សភាថៃបោះឆ្នោតទទួលយកសេចក្តីព្រាងច្បាប់ អនុញ្ញាតអាពាហ៍ពិពាហ៍រវាងអ្នកមានភេទដូចគ្នា
សភាជាន់ទាបថៃ នៅថ្ងៃសុក្រទី២២ធ្នូនេះ បានបោះឆ្នោតនៅអំណានទី១ ទទួលយកសេចក្តីព្រាងច្បាប់ថ្មីដែលរដ្ឋាភិបាលបានស្នើមក ដើម្បីឈានទៅបើកផ្លូវទទួលស្គាល់ ចំណងអាពាហ៍ពិពាហ៍ស្របច្បាប់ រវាងអ្នកដែលមានភេទដូចគ្នា។ ទោះបីពេលនេះ ច្បាប់នេះមិនទាន់ត្រូវបានអនុម័តជាស្ថាពរ តែវាបានផ្តល់ក្តីសង្ឃឹមខ្លាំង ដល់ក្រុមអ្នកស្រលាញ់ភេទដូចគ្នានៅថៃ ក្នុងការទទួលបានសិទ្ធិស្មើភាពគ្នាក្នុងសង្គម។
ចុះផ្សាយនៅថ្ងៃ៖
ស្តាប់ - ០៣:៣១
សេចក្តីព្រាងច្បាប់ថ្មី ដែលរដ្ឋាភិបាលថៃបានស្នើទៅសភា គឺមានខ្លឹមសារ កែប្រែការប្រើប្រាស់ពាក្យ បុរស ស្ត្រី ប្តី និងប្រពន្ធ នៅក្នុងច្បាប់ស្តីពីអាពាហ៍ពិពាហ៍។ ពាក្យទាំងអស់នេះ នឹងត្រូវជំនួសដោយពាក្យផ្សេងទៀត ដែលមានក្តោបន័យទូលំទូលាយ មិនសំដៅលើភេទ។ ការកែប្រែខ្លឹមសារថ្មីនេះ នឹងបើកផ្លូវ អនុញ្ញាត ឲ្យប្រជាពលរដ្ឋថៃទាំងអស់ អាចរៀបអាពាហ៍ពិពាហ៍ ដោយលែងជាប់លក្ខខណ្ឌ ថាត្រូវតែមានភេទពីកំណើតផ្ទុយគ្នាទៀតហើយ។ ការទទួលស្គាល់សិទ្ធិរៀបអាពាហ៍ពិពាហ៍នេះ ក៏នឹងផ្តល់សិទ្ធិផងដែរ ឲ្យដៃគូសហព័ទ្ធ ដែលមានភេទដូចគ្នា អាចមានសិទ្ធិស្មុំកូន និងមានសិទ្ធិផ្ទេរឬទទួលមរតក។
លោក សុមសាក់ ធេបស៊ូធីន ឧបនាយករដ្ឋមន្ត្រីថៃ បានឡើងថ្លែងការពារសេចក្តីព្រាងច្បាប់ថ្មីនេះ នៅចំពោះមុខអង្គសភាជាន់ទាប ដោយលោកបានលើកឡើងថា ច្បាប់ថ្មីនេះបានឆ្លុះបញ្ចាំងអំពីឆន្ទៈ របស់រាជរដ្ឋាភិបាល ក្នុងការពង្រឹងសិទ្ធិមនុស្ស ដើម្បីឲ្យពលរដ្ឋថៃគ្រប់រូប បានទទួលសិទ្ធិស្មើៗគ្នា ក្នុងការកសាងគ្រួសារ ដោយគ្មានការរើសអើង ។
សមាជិកសភាជាន់ទាបថៃ បានបោះឆ្នោតទទួលយកសេចក្តីព្រាងច្បាប់នេះ ជាមួយនឹងសំឡេងគាំទ្រ ៣៦០ ទល់នឹង១០សំឡេងប្រឆាំង។ ជំហានបន្ទាប់ អត្ថបទសេចក្តីព្រាងច្បាប់នេះ នឹងត្រូវបញ្ជូនទៅកាន់គណៈកម្មាធិការច្បាប់ ដើម្បីពិនិត្យលំអិតលើខ្លឹមសារ មុននឹងបោះឆ្នោតអនុម័តជាលើកទី២នៅរដ្ឋសភា។
ក្រោយដំណឹងលទ្ធផលវិជ្ជមាននៅសភានេះ លោកនាយករដ្ឋមន្ត្រី សេដ្ឋា ថៈវីស៊ីន បានសរសេរអបអរសាទរ នៅលើបណ្តាញសង្គម X ដោយលោកបានលើកឡើងថា ទីបំផុតនៅថ្ងៃនេះ យើងបានឈានមកដល់លើផ្លូវ ដែលឆ្ពោះទៅកាន់ សមភាពនៃសិទ្ធិសម្រាប់មនុស្សគ្រប់ៗគ្នា។
គួររំលឹកថា កាលពីឆ្នាំ២០២២ សភាថៃធ្លាប់បានបើកភ្លើងខៀវ ទទួលយកមកពិចារណា នូវសេចក្តីព្រាងច្បាប់ចំនួន២រួចហើយ ទាក់ទិននឹងការអនុញ្ញាតចំណងអាពាហ៍ពិពាហ៍ រវាងអ្នកមានភេទដូចគ្នា និងសេចក្តីព្រាង២ទៀត ទាក់ទិននឹងការរួមរស់ជាអនីតិសង្វាស។ តែដំណើរការអនុម័តច្បាប់ទាំងនេះ ត្រូវបានអាក់ខានវិញ បន្ទាប់ពីអតីតរដ្ឋាភិបាលលោកប្រាយុទ្ធចាន់អូចា បានសម្រេចរំលាយសភាចោល ដើម្បីបើកឲ្យមានការបោះឆ្នោតកាលពីខែឧសភាកន្លងទៅ។
គួរកត់សំគាល់ថា ប្រសិនបើថៃមានច្បាប់ទទួលស្គាល់ ការរៀបអាពាហ៍ពិពាហ៍ដោយស្របច្បាប់ រវាងអ្នកមានភេទដូចគ្នា នោះមានន័យថា ថៃជាប្រទេសដំបូងគេហើយ នៅអាស៊ីអាគ្នេយ៍ ដែលទទួលស្គាល់សិទ្ធិរបស់អ្នកស្រលាញ់ភេទដូចគ្នា។ លោក Chawinroj Terapachalaphon មេធាវី LGBT+ ថៃម្នាក់ បានលើកឡើងថា ការផ្តល់សិទ្ធិស្មើភាពគ្នាក្នុងការរៀបអាពាហ៍ពិពាហ៍ គឺវានឹងអត្ថប្រយោជន៍ដល់សង្គមជាតិទាំងមូល។ លោកបន្តថា អ្នកដែលប្រឆាំងនឹងចំណុចនេះ គឺគ្មានហេតុអ្វីត្រូវប្រឆាំងទេ ព្រោះការផ្តល់សិទ្ធិរៀបអាពាហ៍ពិពាហ៍ទាំងអស់គ្នានេះ វាមិនបានទៅរំលោភបំពាន ឬធ្វើឲ្យប៉ះពាល់សិទ្ធិអ្នកដ៏ទៃឡើយ។ ផ្ទុយទៅវិញ ការទទួលស្គាល់សិទ្ធិស្មើៗគ្នា គឺវានឹងធ្វើឲ្យសង្គមជាតិ កាន់តែមានសេចក្តីសុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ