លោកពូទីនទៅប៉េកាំងចូលរួម “វេទិកាផ្លូវមួយខ្សែក្រវ៉ាត់មួយ” និងឆ្លៀតឱកាសស្វែងរកការគាំទ្រ
លោកប្រធានាធិបតីរុស្ស៊ី វ្លាឌីមៀរ ពូទីន បានទៅដល់ទីក្រុងប៉េកាំងនៅព្រឹកថ្ងៃអង្គារ ទី១៧តុលា ដើម្បីចូលរួមក្នុងកម្មវិធី ខួប១០ឆ្នាំនៃគម្រោងផ្លូវមួយខ្សែក្រវ៉ាត់មួយរបស់ចិន ដែលមានថ្នាក់ដឹកនាំប្រទេសជាច្រើនចូលរួម។ នេះគឺជាលើកទី២តែប៉ុណ្ណោះ ដែលលោកពូទីនធ្វើដំណើរចេញក្រៅប្រទេស បន្ទាប់ពីសង្គ្រាមនៅអ៊ុយក្រែនបានផ្ទុះឡើងជាង១ឆ្នាំមកនេះ។ តុលាការព្រហ្មទណ្ឌអន្តរជាតិ បានចេញដីកាចាប់ខ្លួនលោកពូទីន ដែលត្រូវគេចោទពីបទឧក្រិដ្ឋកម្មសង្គ្រាម។
ចុះផ្សាយនៅថ្ងៃ៖
ស្តាប់ - ០២:៤៩
នៅព្រលានយន្តហោះទីក្រុងប៉េកាំង លោកពូទីន ត្រូវបានទទួលស្វាគមន៍ដោយលោក វ៉ាង វេនតៅ រដ្ឋមន្ត្រីក្រសួងពាណិជ្ជកម្មចិន។ ដល់ប៉េកាំងភ្លាម លោកពូទីនបានចាប់ផ្តើមជួបប្រជុំទ្វេភាគី ជាមួយថ្នាក់ដឹកនាំប្រទេសជាច្រើន ក្នុងនោះមានលោកប្រធានាធិបតីវៀតណាម លោកនាយករដ្ឋមន្ត្រីថៃ និងលោកនាយករដ្ឋមន្ត្រីហុងគ្រីផងដែរ។
តាមការផ្សាយរបស់បណ្តាញព័ត៌មានរុស្ស៊ី គឺលោកពូទីននឹងជួបប្រជុំទ្វេភាគី ជាមួយលោកប្រធានាធិបតីចិន ស៊ី ជីនពីង នៅថ្ងៃពុធទី១៨តុលា។ លោក Iouri Ouchakov ទីប្រឹក្សាកិច្ចការបរទេសរបស់លោកពូទីន បានអះអាងប្រាប់អ្នកកាសែតថា លោកពូទីន និងលោកស៊ី ជីនពីង នឹងជជែកគ្នាដោយត្រង់ទៅត្រង់មក និងដោយមិត្តភាព ទាក់ទិននឹងបញ្ហានបន្ទាន់ទាំងឡាយ នៅក្នុងទំនាក់ទំនងជាក់ស្តែងរវាងប្រទេសទាំង២ ព្រមទាំងបញ្ហាក្នុងក្របខណ្ឌអន្តរជាតិផងដែរ។
គួររំលឹកថា កាលពីប៉ុន្មានថ្ងៃ មុនពេលរុស្ស៊ីលើកទ័ពចូលឈ្លានពានអ៊ុយក្រែន លោកពូទីន និងលោកស៊ី ជីនពីង បានប្រកាសជាមួយគ្នា ថាមិត្តភាពរវាងចិននិងរុស្ស៊ី គឺជា “មិត្តភាពដែលគ្មានទីបំផុត” ។ ប្រមាណជាង១ឆ្នាំនៃសង្គ្រាមនៅអ៊ុយក្រែន គេបានសង្កេតឃើញថា គោលជំហរចិនពិតជានៅពីក្រោយ និងជួយគាំទ្ររុស្ស៊ីយ៉ាងប្រាកដ បើទោះបីជាត្រូវរងការរិះគន់ ពីសំណាក់បណ្តាប្រទេសលោកខាងលិចក៏ដោយ។ ១ថ្ងៃមុននឹងទៅដល់ប៉េកាំង លោកពូទីនបានផ្តល់បទសម្ភាសន៍ឲ្យអ្នកកាសែតចិន ដែលក្នុងបទសម្ភាសន៍នោះ លោកបានអះអាងថា លោកមានសុទិដ្ឋិនិយមខ្លាំងណាស់ ចំពោះទំនាក់ទំនងពាណិជ្ជកម្ម រវាងចិននិងរុស្ស៊ី។
គួរបញ្ជាក់ដែរថា ដោយសារតែទណ្ឌកម្មអន្តរជាតិ រុស្ស៊ីកំពុងតែត្រូវការចិនជាខ្លាំង។ លោក Bjorn Alexander Duben សាស្ត្រាចារ្យជំនាញទំនាក់ទំនងអន្តរជាតិ នៅសកលវិទ្យាល័យ Jilin ប្រទេសចិន បានពន្យល់ថា បច្ចុប្បន្ននេះ រុស្ស៊ីកំពុងស្ថិតក្នុងស្ថានការណ៍មួយ ដែលពឹងផ្អែកយ៉ាងខ្លាំងទៅលើចិន ជាពិសេសនៅលើវិស័យសេដ្ឋកិច្ច។ វត្តមានរបស់លោកពូទីននៅប៉េកាំងនាពេលនេះ ក៏គឺជាឱកាសទទួលបានការរាក់ទាក់ និងគាំទ្រពីបណ្តាប្រទេសផ្សេងទៀតដែរ ខណៈរុស្ស៊ីកាន់តែឯកោខ្លាំងនៅលើឆាកអន្តរជាតិ។ យ៉ាងណាក៏ដោយ យោងតាមការវិភាគរបស់លោក Alexander Gabuev ប្រធានមជ្ឈមណ្ឌល Carnegie Russia Eurasia គឺថារុស្ស៊ីដឹងខ្លួនច្បាស់ ថាចិនមិនអាចចេញមុខចេញមាត់ខ្លាំង ប្រកាសគម្រោងផែនការសហការធំដំណាមួយ ជាមួយរុស្ស៊ីក្នុងពេលនេះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ