អាមេរិកនិងកូរ៉េខាងត្បូងថ្កោលទោសការបញ្ជូនអាវុធពីព្យុងយ៉ាងទៅម៉ូស្គូ
ក្នុងឱកាសបំពេញទស្សនកិច្ចនៅទីក្រុងសេអ៊ូល រដ្ឋមន្ត្រីការបរទេសអាមេរិក លោក អង់តូនី ប្លីងកិន និងលោក យ៉ូន ស៊ុកយោល ប្រធានាធិបតីកូរ៉េខាងត្បូង បានថ្លែងថ្កោលទោសរួមគ្នាការបញ្ជូនអាវុធរបស់កូរ៉េខាងជើងទៅម៉ូស្គូ ដើម្បីគាំទ្ររុស្ស៊ីក្នុងសង្គ្រាមជាមួយអ៊ុយក្រែន។
ចុះផ្សាយនៅថ្ងៃ៖
ស្តាប់ - ០២:១២
បន្ទាប់ពីបានចូលរួមក្នុងជំនួបប្រជុំថ្នាក់រដ្ឋមន្ត្រីការបរទេសនៃក្រុមហ្សេ៧នៅទីក្រុងតូក្យូរួច លោកប្រមុខការទូតអាមេរិកបានអញ្ជើញទៅដល់ក្រុងសេអ៊ូលនៅថ្ងៃព្រហស្បតិ៍ទី ៩វិច្ឆិកា២០៣ ជាលើកទីមួយ តាំងពីលោក យ៉ូន ស៊ុកយោល ឡើងកាន់តំណែងជាប្រធានាធិបតីកូរ៉េខាងត្បូងមក។
នៅក្នុងសេចក្តីថ្លែងការណ៍ក្រោយជំនួបពិភាក្សាគ្នារួច ប្រមុខការទូតអាមេរិកនិងប្រមុខដឹកនាំកូរ៉េខាងត្បូង បានប្រកាសថ្កោលទោសការផ្គត់ផ្គង់សម្ភារៈបរិក្ខារយោធានិងគ្រាប់រំសេវ របស់កូរ៉េខាងជើងទៅឱ្យសហព័ន្ធរុស្ស៊ី ដើម្បីអាចបន្តធ្វើសង្គ្រាមជាមួយអ៊ុយក្រែន។ សេអ៊ូលយល់ថា ក្រោយទស្សនកិច្ចរបស់លោកគីមជុងអ៊ុននៅរុស្ស៊ី កូរ៉េខាងជើងទំនងជាបានបញ្ជូនគ្រាប់កាំភ្លើងធំចំនួន១លានគ្រាប់ជាថ្នូរនឹងការផ្តល់ចំណេះធ្វើក្នុងវិស័យបច្ចេកវិទ្យាអវកាស។ សម្រាប់អ្នកទទួលខុសត្រូវអាមេរិក ការពង្រីកកិច្ចសហប្រតិបត្តិការយោធារវាងម៉ូស្គូនិងព្យុងយ៉ាង កាន់តែខ្លាំងឡើង ប៉ះពាល់ដល់សន្តិសុខក្នុងតំបន់ណាស់។ លោក ប្លីងកិន បានសន្យាថាអាមេរិកនឹងបន្តដាក់សម្ពាធ ដើម្បីធ្វើឱ្យយ៉ាងណាឱ្យមានការគោរពសេចក្តីសម្រេចចិត្តរបស់ក្រុមប្រឹក្សាសន្តិសុខអង្គការសហប្រជាជាតិ និងគោរពសណ្តាប់ធ្នាប់ពិភពលោក ដោយមិនរីកសាយភាយអាវុធនុយក្លេអ៊ែរ។ ប៉ុន្តែម៉ូស្គូបានឆ្លើយតបថាអំណះអំណាងខាងលើគ្មានមូលដ្ឋានច្បាស់លាស់ទេ។
ក្រៅអំពីអរគុណកូរ៉េខាងត្បូងដែលប្តេជ្ញាជួយអ៊ុយក្រែន លោកអង់តូនីប្លីងកិន ក៏បានថ្លែងអំណរគុណលោកប្រធានាធិបតីកូរ៉េខាងត្បូងដែលបានសន្យាផ្តល់ជំនួយមនុស្សធម៌ដល់ពលរដ្ឋនៅតំបន់ហ្កាហ្សា។
ក្រោយទស្សនកិច្ចរបស់លោកប្លីងកិន សេអ៊ូលនឹងទទួលស្វាគមន៍រដ្ឋមន្ត្រីការពារជាតិអាមេរិក លោក ឡូយ៍អូស្ទីន ដែលមានកម្មវត្ថុពង្រឹងពង្រីកកិច្ចសហប្រតិបត្តិការយោធារវាងប្រទេសទាំងពីរ។ កាលពីខែតុលា យន្តហោះចម្បាំងអាមេរិកB-៥២ ដែលមានលទ្ធភាពពាំគ្រាប់បែកនុយក្លេអ៊ែរ បានចេញធ្វើបេសកកម្មដ៏កម្រមួយនៅកូរ៉េខាងត្បូង។ សហរដ្ឋអាមេរិក៏កំពុងស្វះស្វែងពង្រឹងសម្ព័ន្ធភាពយោធាត្រីភាគីអាមេរិកជប៉ុនកូរ៉េខាងត្បូងទៀត ក្នុងក្របខ័ណ្ឌនៃការខិតខំបង្ហាញវត្តមាននៅអាស៊ីប៉ាស៊ីហ្វិកប្រឈមនឹងកូរ៉េខាងជើងផង ប្រឈមនឹងការវាតទីរបស់ចិនផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ