គីមជុងអ៊ុន បញ្ជាឱ្យកូរ៉េខាងជើងពន្លឿនលក្ខណៈត្រៀមធ្វើសង្គ្រាម
ប្រមុខដឹកនាំកូរ៉េខាងជើង លោក គីមជុងអ៊ុនបានប្រកាសទៅកាន់សមាជពេញអង្គនៃគណៈកម្មាធិការមជ្ឈិមបក្សពលករ នៅថ្ងៃព្រហស្បតិ៍ទី២៨ធ្នូនេះ ឱ្យពន្លឿនការត្រៀមលក្ខណៈធ្វើសង្គ្រាម និងពន្លឿនកម្មវិធីអាវុធនុយក្លេអ៊ែរ ព្រោះស្ថានភាពនយោបាយនិងយោធាកំពុងតែធ្ងន់ធ្ងរខ្លាំង។ បើតាមសំដីលោកគីមជុងអ៊ុនដែលមានចុះផ្សាយក្នុងប្រព័ន្ធសារព័ត៌មានរដ្ឋ ស្ថានភាពអាក្រក់នេះបង្កឡើងដោយសហរដ្ឋអាមេរិកនិងសម្ព័ន្ធមិត្ត។
ចុះផ្សាយនៅថ្ងៃ៖
ស្តាប់ - ០២:២២
នៅចំពោះមុនសមាជពេញអង្គនៃគណៈកម្មាធិការមជ្ឈិមបក្សពលករ បក្សតែមួយគត់តែកំពុងកាន់អំណាចនៅក្នុងប្រទេសកូរ៉េខាងជើង លោកប្រមុខគីមជុងអ៊ុនបានដាក់បញ្ជាឱ្យក្រុមយោធាប្រជាមានិត ឱ្យឧស្សាហកម្មគ្រាប់រំសេវ យោធាក្នុងវិស័យអាវុធនុយក្លេអ៊ែរ និងផ្នែកការពារស៊ីវិលទាំងអស់ ត្រូវពន្លឿនការត្រៀមរៀបចំធ្វើសង្គ្រាម។
ភ្នាក់ងារសារព័ត៌មានផ្លូវការកូរ៉េខាងជើងKCNA បានលម្អិតទៀតថា ប្រមុខដឹកនាំកូរ៉េខាងជើង ចេញសេចក្តីអំពាវនាវឱ្យពន្លឿនលក្ខណៈត្រៀមសង្គ្រាម ក៏ព្រោះតែស្ថានភាពនយោបាយ និងយោធានៅក្នុងឧបទ្វីបកូរ៉េ ដុនដាបខ្លាំងដល់កំពូលតែម្តង ដូចជាត្រូវប្រឈមផ្ទាល់នឹងសមយុទ្ធអាមេរិកផង និងកម្លាំងដ៏ខ្លាំងក្លាគ្មានប្រៀបក្នុងប្រវត្តិសាស្ត្រផង។
ជាការពិត សហរដ្ឋអាមេរិក កូរ៉េខាងត្បុង និងជប៉ុន បានបង្កើនកិច្ចសហប្រតិបត្តិការយោធា ដោយដាក់ឱ្យដំណើរការប្រព័ន្ធចែករំលែកទិន្នន័យទាន់ហេតុការណ៍ពេលកូរ៉េខាងជើងបង្ហោះមីស៊ីល និងបង្កើនការធ្វើសមយុទ្ធរួមគ្នាក្នុងតំបន់ទៀត។ ប៉ុន្មានខែចុងក្រោយនេះ អាមេរិកបានបញ្ជូននាវាមុជទឹកដើរដោយនុយក្លេអ៊ែរUSS Missouri នាវាផ្ទុកយន្តហោះ និងយន្តហោះទម្លាក់គ្រាប់បែកនុយក្លេអ៊ែរយុទ្ធសាស្ត្រ B-52 ទៅកាន់កូរ៉េខាងត្បូង។ សម្រាប់កូរ៉េខាងជើង សមយុទ្ធផ្ទួនៗនេះជាការត្រៀមលក្ខណៈចូលឈ្លានពានទឹកដីខ្លួន ដែលគ្មានវិធានការអ្វី ក្រៅពីត្រូវសាកល្បងមីស៊ីល និងត្រូវតែក្លាយខ្លួនជាមហាអំណាចនុយក្លេអ៊ែរដើម្បីការពារខ្លួនទេ។
នៅឆ្នាំ២០២៣នេះ កូរ៉េខាងជើងបានបាញ់សាកល្បងមីស៊ីលបាលីស្ទិក ក្នុងចំនួនដ៏ច្រើនបំផុ ត រំលោភបំពានសេចក្តីសម្រេចចិត្តរបស់ក្រុមប្រឹក្សាសន្តិសុខ បានបង្ហោះដោយជោគជ័យផ្កាយរណបចារកិច្ចទៅក្នុងគន្លងតារាវិថី និងបានបាញ់សាកល្បងមីស៊ីលបាលីស្ទីកអន្តរទ្វីប មានសមត្ថភាពបាញ់ដល់ដីអាមេរិកទៀត។ តែបើព្យុងយ៉ាងហ៊ានវាយប្រហារនុយក្លេអ៊ែរមែន នោះសេអ៊ូលនិងវ៉ាស៊ីនតោនច្បាស់ជាតបត និងបញ្ចប់របបគីមជុងអ៊ុនតែម្តង។
ជាចុងក្រោយ បើតាមភ្នាក់ងារសារព័ត៌មានកូរ៉េខាងជើងដដែល ក្នុងឱកាសសមាជបក្សនេះ លោកគីមជុងអ៊ុន ក៏បានអំពាវនាវឱ្យកូរ៉េខាងជើងពន្លាតនិងអភិវឌ្ឍន៍ទំនាក់ទំនងសហប្រតិបត្តិការយុទ្ធសាស្ត្រជាមួយបណ្តាប្រទេសឯករាជ្យនិងប្រទេសប្រឆាំងរបបចក្រពត្តិ។ មានគាំទ្រដោយងាករេពីចិន ព្យុងយ៉ាងបានបង្ខិតខ្លួនចូលកៀករុស្ស៊ីកាន់តែខ្លាំងនាពេលថ្មីៗនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ