តៃវ៉ាន់សម្ពោធនាវាមុជទឹកបាតសមុទ្រ ផលិតដោយស្នាដៃខ្លួនឯង
ក្នុងបរិបទប្រឈមនឹងការប្រើកម្លាំងពីសំណាក់ចិន តៃវ៉ាន់កំពុងតែប្រឹងប្រែងពង្រឹងសមត្ថភាពកងទ័ព និងសព្វាវុធដើម្បីការពារខ្លួន។ ថ្ងៃទី២៨កញ្ញា នៅកំពង់ផែ Kaoshiung តៃវ៉ាន់បានសម្ពោធនាវាមុជទឹកបាតសមុទ្រមួយគ្រឿង ជាលើកដំបូង ដែលជាស្នាដៃផលិតដោយតៃវ៉ាន់ខ្លួនឯង។ លោកស្រី សៃ អ៊ីងវេន ប្រធានាធិបតីតៃវ៉ាន់ បានប្រកាសថា ប្រវត្តិសាស្ត្រនឹងចងចាំថ្ងៃនេះ ជាថ្ងៃដែលតៃវ៉ាន់សម្រេចបានជោគជ័យ ផលិតបាននាវាមុជទឹកបាតសមុទ្រដោយខ្លួនឯង ខណៈដែលគ្រប់គ្នាធ្លាប់គិតពីមុនមក ថាវាជាបេសកកម្មដែលមិនអាចទៅរួច។
ចុះផ្សាយនៅថ្ងៃ៖
ស្តាប់ - ០៣:៣៣
នាវានេះ ត្រូវតៃវ៉ាន់ប្រសិទ្ធនាមហៅថា Hai Kun។ មានតម្លៃទឹកប្រាក់ចំនួន ១៥០០លានដុល្លារអាមេរិក នាវាមុជទឹករបស់តៃវ៉ាន់ ត្រូវបានចាប់ផ្តើមសាងសង់ នៅឆ្នាំ២០២០។ នាវានេះ មានប្រវែង៨០ម៉ែត្រ ទំងន់ចន្លោះពី ២៥០០ ទៅ ៣០០០តោន នៅពេលដែលវាធ្វើចលនា។ ចំណែកប្រព័ន្ធប្រយុទ្ធ និងបាញ់គ្រាប់ គឺបំពាក់ដោយបច្ចេកវិទ្យារបស់សហរដ្ឋអាមេរិក ផលិតដោយក្រុមហ៊ុន Lockheed Martin។ ផ្អែកតាមបញ្ជាក់ពីលោកស្រីសៃ អ៊ីងវេន ចាប់ពីពេលនេះ នាវាHai Kun នឹងត្រូវបញ្ជូនចុះទឹក ដើម្បីធ្វើការសាកល្បង មុននឹងចាប់ផ្តើមប្រតិបត្តិការជាផ្លូវការ នៅឆ្នាំ២០២៥។ តែដោយឡែក អ្នកជំនាញខ្លះក្នុងវិស័យនេះ អះអាងថា អាចនឹងចំណាយពេលយូរជាងនេះ។
គួរបញ្ជាក់ថា ក្នុងការប្រឹងប្រែងពង្រឹងសមត្ថភាពកងទ័ព តៃវ៉ាន់បានបង្កើនការចំណាយយ៉ាងខ្លាំងទៅលើវិស័យនេះ។ ឆ្នាំ២០២៤ ខ្ទង់ចំណាយលើវិស័យការពារជាតិ បានឡើងដល់ ១៩ពាន់លានដុល្លារអាមេរិក ដែលជាកម្រិតខ្ពស់ខ្លាំងមិនធ្លាប់មាន សម្រាប់កោះមួយនេះ។ ការការពារផ្លូវសមុទ្រ គឺជាផ្នែកមួយដ៏សំខាន់ ក្នុងករណីដែលចិនសម្រេចចិត្ត ប្រើកម្លាំងនៅថ្ងៃណាមួយមកលើតៃវ៉ាន់។
គួរកត់សំគាល់ថា តៃវ៉ាន់មានគម្រោងទិញគ្រឿងសព្វាវុធទំនើបជាច្រើនពីអាមេរិក តែទាក់ទិននឹងនាវាមុជទឹកបាតសមុទ្រ គឺអាមេរិកបានបដិសេធមិនលក់ឲ្យតៃវ៉ាន់ទេ។ បច្ចុប្បន្ននេះ តៃវ៉ាន់មាននាវាមុជទឹកបាតសមុទ្រចំនួន២គ្រឿង ដែលនៅដំណើរបាន ជាប្រភេទនាវា Swordfish ទិញមកពីហូឡង់ នៅទសវត្សឆ្នាំ១៩៨០។ កាលពីឆ្នាំ២០០១ អាមេរិក ធ្លាប់បានសន្យាថានឹងលក់នាវាមុជទឹកបាតសមុទ្រ ចំនួន៨គ្រឿងមកឲ្យតៃវ៉ាន់ តែទីបំផុតកិច្ចសន្យាលក់នេះ មិនអាចសម្រេចទៅបាន។
ដោយឡែក ផ្អែកតាមក្រសួងការពារជាតិអាមេរិក បច្ចុប្បន្ននេះចិនមាននាវាមុជទឹកបាតសមុទ្រ ចំនួនប្រមាន៦០គ្រឿង ដែលក្នុងនោះមានយ៉ាងហោច៦គ្រឿងជាប្រភេទដើរដោយប្រព័ន្ធនុយក្លេអ៊ែរ។ យោងតាមលោក Ou Sifu អ្នកជំនាញនៅវិទ្យាសា្ថនការពារជាតិតៃវ៉ាន់ បើនិយាយពីចំនួននាវាមុជទឹក គឺតៃវ៉ាន់មិនអាចទៅប្រៀបជាមួយចិនបានពិតមែន។ តែយ៉ាងណា តៃវ៉ាន់អាចរារាំង ឬបង្កការលំបាកទៅលើចិនបាន ប្រសិនបើមានការប្រឈមមុខដាក់គ្នា ដោយតៃវ៉ាន់អាចនឹកដាក់នាវាមុជទឹកដែលខ្លួនមាន នៅច្រកសមុទ្រ Miyako និងច្រក Bashi ដើម្បីរារាំងកម្លាំងចិន មិនឲ្យចូលមកកៀក។ ដូចគ្នាដែរ លោក Ben Lewis អ្នកជំនាញអាមេរិកតាមដានការចល័តទ័ពចិន បានពន្យល់ថានាវាមុជទឹកបាទសមុទ្រ អាចនឹងបង្កការខូចខាតខ្លាំង ដល់ការបញ្ជូនទ័ពថ្មើរជើងរបស់ចិនសម្រុកចូលមកលើតៃវ៉ាន់។
ដោយឡែក កាសែតរដ្ឋចិន Global Times បានចុះផ្សាយកាលពីថ្ងៃចន្ទទី២៦កញ្ញាថា ផែនការរបស់តៃវ៉ាន់ ដែលចង់ប្រើនាវាមុជទឹកបាតសមុទ្រ ដើម្បីរារាំងកងទ័ពចិននោះ វាគឺជា “ការរវើរវាយ” ប្រាកដណាស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ