អូស្ត្រាលី ចុះកិច្ចព្រមព្រៀងសន្តិសុខ ជាមួយប៉ាពូអាស៊ីនូវែលហ្គីណេ
បន្ទាប់ពីបានស្ទាក់ស្ទើរក្នុងចិត្ត ទីបំផុតរដ្ឋាភិបាលប្រទេសប៉ាពូអាស៊ីនូវែលហ្គីណេ បានសម្រេចចុះកិច្ចព្រមព្រៀងសន្តិសុខជាមួយអូស្ត្រាលី នៅថ្ងៃព្រហស្បតិ៍ ទី៧ធ្នូ។ កាលពីដើមឆ្នាំ២០២៣ រដ្ឋាភិបាលប៉ាពូអាស៊ី នូវែលហ្គីណេ ធ្លាប់បានបង្ហាញការព្រួយបារម្ភ ថាកិច្ចព្រមព្រៀងសន្តិសុខនេះ អាចនឹងប៉ះពាល់ មកលើអធិបតេយ្យភាព របស់ប្រទេសខ្លួន។
ចុះផ្សាយនៅថ្ងៃ៖
ស្តាប់ - ០៣:១៧
លោក James Marape នាយករដ្ឋមន្ត្រីប៉ាពូអាស៊ីនូវែលហ្គីណេ បានឲ្យដឹងនៅថ្ងៃព្រហស្បតិ៍ថា កិច្ចព្រមព្រៀងជាមួយអូស្ត្រាលីនេះ គឺក្តោបទៅលើវិស័យសន្តិសុខ តួយ៉ាង ការរក្សាសន្តិសុខសង្គម សណ្តាប់ធ្នាប់សាធារណៈ និងការសហការក្នុងវិស័យយុត្តិធម៌។ សន្តិសុខផ្ទៃក្នុងរបស់ ប៉ាពូអាស៊ី នូវែលហ្គីណេ នឹងត្រូវបានពង្រឹង តាមរយៈការជួយពីសំណាក់អូស្ត្រាលី ក្នុងការបណ្តុះបណ្តាលមន្ត្រីនគរបាលជំនាញ នឹងតាមរយៈការទប់ស្កាត់ការឧក្រិដ្ឋកម្ម ការជួញដូរគ្រឿងញៀន អាវុធ និងអំពើហិង្សាផ្សេងៗ។
លោកអង់តូនី អាល់បាណេស នាយករដ្ឋមន្ត្រីអូស្ត្រាលី បានថ្លែងអបអរចំពោះការចុះកិច្ចព្រមព្រៀងថ្មីនេះ ដែលលោកចាត់ទុកថា វានឹងមកជួយរក្សាការពារស្ថិរភាពតំបន់។ លោកបន្ថែមថា កិច្ចព្រមព្រៀងសន្តិសុខនេះ នឹងអនុញ្ញាតឲ្យមានការជួយបណ្តុះបណ្តាលមន្ត្រីនគរបាលប៉ាពូអាស៊ី នូវែលហ្គីណេ ជួយផ្តល់មធ្យោបាយច្រើន ដល់ចៅក្រម ព្រមទាំងជួយពង្រឹងដល់ការប្រយុទ្ធប្រឆាំងនឹងអំពើហិង្សាធ្វើទៅលើស្ត្រី។ ក្រៅពីនេះ កិច្ចព្រមព្រៀងនេះ ក៏បានកំណត់អំពីការសហការគ្នាក្នុងការប្រយុទ្ធប្រឆាំង នឹងវិបត្តិអាកាសធាតុ សន្តិសុខព័ត៌មានវិទ្យា ព្រមទាំងការជួយគ្នាក្នុងករណីមានគ្រោះមហន្តរាយធម្មជាតិជាដើម។
គួរកត់សំគាល់ថា តំបន់ប៉ាស៊ីហ្វិកខាងត្បូង បានក្លាយជាទីប្រជែងក្តោបក្តាប់ឥទ្ធិពល ដែលមានម្ខាងជាចិន ម្ខាងទៀតគឺសហរដ្ឋអាមេរិកសហការជាមួយអូស្ត្រាលី។ កាលពីខែមេសា ឆ្នាំ២០២២ ចិនបានចុះកិច្ចព្រមព្រៀងសន្តិសុខមួយ ជាមួយកោះសាឡូម៉ុង។ ខ្លឹមសារលំអិតនៃកិច្ចព្រមព្រៀងនេះ ត្រូវបានភាគីទាំង២លាក់ជិត ដែលបានបង្កឲ្យមានការសង្ស័យថា ចិនអាចនឹងប្រើប្រាស់កោះសាឡូម៉ុង ដើម្បីបោះទីតាំងមូលដ្ឋានទ័ព ប្រចាំតំបន់ប៉ាស៊ីហ្វិកខាងត្បូង។
គួរបញ្ជាក់ដែរថា ប៉ាពូអាស៊ី នូវែលហ្គីណេ ក៏ជាទីចាប់អារម្មណ៍ណាស់ដែរ សម្រាប់ចិន និងសហរដ្ឋអាមេរិក ដោយសារតែប្រទេសនេះ ស្ថិតនៅចំចំណុចឆ្លងកាត់ផ្លូវសមុទ្រដ៏សំខាន់ និងមានធនធានរ៉ែមាស ឧស្ម័ន និងរ៉ែកម្រផ្សេងៗជាច្រើន។ កាលពីខែឧសភា រដ្ឋាភិបាលប៉ាពូអាស៊ី នូវែលហ្គីណេបានចុះកិច្ចព្រមព្រៀងមួយ ជាមួយសហរដ្ឋអាមេរិក ដោយយល់ព្រមបើកឲ្យកងទ័ពអាមេរិក អាចប្រើប្រាស់កំពង់ផែ មូលដ្ឋានទ័ពជើងទឹក និងព្រលានយន្តហោះផង។ ដោយឡែក ចិនក៏បានប្រើប្រាស់យុទ្ធសាស្ត្រលួងលោមប៉ាពូអាស៊ី នូវែលហ្គីណេ ដែរ តាមរយៈគម្រោងវិនិយោគជាច្រើន លើវិស័យអចលនទ្រព្យ ពាណិជ្ជកម្ម និងគម្រោងសាងសង់ហេដ្ឋារចនាសម្ព័ន្ធ។
យ៉ាងណាក៏ដោយ លោកនាយករដ្ឋមន្ត្រីប៉ាពូអាស៊ី នូវែលហ្គីណេ បានអះអាងនៅថ្ងៃព្រហស្បតិ៍ទី៧ធ្នូថា ប្រទេសលោកចង់ធ្វើជាមិត្តជាមួយគ្រប់គ្នា ហើយមិនចង់ធ្វើជាសត្រូវរបស់នរណាទាំងអស់។ ប៉ាពូអាស៊ី នូវែលហ្គីណេ ចង់ធ្វើការជាមួយសហរដ្ឋអាមេរិក និងអូស្ត្រាលី តែមិនចង់បង្កបញ្ហាអ្វីជាមួយចិននោះទេ។ ថ្លែងក្នុងសន្និសីទកាសែត រសៀលថ្ងៃ៧ធ្នូ អ្នកនាំពាក្យក្រសួងការបរទេសចិន បានអះអាងថាចិនសប្បាយរីករាយដែលឃើញ ប៉ាពូអាស៊ី នូវែលហ្គីណេ ចុះកិច្ចព្រមព្រៀងជាមួយអូស្ត្រាលី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ