មហាសេដ្ឋីអចលនទ្រព្យ លោក សេដ្ឋា ថៈវីស៊ីនក្លាយជានាយករដ្ឋមន្រ្តីទី៣០របស់ថៃ
មួយថ្ងៃក្រោយសភាទាំងពីរអង្គបោះឆ្នោតជ្រើសរើសលោកសេដ្ឋា ថៈវីស៊ីនជានាយករដ្ឋមន្រ្តី ព្រះមហាក្សត្រថៃ មហាវិជ្ជរ៉ា ឡុងកុននៅថ្ងៃពុធទី ២២សីហា បានឡាយព្រះហសត្តគាំទ្រលោកសេដ្ឋា ថៈវីស៊ីនឲ្យធ្វើជានាយករដ្ឋមន្រ្តីទី៣០របស់រាជាណាចក្រថៃ។ តាមអ្នកនាំពាក្យរបស់សភាថៃ នៅបន្ទាប់ពីព្រះរាជលិខិតរបស់ព្រះមហាក្សត្រ ត្រូវអានជាផ្លូវការ នៅគណបក្សភឿថៃនៅម៉ោង៦យប់ នៅក្រុងបាងកក មហាសេដ្ឋីក្រុមហ៊ុនអចលនទ្រព្យ លោក សេដ្ឋា ថៈវីស៊ីននឹងក្លាយជានាយករដ្ឋមន្រ្តីថៃជាផ្លូវការ ដែលជាការបិទបញ្ចប់ភាពជាប់គាំងនយោបាយជាង៣ខែនៅប្រទេសថៃ។ ជាមហាសេដ្ឋីក្រុមហ៊ុនអចលនទ្រព្យឈានមុនគេនៅប្រទេសថៃ លោកសេដ្ឋា ថៈវីស៊ីនចូលកាន់តំណែងជានាយករដ្ឋមន្រ្តីថៃ ទាំងគ្មានបទពិសោធន៍ធ្វើនយោបាយ ប៉ុន្តែ លោកបានសន្យាកែលម្អជីវភាពរស់នៅរបស់ប្រជាជនថៃ។ តើលោកសេដ្ឋា ថៈវីស៊ីនមានប្រវត្តិបែបណា?
ចុះផ្សាយនៅថ្ងៃ៖
ស្តាប់ - ០២:៥៣
កើតនៅថ្ងៃទី ១៥កុម្ភៈ ឆ្នាំ ១៩៦៣ក្នុងត្រកូលគ្រួសារអ្នកមានខ្លាំងនៅប្រទេសថៃ លោកសេដ្ឋា ថៈវីស៊ីន មានសញ្ញាប័ត្រអនុបណ្ឌិតផ្នែករដ្ឋបាលធរុកិច្ច MBA ពីសកលវិទ្យាល័យClaremont នៅសហរដ្ឋអាមេរិក។ លោកបានចូលរួមក្នុងក្រុមហ៊ុនគ្រួសាររបស់លោក ឈ្មោះ សានស៊ីរី ដែលជាក្រុមហ៊ុនអចលនទ្រព្យនាំមុខមួយ នៅប្រទេសថៃ ជាមួយទ្រព្យសម្បត្តិសរុប ២៩០០លានដុល្លារ។ ក្រោមការដឹកនាំរបស់លោកសេដ្ឋា ថៈវីស៊ីន ដែលមាននាទីជាប្រធាន និងនាយកប្រតិបត្តិ ក្រុមហ៊ុនសានស៊ីរីរកបានប្រាក់ចំណេញ ១១៧លានដុល្លារ នៅឆ្នាំ ២០២២។
លោកសេដ្ឋា ថៈវីស៊ីនបានក្លាយជានាយករដ្ឋមន្រ្តី នៅបន្ទាប់ពីប្រលូកចូលក្នុងនយោបាយ ពោលជាសមាជិករបស់បក្សភឿថៃ បានរយៈពេល ៩ខែប៉ុណ្ណោះ។ នៅខែមីនាដើមឆ្នាំ នេះ គណបក្សភឿថៃបានតែងតាំងលោកសេដ្ឋា ថៈវីស៊ីនជាទីប្រឹក្សាផ្នែកសេដ្ឋកិច្ចរបស់លោកស្រីភេថងថាន កូនស្រីរបស់លោកថាក់ស៊ីន ស៊ីណាវ៉ាត់ ដែលជាប្រធានបក្សភឿថៃ។
បន្ទាប់បក្សភឿថៃ ជ្រើសរើសលោកជាបេក្ខជននាយករដ្ឋមន្រ្តីម្នាក់ក្នុងចំណោមបេក្ខជន៣ របស់បក្ស លោកសេដ្ឋា ថៈវីស៊ីនបានលាចេញពីមុខតំណែងនាយកប្រតិបត្តិរបស់ក្រុមហ៊ុនសានស៊ីរី និងប្រកាសផ្ទេរលក់ភាគហ៊ុនរបស់លោក តម្លៃ ៣៥លានដុល្លារឲ្យក្រុមហ៊ុនរបស់កូនស្រី។ យ៉ាងណាក៏ដោយ បន្ទាប់ពីបក្សភឿថៃ ប្រកាសដាក់ឈ្មោះលោកជាបេក្ខជននាយករដ្ឋមន្រ្តី លោកសេដ្ឋា ថៈវីស៊ីននិងក្រុមហ៊ុនអចលនទ្រព្យសានស៊ីរីរបស់លោកបានរងការចោទប្រកាន់ពីការគេចពន្ធរដ្ឋ និងលាងលុយកខ្វក់។ ការចោទប្រកាន់ដែលលោកសេដ្ឋា ថៈវីស៊ីន និងក្រុមហ៊ុនសានស៊ីរីទាត់ចោលដាច់អហង្កា។
មានអាយុ ៦០ឆ្នាំ និងខ្ពស់ត្រដែត ១ម៉ែត្រ ៩០ លោកសេដ្ឋា ថៈវីស៊ីនជាអ្នកគាំទ្រក្រុមកីឡាករបាល់ទាត់ះអង់គ្លេសLiverpool យ៉ាងចេញមុខ។ នៅក្នុងសារលើបណ្តាញសង្គម Tiktok ដែលបណ្តាញពេញនិយមរបស់យុវជនថៃ លោកសេដ្ឋា ថៈវីស៊ីន ព្យាយាមទាក់ទាញអ្នកបោះឆ្នោតវ័យក្មេង ដោយថា លោកជាអ្នកគាំទ្រចូលចិត្តកីឡាបាល់ទាត់ និងជាអ្នកនយោបាយ។ ក្នុងកីឡាបាល់ទាត់ គេមិនអាចលេងតែម្នាក់ ដូច្នេះ គេត្រូវការគ្នាជាក្រុម ក៏ដូចជាលោកដែលត្រូវការការចូលរួមរបស់ប្រជាជនថៃ។
ធ្លាប់ជាអ្នករិះគន់យ៉ាងចេញមុខ រដ្ឋាភិបាលយោធារបស់លោកប្រាយុទ្ធ ចាន់អូចា ជាពិសេសក្នុងរឿងគ្រប់គ្រងវិបត្តិកូវីដមិនបានល្អ លោកសេដ្ឋា ថៈវីស៊ីនធ្លាប់បានសន្យាអនុវត្តគោលនយោបាយដែលជំរុញការអប់រំ លុបបំបាត់វិសមភាពសង្រគម កាត់បន្ថយ គម្លាតរវាងអ្នកមាន និងអ្នកក្រ ជំរុញសិទ្ធិរបស់មនុស្សស្រឡាញ់ភេទដូចគ្នា។ នៅក្នុងបទសម្ភាសន៍ជាមួយទូរទស្សន័អាមេរិក កាលពីពេលធ្វើយុទ្ធនាការឃោសនាបោះឆ្នោត លោកសេដ្ឋាថៈវីស៊ីនធ្លាប់និយាយថា នៅក្នុងរយៈពេល១០០ថ្ងៃនៃការចូលកាន់តំណែង លោកនឹងផ្តោតមុនដំបូងគេលើបញ្ហាទំនិញឡើងថ្លៃ បិទបញ្ចប់កាតព្វកិច្ចយោធា ប៉ុន្តែ មិនប៉ះពាល់ច្បាប់ជេរប្រមាថព្រះមហាក្សត្រ ដូចការសន្យារបស់គណបក្ស ចម្រើននិយម បក្សកាវក្លៃ របស់លោកភិថា លីមចៈរើនរ៉ាត់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ