ចិនបើកអង្កេតក្រុមហ៊ុនហិរញ្ញវត្ថុឯកជនដ៏ធំមួយដែលក្ស័យធនលង់ក្នុងបំណុលវណ្ឌក
ប៉ូលិសប៉េកាំងបានប្រកាសនៅល្ងាចថ្ងៃសៅរ៍ទី ២៥វិច្ឆិកាបើកអង្កេតលើក្រុមហ៊ុនហិរញ្ញវត្ថុឯកជនដ៏ធំបំផុតមួយឈ្មោះZhongzhi ដែលធ្លាក់ក្នុងបំណុលនិងប្រកាសក្ស័យធន។ ការដួលរលំនៃក្រុមហ៊ុននេះអាចជាហានិភ័យឆ្លងរាលដាលដល់ប្រព័ន្ធហិរញ្ញវត្ថុចិនទាំងមូល។
ចុះផ្សាយនៅថ្ងៃ៖
ស្តាប់ - ០២:១០
សាធារណជនទូទៅមិនសូវស្គាល់ទេ ប៉ុន្តែZhongzhi ជាសម្ព័ន្ធក្រុមហ៊ុនហិរញ្ញវត្ថុដ៏ធំ មានបណ្តាញរណបជាច្រើន និងជាតួអង្គដ៏សំខាន់ជាងគេបំផុតមួយរបស់ទីផ្សារហិរញ្ញវត្ថុ។ ធនាគារពាណិជ្ជNomura ប៉ាន់ស្មានថាក្រុមហ៊ុនZhongzhiគ្រប់គ្រងម្នាក់ឯងភាគហ៊ុនចំនួនដល់ទៅជាង១២៨ពាន់លានអឺរ៉ូ។ ក្រុមហ៊ុនធំៗ ព្រមទាំងអ្នកមានៗច្រើនណាស់មកយកលុយមកផ្ញើនឹងក្រុមហិរញ្ញវត្ថុមួយនេះ។ កន្លងមកនិងអស់រយៈពេលច្រើនមកនេះ ក្រុមហ៊ុនសំណង់ អលចនវត្ថុ សហគ្រាសធំនានាតែងតែទៅស្វែងរកហិរញ្ញវត្ថុពីក្រុមហ៊ុន ដូចយ៉ាងZhongzhi សម្រាប់វិនិយោគគម្រោងរបស់ខ្លួន។
ប៉ុន្តែដោយហេតុវិបត្តិអចលនទ្រព្យនិងការវិបត្តិសេដ្ឋកិច្ចដើរបន្ថយល្បឿន សម្ព័ន្ធក្រុមហ៊ុនZhongzhiលែងអាចមានសមត្ថភាពសងប្រាក់ដល់អតិថិជនម្ចាស់ទ្រព្យវិញ ហើយធ្លាក់ក្នុងវិបត្តិជាប់បំណុលនិងប្រកាសក្ស័យធននៅថ្ងៃពុធទី២២វិច្ឆិកា២០២៣។ ក្រុមហ៊ុនត្រូវជាប់បំណុលប្រមាណជិត៦០ពាន់លាន។ នេះបើតាមលិខិតជូនដំណឹងដែលចុះផ្សាយដោយសារព័ត៌មានក្នុងស្រុក។
ប្រឈមនឹងស្ថានភាពបែបនេះ ប៉ូលិសក្រុងប៉េកាំងបានសម្រេចបើកអង្កេត វែករកបទល្មើសរបស់ក្រុមហ៊ុនដោយមិនបញ្ជាក់ថាជាប្រភេទបទល្មើសអ្វីឡើយ។ បើតាមសេចក្តីថ្លែងការណ៍ អាជ្ញាធរប៉េកាំងបានចេញវិធានការចាប់បង្ខំលើជនសង្ស័យជាច្រើននាក់ ប៉ុន្តែមិនបានលម្អិតអំពីចំនួនមនុស្សពាក់ព័ន្ធ និងមូលហេតុនៃចំណាត់ការទេ។ កាលពីខែកញ្ញាកន្លងទៅ អាជ្ញាធរចិនបានប្រើពាក្យដូចគ្នានេះដើម្បីបញ្ជាក់អំពីវិធានការប្រឆាំងនឹងថៅកែក្រុមហ៊ុនយក្សផ្នែកអលចនទ្រព្យEvergrande ដែលជាប់បំណុលដ៏សម្បើម ឱ្យជាប់ឃុំឃាំងក្នុងគេហដ្ឋាន។
ការដួលរំលំក្រុមហ៊ុនZhongzhi តែពីរឆ្នាំក្រោយ ក្រុមហ៊ុនEvergrandeបាននិងកំពុងបំផុសឱ្យមានការព្រួយបារម្ភ យ៉ាងខ្លាំងអំពីហានិភ័យឆ្លងរាលដាល បង្កជាផលវិបាកមិនអាចកំណត់បានដល់ប្រព័ន្ធហិរញ្ញវត្ថុចិនទាំងមូល ព្រោះថាវិបត្តិរបស់ក្រុមហ៊ុន Evergrande មិនទាន់អស់ចំហាយ និងនៅបន្តញាំញីវិស័យអចលនវត្ថុនិងសេដ្ឋកិច្ចប្រទេសនៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ