អ.ស.ប.អំពាវនាវឲ្យជួយសង្គ្រោះជីវិតជនជាតិរ៉ូហ៊ីងយ៉ា ១៨៥នាក់ កំពុងឋិតក្នុងទូក លើសមុទ្រឥណ្ឌា
ជនជាតិរ៉ូហ៊ីងយ៉ា ១៨៥នាក់ ភាគច្រើនជាស្ត្រីនិងកុមារ កំពុងតែឋិតនៅលើទូក លើសមុទ្រឥណ្ឌា។ អង្គការសហប្រជាជាតិ ទទូចអំពាវនាវជាបន្ទាន់ សូមឲ្យជួយសង្គ្រោះស្រោចស្រង់អាយុជីវិតពួកគេផង។ ត្រូវសង្គ្រោះជាបន្ទាន់ ពីព្រោះថា មនុស្សយ៉ាងហោចជាង ១០ នាក់ ក្នុងចំណោមនោះ កំពុងតែធ្លាក់ខ្លួនឈឺធ្ងន់ ហើយអាចនឹងត្រូវផុតរលត់ជីវិត ប្រសិនបើគ្មានការព្យាបាលសង្គ្រោះ ឲ្យទាន់ពេលវេលា ទេនោះ។
ចុះផ្សាយនៅថ្ងៃ៖
ស្តាប់ - ០២:២៨
នេះបើយោងតាមសេចក្តីថ្លែងការណ៍របស់ ឧត្ដមស្នងការអង្គការសហប្រជាជាតិទទួលបន្ទុកជនភៀសខ្លួន ពីថ្ងៃសៅរ៍ ទី២៣ ធ្នូ និងបញ្ជាក់ដែរថា ទូកដឹកជនជាតិរ៉ូហ៊ីងយ៉ាទាំងនោះ ស្ថិតនៅកៀកក្បែរកោះ អន់ដាម៉ាន និងនីកូបារ។
អ្នកនាំពាក្យឧត្ដមស្នងការអង្គការសហប្រជាជាតិទទួលបន្ទុកជនភៀសខ្លួន លោក បាបារ បាលុស្ស៍ បានថ្លែងប្រាប់ទីភ្នាក់ងារព័ត៌មានបារាំងអាអេហ្វប៉េ ថា អ្នកនៅលើទូកនេះ បានព្យាយាមទាក់ទងសុំជំនួយពីប្រទេសផ្សេងៗនៅក្បែរៗកោះនោះ ព្រោះតែស្ថានភាពលើទូក ធ្លាក់ក្នុងដំណាក់កាលអស់សង្ឃឹមមែនទែនហើយ។
ជាច្រើនឆ្នាំមកនេះ ជនជាតិភាគតិច រ៉ូហ៊ីងយ៉ា កាន់សាសនាអ៊ីស្លាម ត្រូវ របបសឹកភូមា ប្រើអំពើហិង្សា ធ្វើទុក្ខបុកម្នេញ ដែលជំរុញឲ្យពួកគេរត់ចោលលំនៅដ្ឋាន ចាកចេញទៅជំរុំជនភៀសខ្លួន ក្នុងប្រទេសបង់ក្លាដែស។ ស្ថានភាពក្នុងជំរុំនេះ គឺត្រូវអង្គការសិទ្ធិមនុស្សជាច្រើន រិះគន់ថ្កោលទោសថា ខ្វះចំណីអាហារ និងគ្មានអនាម័យ ហើយនិងមានអំពើហិង្សា ចរាចរណ៍គ្រឿងញៀន និង ការចាប់ជំរិត។ ក្នុងឆ្នាំ២០២៣នេះ នៅជំរុំជនភៀសខ្លួនបង់ក្លាដែស មានជនជាតិរ៉ូហ៊ីងយ៉ា ជាង ៦០នាក់ ស្លាប់បាត់បង់ជីវិត។ ហេតុដូច្នេះហើយ ទើប រ៉ូហ៊ីងយ៉ាខ្លះទៀត ត្រូវបង្ខំចិត្ត ប្រថុយជីវិតធ្វើដំណើរជាបន្តទៀត តាមផ្លូវទឹក ជិះទូក តម្រង់ឆ្ពោះទៅកាន់ ម៉ាឡេស៊ី និងឥណ្ឌូនេស៊ី។ នៅឥណ្ឌូនេស៊ី ក្នុងសប្តាហ៍នេះ ប្រជាជនបានធ្វើបាតុកម្មបដិសេធមិនព្រមទទួលយកជនភៀសខ្លួនរ៉ូហ៊ីងយ៉ា នោះឡើយ។
តាមទិន្នន័យរបស់ឧត្ដមស្នងការអង្គការសហប្រជាជាតិទទួលបន្ទុកជនភៀសខ្លួន គឺក្នុងឆ្នាំ២០២២ ក្រុមរ៉ូហ៊ីងយ៉ា យ៉ាងហោច ជាង ២ ០០០ នាក់ បានព្យាយាមចាកចេញទៅកាន់ប្រទេសអាស៊ីអាគ្នេយ៍ ហើយ ក្នុងឆ្នាំទៅមិញនេះ ជាង ៥៧០ នាក់ បាត់ខ្លួន ឬបានស្លាប់បាត់បង់ជីវិត នៅក្នុងសមុទ្រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ