លោកភិថា លីមចៈរើនរ៉ាត់ ចូលខ្លួនទៅសវនាការតុលាការធម្មនុញ្ញថៃ
តុលាការធម្មនុញ្ញថៃ បានបើកសវនាការដោយគ្មានអ្នកកាសែតចូលរួមស្តាប់ នៅព្រឹកថ្ងៃពុធទី២០ធ្នូ លើសំណុំរឿងទាក់ទិននឹងលោក ភិថា លីមចៈរើនរ៉ាត់ អតីតបេក្ខជននាយករដ្ឋមន្ត្រីថៃ ដ៏មានប្រជាប្រិយភាព។ លោកភិថា ត្រូវបានគេចោទ ថាបានធ្វើបំពាននឹងច្បាប់បោះឆ្នោត ហើយអាចប្រឈមនឹងទោសជាប់ពន្ធនាគារ ព្រមទាំងលែងមាន សិទ្ធិឈរឈ្មោះបោះឆ្នោត ថែមទៀត។ តុលាការធម្មនុញ្ញថៃ បានបញ្ជាក់ថា សេចក្តីសម្រេចនឹងត្រូវប្រកាស នៅថ្ងៃទី២៤មករា។
ចុះផ្សាយនៅថ្ងៃ៖
ស្តាប់ - ០២:៥៥
សូមរំលឹកថា លោក ភិថា លីមចៈរើនរ៉ាត់ អាយុ៤៣ឆ្នាំ អតីតប្រធានគណបក្ស Move Forward គឺជាអតីតបេក្ខជននាយករដ្ឋមន្ត្រីថៃ បន្ទាប់ពីគណបក្សរបស់លោក បានឈ្នះបានអាសនៈសភានាំមុខគេ ក្នុងការបោះឆ្នោតសភា កាលពីខែឧសភាកន្លងទៅ។ គណបក្សរបស់លោកភិថា ដែលមានគោលនយោបាយធ្វើកំណែទម្រង់ស៊ីជំរៅ បានទទួលការគាំទ្រខ្លាំង ជាពិសេសពីសំណាក់យុវជនវ័យក្មេងៗ ដែលនឿយណាយនឹងអំណាចរបស់ក្រុមយោធាអភិរក្សនិយម។ ក៏ប៉ុន្តែ ក្រុមយោធាថៃ និងក្រុមសមាជិកសភាអភិរក្សនិយមថៃ បានរារាំងបានសម្រេច មិនឲ្យលោកភិថា លីមចៈរើនរ៉ាត់ ក្លាយជានាយករដ្ឋមន្ត្រី។
ក្រោយលទ្ធផលបោះឆ្នោតសភា ដែលបង្ហាញជ័យជំនះ របស់លោក ភិថា លីមចៈរើនរ៉ាត់ គណៈកម្មការជាតិរៀបចំការបោះឆ្នោតថៃ បានចោទប្រកាន់ថា លោកភិថា បានធ្វើបំពាននឹងច្បាប់បោះឆ្នោត ដែលហាមមិនឲ្យបេក្ខជនឈរឈ្មោះ មានចំណែកភាគហ៊ុន ក្នុងក្រុមហ៊ុនបណ្តាញព័ត៌មានណាមួយ។ គេចោទថា ក្នុងពេលឃោសនាបោះឆ្នោត លោកភិថា មានភាគហ៊ុននៅក្នុងក្រុមហ៊ុនបណ្តាញទូរទស្សន៍ iTV។ លោកភិថា លីមចៈរើនរ៉ាត់ បានឆ្លើយអះអាងថា ភាគហ៊ុនដែលលោកមាន វាគឺជាការផ្ទេរមរតកមកពីឪពុករបស់លោក តែប៉ុណ្ណោះ។ ហើយជាងនេះទៀត ស្ថានីយទូរទស្សន៍ iTV បានបិទការផ្សាយទាំងស្រុង តាំងតែពីឆ្នាំ២០០៧ម្លេះ គ្មានអ្វីពាក់ព័ន្ធនឹងការឃោសនាបោះឆ្នោត ឆ្នាំ២០២៣ទេ។
គួរបញ្ជាក់ថា ប្រសិនបើតុលាការធម្មនុញ្ញថៃ សម្រេចទទួលស្គាល់ថាលោក ភិថា លីមចៈរើនរ៉ាត់ ពិតជាបានធ្វើខុសនឹងច្បាប់បោះឆ្នោតពិតមែន គឺលោក អាចមានប្រឈមនឹងទោស ជាប់ពន្ធនាគារ បាត់បង់ជាស្ថាពរនូវអាសនៈសភា ហើយនឹងត្រូវគេហាមឃាត់ មិនឲ្យឈរឈ្មោះបោះឆ្នោត រយៈពេល២០ឆ្នាំ។ ជីវិតនយោបាយទាំងស្រុងរបស់លោក គឺរំពឹងលើសេចក្តីសម្រេច នៃតុលាការធម្មនុញ្ញ ដែលនឹងប្រកាសនៅថ្ងៃទី២៤ធ្នូ។
ពេលចេញពីអង្គសវនាការ នៅថ្ងៃពុធទី២០ធ្នូ ក្នុងទឹកមុខញញឹមដូចសព្វមួយដង លោក ភិថា លីមចៈរើនរ៉ាត់ បានឆ្លើយប្រាប់អ្នកកាសែតថា លោកមានក្តីសង្ឃឹមច្រើន ថាលោកនឹងទទួលបានយុត្តិធម៌។ លោកបញ្ជាក់ថា លោកមានការពេញចិត្ត ចំពោះនីតិវិនីនៅក្នុងតុលាការ ហើយថាលោកបានរងចាំថ្ងៃនេះយូរមកហើយ ដើម្បីបាននិយាយលាតត្រដាងការពិត បញ្ជាក់ពីភាពស្មោះត្រង់របស់លោក។ លោកអះអាងថា លោកជឿជាក់ថា ការពិតនឹងឈ្នះ ការពិតនឹងនាំយកភាពយុត្តិធម៌ ដើម្បីអនុញ្ញាតឲ្យលោក អាចមានលទ្ធភាពបម្រើនយោបាយ និងប្រជាជាតិថៃឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ