៅក្បែររដ្ឋធានីអ៊ីស្លាម៉ាបាដ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ