ដើម្បីសន្តិសុខជាតិ ប្រទេសចិនបានរឹតបន្តឹងបន្ថែមលើការនាំចេញរ៉ែយុទ្ធសាស្រ្ត
នៅក្នុងប្រទេសចិន រដ្ឋាភិបាលបានប្រកាសក្នុងថ្ងៃសុក្រ ទី២០ តុលាពីការរឹតបន្តឹងបន្ថែមទៀតលើការនាំចេញរ៉ែក្រាហ៊្វ្រីត។ វិធានការថ្មីបន្ថែមនេះត្រូវបានក្រសួងពាណិជ្ជកម្មលើកយកហេតុផលទៅពន្យល់ថា គឺដើម្បីរក្សាសន្តិសុខ និងផលប្រយោជន៍ជាតិ។ តែទន្ទឹមនឹងហេតុផលមួយនេះ ចិនក៏ចង់ឆ្លើយបកទៅនឹងសហរដ្ឋអាមេរិកវិញដែរ។
ចុះផ្សាយនៅថ្ងៃ៖
ស្តាប់ - ០២:០៩
ការប្រកាសរបស់ចិនបានធ្លាក់មកក្រោយពីរដ្ឋបាលអាមេរិកបានបង្ហាញចេញក្នុងសប្តាហ៍នេះនូវវិធានការថ្មីមួយចំនួនដើម្បីរឹតបន្តឹងការនាំចេញសេមីកុងឌុចទ័រ និងម៉ាស៊ីនសម្រាប់ផលិតសេមីកុងឌុចទ័រទៅចិន។ តាមពិត អាមេរិកព្យាយាមតាំងពីច្រើនខែដើម្បីរារាំងចិនមិនឲ្យទទួលបានបច្ចេកវិទ្យាទំនើប។ ការរារាំងនេះត្រូវបានចិនប្រឆាំងដោយចាត់ទុកជាទង្វើខុសនឹងច្បាប់ពាណិជ្ជកម្មអន្តរជាតិ។ តែទន្ទឹមគ្នានេះ កាយវិការរបស់ក្រុងវ៉ាស៊ីនតោនក៏មិនបានធ្វើឲ្យក្រុងប៉េកាំងឈរឱបដៃនៅស្ងៀមដែរ។ ចិនបានប្រកាសក្នុងខែកក្កដាថា ការនាំចេញផលិតផលមួយចំនួនដែលមានផ្ទុកសារធាតុ Gallium និង Germanium នឹងត្រូវទទួលការត្រួតពិនិត្យតឹងតែង។ គួរបញ្ជាក់ថា Gallium និង Germanium ជាវត្ថុធាតុដើមសំខាន់ដែលគេប្រើសម្រាប់ផលិតបន្ទះឈីប។
ចំណែកវិធានការថ្មីបន្ថែមពេលនេះ គឺរឹតបន្តឹងការនាំចេញរ៉ែក្រាហ៊្វ្រីតដែលគេប្រើដើម្បីផលិតថ្ម Lithium-ion សម្រាប់ទូរស័ព្ទដៃ និងអាគុយ Lithium-ion សម្រាប់រថយន្តអគ្គិសនី។ តាមវិទ្យាសា្ថនសិក្សាភូគព្ភសាស្រ្តអាមេរិក ផលិតកម្មរ៉ែក្រាហ្រ្វ៊ីតក្នុងលោកចំនួន ៦៥% បានផលិតនៅចិន។ ចំណែកតម្រូវការរ៉ែក្រាហ៊្រ្វីតក្នុងលោកនឹងត្រូវកើនឡើងដោយសារមានកំណើនតម្រូវការរថយន្តអគ្គិសនី និងអាគុយ។ ចិនតាមរយៈក្រសួងពាណិជ្ជកម្មបានលើកយកហេតុផលទៅពន្យល់ថា ចំណាត់ការរបស់ខ្លួនជារឿងចាំបាច់ក្នុងការរក្សាសន្តិសុខ និងផលប្រយោជន៍ជាតិ។ ក្រសួងពាណិជ្ជកម្មចិនបានធានាបន្ថែមថា អ្វីដែលចិនបានធ្វើនេះមិនបានសំដៅទៅលើប្រទេស ឬតំបន់ណាមួយទេ។
តែទោះជាមានការធានាដូចនេះក៏ដោយក៏គេដឹងថា ចិនចង់វាយបកដាក់អាមេរិកវិញ។ គួរបញ្ជាក់ថានារយៈពេលប៉ុន្មានឆ្នាំចុងក្រោយនេះ ពាណិជ្ជកម្ម និងបច្ចេកវិទ្យាជាចំណុចស្នូលនៃភាពតានតឹងរវាងទីក្រុងប៉េកាំង និងទីក្រុងវ៉ាស៊ីនតោន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ