លោកនាយករដ្ឋមន្ត្រីអូស្ត្រាលី សន្យាថានឹង “ធ្វើការក្នុងន័យស្ថាបនា” ជាមួយចិន
លោកអង់តូនី អាល់បានេស នាយករដ្ឋមន្ត្រីអូស្ត្រាលី បានចាប់ផ្តើមទស្សនកិច្ចរយៈពេល៤ថ្ងៃនៅចិន កាលពីថ្ងៃសៅរ៍ទី៤វិច្ឆិកា។ លោកគឺជាថ្នាក់ដឹកនាំអូស្ត្រាលីដំបូងគេហើយ ដែលបានឈានជើងទៅដល់ចិន បន្ទាប់ពីប្រទេសទាំង២នេះ មានជម្លោះការទូតនឹងគ្នា គិតចាប់ពីឆ្នាំ២០១៦មក។ រដ្ឋាភិបាលថ្មីរបស់លោក អង់តូនី អាល់បានេស ហាក់កំពុងតែប្រឹងប្រែងស្តារទំនាក់ទំនងការទូត និងពាណិជ្ជកម្មឡើងវិញ ជាមួយចិន។
ចុះផ្សាយនៅថ្ងៃ៖
ស្តាប់ - ០៣:១០
ទៅដល់ទីក្រុងសៀងហៃ លោកអង់តូនី អាល់បានេស បានចូលរួមក្នុងកម្មវិធីបើកសម្ពោធពិព័រណ៍ពាណិជ្ជកម្ម ទំនិញនាំចូលមកកាន់ប្រទេសចិន។ លោកបានថ្លែងសុន្ទរកថាជាកិត្តិយស បើកកម្មវិធីនេះ ដែលលោកបានលើកឡើងថា រដ្ឋាភិបាលអូស្ត្រាលីដែលលោកដឹកនាំ នឹងបន្តប្រឹងប្រែងធ្វើការងារ ក្នុងន័យស្ថាបនា ជាមួយភាគីចិន។ ផ្អែកតាមប្រភពពីក្រសួងការបរទេសចិន លោកនាយករដ្ឋមន្ត្រីអូស្ត្រាលី នឹងបន្តដំណើរទៅកាន់ទីក្រុងប៉េកាំង ដើម្បីជួបប្រជុំជាមួយថ្នាក់ដឹកនាំចិន និយាយលំអិតអំពីការការស្តារទំនាក់ទំនងទ្វេរភាគី។
លោកវ៉ាង វេនពីន អ្នកនាំពាក្យក្រសួងការបរទេសចិន បានប្រាប់អ្នកកាសែតថា ចិនបានត្រៀមខ្លួនជាស្រេចហើយ ក្នុងការធ្វើការ ជាមួយអូស្ត្រាលី ដើម្បីយកឱកាសនៃទស្សនកិច្ចនេះ ជាពេលវេលាពង្រឹងពង្រីកទំនាក់អំនង កសាងទំនុកចិត្តលើគ្នាទៅវិញទៅមក ពង្រីកសហប្រតិបត្តិការ និងធ្វើឲ្យមិត្តភាពរវាងប្រទេសទាំង២កាន់តែស៊ីជម្រៅ។
សូមរំលឹកថា ទំនាក់ទំនងរវាងចិននិងអូស្ត្រាលី បានធ្លាក់ចុះដុនដាបខ្លាំង ដោយសារអតីតរដ្ឋាភិបាលស្តាំអភិរក្សនិយមអូស្ត្រាលី ចោទចិនថាបានប្រើប្រាស់ប្រាក់ ទិញទឹកចិត្តមន្ត្រីរដ្ឋាភិបាលអូស្ត្រាលី ឲ្យបម្រើផលមហិច្ឆតាសេដ្ឋកិច្ចនិងនយោបាយចិន។ វិបត្តិកាន់តែធ្ងន់ កាលពីចុងឆ្នាំ២០១៩ នៅពេលរដ្ឋាភិបាលអូស្ត្រាលី បានទាមទារឲ្យមានការស៊ើបអង្កេតជាលក្ខណៈអន្តរជាតិ ស្តីពីមេរោគជំងឺកូវីដ១៩ ដែលបានផ្ទុះឡើងនៅទីក្រុងវូហាន។ ជាការសងសិកវិញ ចិនបានដាក់ពន្ធលើទំនិញអូស្ត្រាលីមួយចំនួន ដូចជាស្រូវសាឡី សាច់គោ និងស្រាទំពាំងបាយជូរជាដើម។ បន្ថែមពីនេះទៀត ចិនបានឈប់ទិញធ្យូងថ្មអូស្ត្រាលីទៀត ដែលធ្វើឲ្យប្រទេសនេះ ខាតបង់ប្រាក់ចំណូលមិនតិចពាន់លានដុល្លារទេ។
ក្រោយការចូលមកកាន់អំណាច នៃរដ្ឋាភិបាលបក្សពលករ ដឹកនាំដោយលោកនាយករដ្ឋមន្ត្រី អង់តូនី អាល់បានេស គេសង្កេតឃើញថា ទំនាក់ទំនងរវាងចិននិងអូស្ត្រាលីហាក់បានចាប់ផ្តើមប្រសើរបន្តិចម្តងៗ ចាប់ពីខែឧសភា ឆ្នាំ២០២២មក។ ភាគីទាំង២បានចាប់ផ្តើមដករនាំងពន្ធដា ដែលរារាំងទំនាក់ទំនងពាណិជ្ជកម្ម។
នៅលើវិស័យការទូតវិញ គេសង្កេតឃើញថាមានភាពល្អប្រសើរដែរ ដោយកាលពីដើមខែតុលាកន្លងទៅ ចិនបានយល់ព្រមដោះលែងអ្នកកាសែតជនជាតិអូស្ត្រាលីដើមកំណើតចិន ឈ្មោះ Cheng Lei ដែលជាប់ឃុំនៅចិន៣ឆ្នាំមកហើយ ពីបទធ្វើចារកិច្ចសម្ងាត់ប្រឆាំងចិន។ ការដោះលែងនេះ បានផ្តល់ក្តីសង្ឃឹម ដល់ក្រុមគ្រួសារអ្នកនិពន្ធជនជាតិអូស្ត្រាលីដើមកំណើតចិនម្នាក់ ឈ្មោះ Yang Jun ដែលត្រូវចិនចាប់ដាក់ឃុំ តាំងតែពីឆ្នាំ២០១៩។ យ៉ាងណាមិញ ក្រុមគ្រួសារអ្នកនិពន្ធរូបនេះ បានទទូចអង្វរសុំឲ្យលោកនាយករដ្ឋមន្ត្រី អង់តូនី អាល់បានេស និយាយពីបញ្ហានេះជាមួយភាគីចិនផង នៅពេលលោកទៅប៉េកាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ