ថៃ៖ សកម្មជនប្រជាធិបតេយ្យម្នាក់ទទួលទោសជាប់ពន្ធនាគារបួនឆ្នាំពីបទប្រមាថព្រះមហាក្សត្រ
នៅថ្ងៃអង្គារទី ២៦កញ្ញា២០២៣នេះ តុលាការថៃបានសម្រេចដាក់ទោសសកម្មជនប្រជាធិបតេយ្យម្នាក់ឱ្យជាប់ពន្ធនាគារបួនឆ្នាំ ពីបទប្រមាថព្រះមហាក្សត្រ។ ថៃជាប្រទេសដែលមានច្បាប់ការពារព្រះមហាក្សត្រយ៉ាងតឹងតែងជាងគេបំផុតមួយ។ យុវជនថៃជំនាន់ក្រោយកាន់តែច្រើនឡើងៗទាមទារឱ្យធ្វើកំណែទម្រង់ច្បាប់នេះ តែមិនសម្រេច។
ចុះផ្សាយនៅថ្ងៃ៖
ស្តាប់ - ០២:៣០
ជាមេធាវីអាយុ៣៩ឆ្នាំ លោក Anon Nampa ត្រូវមានទោសជាប់ពន្ធនាគារបួនឆ្នាំ ពីបទបានធ្វើសុន្ទរកថា នៅចំពោះមុខបាតុករដែលបានមកប្រមូលផ្តុំគ្នាយ៉ាងច្រើន នៅទីលានប្រជាធិបតេយ្យនាទីក្រុងបាងកកកាលពីឆ្នាំ២០២០ ដើម្បីទាមទារឱ្យថៃធ្វើកំណែទម្រង់របបរាជានិយម។ នេះជាបទចោទប្រកាន់មួយក្នុងចំណោមបទចោទប្រកាន់ទាំង១៤ ក្នុងសំណុំរឿងចោទប្រកាន់ពីបទប្រមាថព្រះមហាក្សត្ររបស់Anon Nompa ដែលត្រូវបង់ពិន័យជាប្រាក់ចំនួន២ម៉ឺនបាតទៀតពីបទរំលោភច្បាប់ដាក់ប្រទេសក្នុងភាពអាសន្នដើម្បីទប់ស្កាត់ជំងឺរាតត្បាតសកលកូវីដ១៩។
ពេលមកដល់តុលាការ សកម្មជនប្រជាធិបតេយ្យថៃរូបនេះ បានអះអាងថា លោកសុខចិត្តបូជាសេរីភាព ទោះត្រូវជាប់ពន្ធនាគារច្រើនឆ្នាំក៏មិនថ្វី ព្រោះតាំងពីឆ្នាំ២០២០មក ថៃបានប្តូរផ្លាស់នយោបាយច្រើន។ នៅចំពោះមុខអ្នកសារព័ត៌មាន និងសកម្មជនគាំទ្រជាច្រើននាក់ លោកបានថែមទាំងលើកម្រាមដៃបី ជាសញ្ញាប្រឆាំងនឹងរាជានិយមទៀតផង។
“ជាថ្ងៃដ៏អួរអាប់សម្រាប់យុត្តិធម៌” នេះជាប្រតិកម្មរបស់សហព័ន្ធអន្តរជាតិដើម្បីសិទ្ធិមនុស្សដែលជាអង្គការក្រៅរដ្ឋាភិបាល។ សម្រាប់អង្គការAmnesty Internationalវិញ ការចោទប្រកាន់សកម្មជនប្រជាធិបតេយ្យនេះ ជាមរតកដ៏អាម៉ាសរបស់រដ្ឋាភិបាលចាស់ដែលផ្តុំទៅដោយក្រុមយោធា និងដែលត្រូវដោះស្រាយដោយរដ្ឋាភិបាលថ្មី។ ឯចំណែកសាលក្រមថ្ងៃនេះជាសាក្សីថ្មីបញ្ជាក់ថាសេរីភាពនៃការបញ្ចេញមតិបានរលត់រលាយបាត់ហើយនៅថៃ។
តាំងពីផ្ទុះបាតុកម្មទាមទារការធ្វើកំណែទម្រង់របបរាជានិយមនៅឆ្នាំ២០២០មក មានសកម្មជនប្រជាធិបតេយ្យជាង២០០នាក់ត្រូវជាប់ចោទពីបទប្រមាថព្រះមហាក្សត្រ។ មាត្រា១១២ ដែលថៃស្គាល់យ៉ាងច្បាស់ជាងគេនោះ អាចដាក់ទោសជនជេរប្រមាថព្រះមហាក្សត្រនិងក្រុមគ្រួសាររាជវង្សឱ្យជាប់ពន្ធនាគារដល់ទៅ១៤ឆ្នាំ តែក៏ត្រូវបានក្រុមយោធាកាន់អំណាចប្រើសម្រាប់បង្ក្រាបក្រុមបក្សនយោបាយប្រឆាំង។ កាវក្លៃ បក្សឈ្នះឆ្នោតនាំមុខក្នុងសម័យបោះឆ្នោតសភាកាលពីខែឧសភា២០២៣ បានសន្យាលុបមាត្រា១១២នេះចោលនៅពេលឡើងកាន់អំណាច តែទីបំផុតព្រឹទ្ធសភាថៃបានផាត់បក្សនេះចេញពីរដ្ឋាភិបាលតែម្តង។ ចំណែកនាយករដ្ឋមន្ត្រីថ្មី នៃបក្សភឿថៃ លោក សេដ្ឋា ថៈវីស៊ីន បានពោលថាមិនប៉ះពាល់ច្បាប់ការពាររាជានិយមទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ