សេអ៊ូលដាក់ទណ្ឌកម្មមេចារកិច្ចកូរ៉េខាងជើងចំពេលគីមជុងអ៊ុនបើកជំនួបប្រជុំបក្សប្រចាំឆ្នាំ
កូរ៉េខាងត្បូងបានប្រកាសនៅថ្ងៃពុធទី ២៧ធ្នូ២០២៣នេះ ដាក់ទណ្ឌកម្មប្រឆាំងនាយកការិយាល័យចារកិច្ចកូរ៉េខាងជើង លោក រី ចង់ហូ ពីបទប្រព្រឹត្តសកម្មភាពអនឡាញដោយខុសច្បាប់ និងលួចបច្ចេកវិទ្យា រហូតនាំឱ្យកូរ៉េខាងជើងអាចបាញ់សាកល្បងមីស៊ីលជាថ្មីកាលពីពាក់កណ្តាលខែ និងបង្ហោះផ្កាយរណបចារកិច្ចបានសម្រេច។ គឺជារបត់ថ្មីនិងការប្តូរផ្លាស់ដ៏ធំធេងផ្នែកសមត្ថភាពយោធារបស់កូរ៉េខាងជើង។ នេះបើតាមសំដីរបស់លោក គីមជុងអ៊ុន ប្រមុខដឹកនាំកូរ៉េខាងជើងនាឱកាសបើកជំនួបប្រជុំបក្សដ៏ធំប្រចាំឆ្នាំ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥៧
ពីថ្ងៃអង្គារទី ២៦ធ្នូដល់ថ្ងៃទី ១មករា២០២៤ ប្រមុខដឹកនាំកូរ៉េខាងជើង លោក គីមជុងអ៊ុន ត្រូវធ្វើជាអធិបតីក្នុងជំនួបប្រជុំបក្សប្រចាំឆ្នាំ ដែលជាឱកាសបង្អួតបង្ហាញផែនការនិងកម្មវត្ថុយោធា។ កាលពីឆ្នាំទៅ ក្នុងពេលបិទបញ្ចប់ជំនួបប្រជុំថ្ងៃទី ១មករា២០២៣ លោក គីមជុងអ៊ុនបានបញ្ជាឱ្យកូរ៉េខាងជើងបង្កើនសព្វាវុធនុយក្លេអ៊ែរ។ នៅឆ្នាំនេះ ក្នុងពេលបើកកម្មវិធី ប្រមុខដឹកនាំរបបព្យុងយ៉ាង បានអះអាងថា២០២៣ ជារបត់ថ្មី និងជាឆ្នាំនៃការប្តូរផ្លាស់ដ៏ធំធេងរបស់កូរ៉េខាងជើង ជាពិសេសក្នុងវិស័យការពារជាតិ ដោយបានបង្ហោះផ្កាយរណបចារកិច្ច បាញ់សាកល្បងមីស៊ីលបាលីស្ទិកអន្តរទ្វីប ដ៏មានមហិទ្ធិឬទ្ធិបំផុតគ្មានប្រៀប និងបានចារឈ្មោះកូរ៉េខាងជើងជាប្រទេសមហាអំណាចនុយក្លេអ៊ែរក្នុងរដ្ឋធម្មនុញ្ញទៀត។
កាលពីសប្តាហ៍មុន លោក គីមជុងអ៊ុន បានប្រកាសថាកូរ៉េខាងជើងមិនញញើតនឹងប្រើអាវុធនុយក្លេអ៊ែរឡើយ ប្រសិនបើមាននរណាហ៊ានយកអាវុធនុយក្លេអ៊ែរមកបង្ករឿង។
ការសាកល្បងមីស៊ីលនិងបង្ហោះកាំជ្រួចចារកិច្ច បានធ្វើឱ្យទំនាក់ទំនងរវាងកូរ៉េខាងជើងនិងខាងត្បូង ធ្លាក់ដុនដាបយ៉ាងខ្លាំងជាថ្មី។ សេអ៊ូលបានសម្រេចព្យួរកិច្ចព្រមព្រៀងយោធាចុះហត្ថលេខាកាលពីឆ្នាំ២០១៨ដើម្បីកាត់បន្ថយភាពតានតឹងយោធាក្នុងតំបន់។ ហើយនៅថ្ងៃពុធទី២៧ធ្នូនេះសេអ៊ូលបានចាត់វិធានការបន្ថែមជានិម្មត្តិរូប ដោយសម្រេចដាក់ទណ្ឌកម្មនាយកការិយាល័យចារកិច្ចកូរ៉េខាងជើង លោក រី ចង់ហូ។ ភ្នាក់ងារចារកិច្ចក្រោមបង្គាប់លោករីចង់ហូ ត្រូវជាប់សង្ស័យថា ជាគ្រប់គ្រងក្រុមចោរអ៊ីនធ័រនែត Kimsuky Lazarus និងAndariel។ ចំណែករូបលោក រី ចង់ហូ ផ្ទាល់ ត្រូវបានសេអ៊ូលចោទប្រកាន់ថាប្រមូលថវិកាឱ្យរបបព្យុងយ៉ាង និងទៅបម្រើសកម្មភាពនុយក្លេអ៊ែរ តាមរយៈសកម្មភាពរកស៊ីអនឡាញខុសច្បាប់និងការលួចបច្ចេកវិទ្យា។ នេះបើតាមសេចក្តីថ្លែងការណ៍របស់ក្រសួងការបរទេសកូរ៉េខាងត្បូង។ កូរ៉េខាងត្បូងនិងសម្ព័ន្ធមិត្តអាមេរិកជប៉ុន សង្ស័យថាព្យុងយ៉ាងរកប្រាក់បានប្រមាណ១,៧ដុល្លារកាលពីឆ្នាំទៅ តាមរយៈប្រព័ន្ធហិរញ្ញវត្ថុឌីជីថលCryptomonnaies។
ក្រៅពីលោករីចង់ហូ សេអ៊ូលបានដាក់ទណ្ឌកម្មអ្នកទទួលខុសត្រូវកូរ៉េខាងជើង៧នាក់ផ្សេងទៀត ក្នុងនោះមានម្នាក់ជាអតីតមន្ត្រីទូតប្រចាំនៅចិន ពីបទមានពាក់ព័ន្ធនឹងជំនួញលីចូម៦ លោហៈដ៏ចាំបាច់ក្នុងវិស័យនុយក្លេអ៊ែរ និងដែលហាមឃាត់ដោយអង្គការសហប្រជាជាតិ។ អំណើះតទៅ ជនជាប់ទណ្ឌកម្មកូរ៉េខាងត្បូងមិនអាចផ្ទេរនិងផ្តោះប្តូរប្រាក់ជាមួយកូរ៉េខាងត្បូងដោយគ្មានការអនុញ្ញាតឡើយ។ តាំងពីឆ្នាំ២០២២មក ជាប្រតិកម្មតបនឹងសកម្មភាពអភិវឌ្ឍន៍កម្មវិធីនុយក្លេអ៊ែរនិងមីស៊ីលខុសច្បាប់ កូរ៉េខាងត្បូងបានបញ្ចូលឈ្មោះបុគ្គល៨៣នាក់និងស្ថាប័នកូរ៉េខាងជើងចំនួន៥៣ ក្នុងបញ្ជីខ្មៅ។ ប៉ុន្តែទណ្ឌកម្មទាំងនេះ មានតម្លៃត្រឹមជានិម្មិតរូបប៉ុណ្ណោះ ព្រោះទំនាក់ទំនងពាណិជ្ជកម្មរវាងប្រទេសទាំងពីរមានកំរិតបំផុត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ