សិង្ហបុរី៖ លោកលី សៀនឡុង ប្រកាសថានឹងប្រគល់អំណាចគ្រប់គ្រងបក្ស ទៅឲ្យមនុស្សជំនាន់ថ្មី
លោក លី សៀនឡុង នាយករដ្ឋមន្ត្រីសិង្ហបុរី បានប្រកាសនៅថ្ងៃអាទិត្យទី៥វិច្ឆិកាថា លោកនឹងផ្ទេរអំណាចគ្រប់គ្រងគណបក្ស ទៅឲ្យមនុស្សជំនាន់ថ្មី ដើម្បីឈានទៅយកជ័យជំនះនៅក្នុងការបោះឆ្នោតអាណត្តិក្រោយ។ ការបោះឆ្នោត ដែលគ្រោងធ្វើនៅខែវិច្ឆិកា ឆ្នាំ២០២៥។ ក្រុមការងារជំនាន់ថ្មីនេះ នឹងដឹកនាំដោយលោក Lawrence Wong អាយុ អាយុ៥០ឆ្នាំ បច្ចុប្បន្នជាឧបនាយករដ្ឋមន្ត្រី និងរដ្ឋមន្ត្រីក្រសួងហិរញ្ញវត្ថុសិង្ហបុរី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៥
ថ្លែងនៅក្នុងកិច្ចប្រជុំប្រចាំឆ្នាំ របស់គណបក្ស People’s Action Party (PAP) លោកលី សៀនឡុងបានលើកឡើងថា ក្រុមការងាររបស់លោក Lawrence Wong បានទទួលបាននូវបទពិសោធន៍ការងារជោគជ័យដ៏ច្រើន នៅក្នុងអំឡុងពេលវិបត្តិកូវីដ១៩។ ដូច្នេះ គ្មានហេតុផលអ្វីដែលត្រូវបង្អែរបង្អង់ ពន្យាពេលនៃការផ្ទេរអំណាចទៀតនោះទេ។ លោកលី សៀនឡុង បានបន្ថែមទៀតថា លោកនឹងត្រៀមខ្លួនជាប្រចាំ ចាំជួយនាយករដ្ឋមន្ត្រីនៃរដ្ឋាភិបាលថ្មី។
សូមរំលឹកថា លោក លី សៀនឡុង ដែលបច្ចុប្បន្នមានអាយុ៧១ឆ្នាំ ធ្លាប់បានសន្យាថា លោកនឹងផ្ទេរអំណាចទៅឲ្យមនុស្សជំនាន់ថ្មី នៅពេលលោកចូលអាយុ៧០ឆ្នាំ។ ក៏ប៉ុន្តែកាលពីឆ្នាំ២០២២ ដោយសារតែវិបត្តិជម្ងឺកូវីដ១៩ បានធ្វើឲ្យលោកសម្រេចចិត្តបន្តគ្រប់គ្រងប្រទេសបន្តទៀត ដោយខ្លាចក្រែងមនុស្សថ្មីគ្មានបទពិសោធន៍ ធ្វើឲ្យប្រទេសជួបបញ្ហាពិបាក។
ថ្លែងនៅចំពោះមុខសមាជិកបក្សប្រមាណជាង១ពាន់នាក់ នៅថ្ងៃទី៥វិច្ឆិកានេះ លោកលី សៀនឡុង បានអះអាងថា លោកនឹងប្រគល់ការងារទៅឲ្យលោក Lawrence Wong ដើម្បីដឹកនាំគណបក្សឈានទៅយកជ័យជំនះ ក្នុងការបោះឆ្នោតអាណត្តិក្រោយ។ លោកបន្ថែមថា បើអ្វីៗរលូនដូចការរំពឹងទុក គឺលោកនឹងផ្ទេរអំណាចជាផ្លូវការ នៅថ្ងៃបុណ្យខួបលើកទី៧០ នៃគណបក្ស People’s Action Party នៅខែវិច្ឆិកាឆ្នាំ២០២៤។
គួរបញ្ជាក់ថា ប្រសិនបើលោក Lawrence Wong នឹងឡើងមកដឹកនាំប្រទេសមែន នោះគឺជាលើកទី២ហើយ សម្រាប់សិង្ហបុរី ដែលមាននាយករដ្ឋមន្ត្រី មិនមែនជាមនុស្សក្នុងវង់ត្រកូលលី។ លោកលី សៀនឡុង ដែលបានចូលកាន់អំណាចនៅឆ្នាំ២០០៤ បានលើកឡើងថា “ប៉ុន្មានឆ្នាំមកនេះ គណបក្ស People’s Action Party បានធ្វើកំណែទម្រង់ស៊ីជំរៅច្រើនណាស់ ដើម្បីឆ្លើយតបទៅនឹងឧបសគ្គ ក៏ដូចជាការលំបាកទាំងឡាយ ដែលបានចោទឡើង ដើម្បីឈានទៅរក្សាប្រទេសឲ្យមានស្ថិរភាពនិងសន្តិសុខ។
គួរកត់សំគាល់ដែរថា ប៉ុន្មានឆ្នាំចុងក្រោយនេះ បានរឿងអាស្រូវខ្លះៗ បានផ្ទុះឡើងធ្វើរញ្ជួយដល់ក្បាលម៉ាស៊ីននយោបាយសិង្ហបុរី ដែលគេធ្លាប់តែអួតសរសើរថា គ្មានអំពើពុករលួយ។ រឿងអាស្រូវពុករលួយ មានពាក់ព័ន្ធនឹងលោករដ្ឋមន្ត្រីក្រសួងដឹកជញ្ជូន ហើយបានថែមទាំងធ្វើឲ្យសមាជិកសភា២នាក់ នៃគណបក្សកាន់អំណាច ត្រូវបង្ខំចិត្តលាលែងពីមុខងារទៀតផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ