លោកស្រី សៃ អ៊ីងវេន សន្យាថាតៃវ៉ាន់ នឹងនៅតែមានរបបប្រជាធិបតេយ្យរាប់ជំនាន់ទៅមុខទៀត
ក្នុងឱកាសថ្ងៃបុណ្យជាតិតៃវ៉ាន់ ទី១០តុលា២០២៣ លោកស្រីប្រធានាធិបតី សៃ អ៊ីងវេន បានប្រកាសថា លទ្ធិប្រជាធិបតេយ្យបានរីកដុះដាល ចាក់ឫសយ៉ាងជ្រៅក្នុងសង្គមតៃវ៉ាន់ បើទោះបីជាចិនដីគោក បានប្រឹងប្រែងដាក់សំពាធ រារាំងយ៉ាងណាក៏ដោយ។ លោកស្រីបានសន្យាថា ទោះរាប់ជំនាន់ទៅមុខទៀត គឺប្រជាជនតៃវ៉ាន់នឹងនៅតែមានសិទ្ធិសេរីភាព។ តែយ៉ាងណាលោកស្រីអះអាងថា តៃវ៉ាន់ចង់រក្សាសន្តិភាពជាមួយចិន។
ចុះផ្សាយនៅថ្ងៃ៖
ស្តាប់ - ០៣:០១
ប្រជាជនតៃវ៉ាន់ នឹងនៅតែជាប្រជាជនសេរី មានលទ្ធិប្រជាធិបតេយ្យ តរៀងទៅមុខជាច្រើនជំនាន់តទៅទៀត។ លោកស្រីបានបន្ថែមថា វាគឺជាកាតព្វកិច្ចរបស់លោកស្រី ដែលត្រូវតែការពារសង្គ្រោះអធិបតេយ្យភាពជាតិ ព្រមទាំងផ្នត់គំនិតសង្គម នៃប្រជាជនតៃវ៉ាន់ទាំង២៣លាននាក់ ដែលស្រលាញ់គាំទ្រសិទ្ធិសេរីភាព និងលទ្ធិប្រេជាធិបតេយ្យ។ លោកស្រី សៃ អ៊ីងវេន បានគូសបញ្ជាក់ថា ទោះបីប្រឈមនឹងការដាក់សំពាធ ទាំងនៅខាងក្នុង និងទាំងពីខាងក្រៅ តែលទ្ធិប្រជាធិបតេយ្យតៃវ៉ាន់ បានឈានកាន់តែរឹងមាំ ហើយធ្វើឲ្យប្រជាជាតិតៃវ៉ាន់ កាន់តែមានភាពអំណត់តស៊ូ។ លោកស្រីអះអាងថា ការពារលទ្ធិប្រជាធិបតេយ្យតៃវ៉ាន់ វាគឺជាការការពារតម្លៃសកល នៃលទ្ធិប្រជាធិបតេយ្យ។
តែទន្ទឹមគ្នានេះ នៅក្នុងសុន្ទរកថាដ៏សំខាន់នេះ លោកស្រី សៃ អ៊ីងវេន បានថ្លែងសារមួយ ក្នុងន័យមួយផ្សះផ្សារជាមួយចិនផងដែរ។ លោកស្រីបានអះអាងថា តៃវ៉ាន់គ្មានប្រាថ្នាអ្វី ក្រៅពីការរួមរស់ ដោយសុខសន្តិភាព និងប្រាស្រ័យទាក់ទងគ្នាទៅវិញទៅមក ដោយសេរី គ្មានការរាំងខ្ទប់ និងដោយគ្មានការភ័យខ្លាច ជាមួយប្រជាជនទាំងអស់ដែលស្ថិតនៅទាំងសងខាងច្រកសមុទ្រតៃវ៉ាន់។ លោកស្រីបន្តថា តៃវ៉ាន់ត្រៀមខ្លួនជានិច្ច ដោយឈរលើការសម្រុះសម្រួលឯកភាពជាតិ ដើម្បីឈានទៅរក្សា Statu quo និងសហការ អភិវឌ្ឍន៍ជាមួយភាគីចិនប៉េកាំង ដោយការគោរពគ្នាទៅវិញទៅមក និងរួមរស់ជាមួយគ្នាដោយសុខសន្តិភាព។ លោកស្រីប្រធានាធិបតីតៃវ៉ាន់ បានគូសបញ្ជាក់ថា ការរក្សាសន្តិភាព វាគឺជាជម្រើសតែមួយគត់។
សូមបញ្ជាក់ថា ប៉ុន្មានឆ្នាំចុងក្រោយនេះ ក្រោយការចូលកាន់អំណាចរបស់លោកស្រី សៃ អ៊ីងវេន នៅឆ្នាំ២០១៦ ចិនប៉េកាំង បានដាក់សំពាធយ៉ាងខ្លាំងលើតៃវ៉ាន់ និងបានគំរាមថាអាចនឹងប្រើកម្លាំងទ័ព ដើម្បីឈានទៅទាញភ្ជាប់តៃវ៉ាន់ មកក្នុងមហាគ្រួសារចិនតែមួយ។
គួរកត់សំគាល់ដែរថា លោកស្រីសៃ អ៊ីងវេន ដែលគេធ្លាប់ស្គាល់ថា គឺជាមេដឹកនាំតៃវ៉ាន់ ដែលមានទំនោររឹងរូសជាមួយចិនប៉េកាំងនោះ នឹងត្រូវចប់អាណត្តិនៅចុងឆ្នាំ២០២៣នេះហើយ ដោយលោកស្រីមិនអាចឈរឈ្មោះបានទៀតទេ។ ការបោះឆ្នោតអាណត្តិថ្មី នឹងត្រូវរៀបចំឡើងនៅខែមករា ឆ្នាំក្រោយ។ លោក Lai Ching-Te បច្ចុប្បន្នជាអនុប្រធានាធិបតី ស្និទ្ធនឹងលោកស្រី សៃ អ៊ីវវេន ត្រូវគេរំពឹងថាអាចមានសង្ឃឹមឈ្នះច្រើន ព្រោះលោកជាអ្នកឯករាជ្យនិយម តែឈរលើតថៈភាព។ ផ្ទុយទៅវិញ បេក្ខជនឈរឈ្មោះ២ទៀត គឺលោក Hou Yu-ih មកពីបក្សគួមីនតាង និងលោក Ko Wen-Je មកពីបក្សប្រជាជនតៃវ៉ាន់ ត្រូវគេស្គាល់ថាមានទំនោរចង់ ពង្រឹងទំនាក់ទំនងស្អិតរមួត រវាងចិននិងតៃវ៉ាន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ