ចិន និងអូស្រ្តាលី យល់ស្របគ្នាបំភ្លេចចោល នូវបញ្ហាក្នុងអតីតកាល
លោកប្រធានាធិបតីចិន ស៊ី ជីនពីង បានទទួលជួបជាមួយលោកនាយករដ្ឋមន្ត្រីអូស្ត្រាលី អង់តូនី អាល់បានេស នៅទីក្រុងប៉េកាំង នៅថ្ងៃចន្ទទី៦វិច្ឆិកា។ ទស្សនកិច្ចនៅចិន របស់លោកនាយករដ្ឋមន្ត្រីអូស្ត្រាលី គឺជាកាយវិការចង់ស្តារទំនាក់ទំនងឲ្យល្អឡើងវិញជាមួយចិន បន្ទាប់ពីបានរកាំរកូសមានវិវាទការទូត និងពាណិជ្ជកម្មនឹងគ្នាតាំងពីឆ្នាំ២០១៦មក។ ក្នុងពេលជួបគ្នា លោកស៊ី ជីនពីង និងលោកអង់តូនី អាល់បានេស បានសន្យារួមគ្នាថា នឹងបំភ្លេចចោលបញ្ហាក្នុងអតីតកាល ហើយចាប់ផ្តើមបើកទំព័រថ្មីនៃចំណងសហប្រតិបត្តិការ។
ចុះផ្សាយនៅថ្ងៃ៖
ស្តាប់ - ០៣:៤៤
លោកស៊ី ជីនពីង បានថ្លែងទៅកាន់លោកអង់តូនី អាល់បានេស ថា “ទំនាក់ទំនងដែលស្អាតបរិសុទ្ធ និងមានភាពនឹងនជាមួយអូស្ត្រាលី និងផ្តល់អត្ថប្រយោជន៍ ដល់ប្រទេសទាំងសងខាង។ ចំណែកលោក នាយករដ្ឋមន្ត្រីអូស្រ្តាលី បានថ្លែងទៅវិញថា ទំនាក់ទំនងពាណិជ្ជកម្មដែលបើកចំហរទូលាយ នឹងផ្តល់អត្ថប្រយោជន៍ដល់ប្រទេសទាំង២។
គួរបញ្ជាក់ថា ទំនាក់ទំនងរវាងអូស្ត្រាលីនិងចិន បានចុះដុនដាបជាបន្តបន្ទាប់ ប្រមាណជិត១០ឆ្នាំចុងក្រោយនេះ។ ក្រៅពីបានចោទថាចិនមានចេតនាប្រើឥទ្ធិពលអាក្រក់ មកលើមន្ត្រីរដ្ឋាភិបាលអូស្រ្តាលី អូស្រ្តាលីបានបណ្តេញក្រុមហ៊ុនHuawei ឲ្យចេញពីទីផ្សារបណ្តញ5G នៅអូស្រ្តាលី។ បញ្ហាកាន់តែធ្ងន់នៅពេលអតីតរដ្ឋាភិបាលអូស្រ្តាលីមុន ទាមទារឲ្យស៊ើបអង្កេតជាលក្ខណៈអន្តរជាតិ ស្តីពីប្រភពមេរោគជំងឺកូវីដ១៩ ដែលបានផ្ទុះឡើងនៅក្រុងវូហាន។ ចិនបានឆ្លើយតបវិញ ដោយការហាមឃាត់ និងដំឡើងពន្ធនាំចូល លើទំនិញរបស់អូស្ត្រាលី ដែលមានដូចជាស្រូវសាឡី សាច់គោ ស្រាទំពាំងបាយជូរ និងធ្យូងថ្ម ធ្វើឲ្យអូស្ត្រាលីខាតបង់ប្រាក់ច្រើនពាន់លានដុល្លារ។
ក្រោយការចូលកាន់អំណាច របស់លោកអង់តូនី អាល់បានេស កាលពីខែឧសភាឆ្នាំ២០២២ រដ្ឋាភិបាលអូស្ត្រាលី បានព្យាយាមច្រើន ក្នុងការស្តារទំនាក់ទំនងជាមួយចិន។ លោក អាល់បានេស បានជួបនិយាយជាមួយលោកស៊ី ជីនពីង ក្នុងឱកាសជំនួបកំពូលG20 នៅឥណ្ឌូណេស៊ី កាលពីខែវិច្ឆិកាឆ្នាំមុន។ ក្រោយជំនួបនេះ ចិនបានយល់ព្រមដកចេញខ្លះនូវរនាំងពាណិជ្ជកម្ម ដោយបានព្រមទិញធ្យូងថ្មអូស្រ្តាលីវិញ បន្ធូរពន្ធលើស្រូវសាឡី និងស្រាទំពាំងបាយជូរអូស្ត្រាលី។
ថ្វីបើអ្វីៗហាក់ឈានទៅល្អប្រសើរ នៅលើវិស័យជំនួញពាណិជ្ជកម្ម តែបញ្ហានៅតែមានលើវិស័យផ្សេងទៀត រវាងចិននិងអូស្ត្រាលី ជាក់ស្តែងវិស័យភូមិសាស្ត្រនយោបាយ។ សកម្មភាពវាតទីរបស់ចិន នៅក្នុងតំបន់សមុទ្រចិនខាងត្បូង និងនៅតាមប្រទេសកូនកោះតំបន់ប៉ាស៊ីហ្វិកខាងត្បូង គឺជាការបារម្ភធំរបស់អូស្ត្រាលី។ សម្រាប់អូស្ត្រាលី តំបន់សមុទ្រចិនខាងត្បូង គឺជាច្រកផ្លូវនាំចេញទំនិញរបស់ខ្លួន ឆ្ពោះទៅកាន់ជប៉ុន តៃវ៉ាន់ និងកូរ៉េខាងត្បូង។ ដោយឡែក ចិនវិញ បានបង្ហាញការមិនពេញចិត្តខ្លាំង ដែលឃើញអូស្ត្រាលីចូលរួមក្នុងសម្ព័ន្ធភាព AUKUS ជាមួយអាមេរិកនិងអង់គ្លេស។
ថ្លែងប្រាប់អ្នកកាសែត នៅថ្ងៃចន្ទ ក្រោយចូលជួបលោកប្រធានាធិបតីចិន លោកអង់តូនី អាល់បានេស បានលើកឡើងថា លោកជឿថាមានចំណុចវិជ្ជមានច្រើន ទាក់ទិននឹងការល្អប្រសើរឡើង ក្នុងទំនាក់ទំនងរវាងចិននិងអូស្ត្រាលី។ លោកបានគូសបញ្ជាក់ទៀតថា អូស្ត្រាលីត្រូវតែសហការជាមួយចិន នៅត្រង់វិស័យណាដែលអាចសហការបាន។ តែចំណុចណាដែលអូស្រ្តាលី ត្រូវជំទាស់នឹងចិន គឺអូស្ត្រាលីមិនខ្លាចនឹងធ្វើទេ ដើម្បីការពារផលប្រយោជន៍ជាតិ។
ផ្អែកតាមការវិភាគរបស់លោក Yun Sun អ្នកស្រាវជ្រាវនៅ Stimson Center ក្រុងវ៉ាស៊ីនតោន គឺតាមរយៈទស្សនកិច្ចទៅចិន របស់លោកអង់តូនី អាល់បានេស នាពេលនេះ ភាគីចិនចង់ឲ្យគ្រប់គ្នាឃើញថា អូស្ត្រាលីដឹងខុស ហើយសុខចិត្តឱនលំទោនដាក់ចិន ដើម្បីស្តារទំនាក់ទំនងសេដ្ឋកិច្ចជាមួយមហាយក្សចិនឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ