បង់ក្លាដែស៖ ជ័យលាភីរង្វាន់ណូបែលសេដ្ឋកិច្ច ត្រូវកាត់ទោស ឲ្យជាប់ពន្ធនាគារ ៦ ខែ
ជ័យលាភីណូបែលសេដ្ឋកិច្ច ឆ្នាំ២០០៦ លោក មហាម៉ាត់ យូនូស និងសហការី ៣ នាក់ ត្រូវ តុលាការបង់ក្លាដែស បានសម្រេចទោសដាក់ពន្ធនាគារ ចំនួន ៦ ខែ ពីបទរំលោភបំពានច្បាប់ការងារ។ នេះបើតាមរដ្ឋអាជ្ញាបង់ក្លាដែស ដែលប្រកាសនៅថ្ងៃចន្ទ ទី១ ខែមករា ឆ្នាំ២០២៤។ បណ្តាក្រុមអ្នកគាំទ្ររូបលោក និងមេធាវីការពារក្តីឲ្យបណ្ឌិតសេដ្ឋកិច្ចរូបនេះ បានអះអាងថា សាលក្រមនេះជារឿងនយោបាយសុទ្ធសាធ និងបានអំពាវនាវឲ្យលើកលែងបទចោទប្រកាន់។
ចុះផ្សាយនៅថ្ងៃ៖
ស្តាប់ - ០៣:៣៧
មានជន្មាយុ ៨៣ ឆ្នាំ បណ្ឌិត មហាម៉ាត់ យូនូស ជាម្ចាស់ស្ថាបនិកធនាគារ Grameen និងជាអ្នកសេដ្ឋកិច្ចដែលបានទទួលការកោតសរសើរ ជាច្រើនពីបណ្តាអ្នកក្រ និងការគោរពរាប់អានពីសំណាក់បណ្តាមេដឹកនាំស្ថាប័ននានាៗជាច្រើន នៅលើពិភពលោក។ លោក មហាម៉ាត់ យូនូស បានរៀនសូត្រផ្នែកសេដ្ឋកិច្ចនៅសហរដ្ឋអាមេរិក និងត្រឡប់ចូលស្រុកកំណើតវិញនៅឆ្នាំ១៩៧១។ ឆ្នាំ១៩៨៣ លោកបង្កើត គ្រឹះស្ថានហិរញ្ញវត្ថុមួយ ដែលផ្តល់ប្រាក់ខ្ចី ឲ្យអ្នកក្រ អាចខ្លីលុយតិចតួច ត្រឹមតែ ១០០ ដុល្លារ ក៏ខ្ចីបាន។ តាមរយៈឥណទានខ្នាតតូចនេះ គឺជួយសង្គ្រោះពលរដ្ឋក្រីក្រជាច្រើនលាននាក់ ហើយស្នាដៃនេះបានជំរុញឲ្យរូបលោកទទួលបានពានរង្វាន់ណូបែលសេដ្ឋកិច្ច នៅឆ្នាំ២០០៦។
ចំពោះឥណទានកម្ចីខ្នាតតូចសម្រាប់អ្នកក្រ និងបានចំណេញប្រាក់តាមរយៈអត្រាការប្រាក់តិចតួចនេះ គឺត្រូវ លោកស្រីនាយករដ្ឋមន្រ្តី ឆេក ហាស៊ីណា រិះគន់ចំពោះរូបលោកថា កំពុងតែជញ្ជក់ឈាមរាស្ត្រ។ ក៏ប៉ុន្តែ បណ្ឌិត យូនូស បានអះអាងប្រាប់ទីភ្នាក់ងារព័ត៌មានបារាំងអាអេហ្វប៉េ កាលពីខែវិច្ឆិកា ២ ខែមុន ថា លោកស្ទើរតែគ្មានបានចំណេញអ្វីឡើយ ពីបណ្តាក្រុមហ៊ុន ប្រមាណ ៥០ ដែលលោកបានជួយបង្កើតនៅក្នុងប្រទេសបង់ក្លាដែស។
បង់ក្លាដែស នឹងរៀបចំការបោះឆ្នោតសភា នៅពេលខាងមុខនេះ ប៉ុន្តែ បក្សប្រឆាំងបង់ក្លាដែស បានធ្វើពហិការបដិសេធមិនចូលរួមបោះឆ្នោតទេ។ ស្របពេលនេះ គឺ បក្សកាន់អំណាច ក៏ចង់រារាំង និងបង្អាក់ដំណើររបស់លោក មហាម៉ាត់ យូនូស ដែលមានប្រជាប្រិយភាពខ្លាំង និងកំពុងតែមានចេតនាបង្កើតគណបក្សនយោបាយមួយ។ ប្រសិនបើបង្កើតបក្សនយោបាយ គឺលោកនឹងក្លាយជាគូប្រជែងក៏មានឥទ្ធិពល ហើយនិងអាចប្រកួតប្រជែងអំណាចបាន។ ដូច្នេះហើយ បក្សកាន់អំណាចបង់ក្លាដែស មិនអាចនៅស្ងៀមបានឡើយ។
ពេលនេះ ក្នុងដំណាក់ប្តឹងឡើងសាលាឧទ្ធរណ៍ លោក មហាម៉ាត់ យូនូស ត្រូវរដ្ឋអាជ្ញាអនុញ្ញាតឲ្យនៅក្រៅឃុំសិន។ ទោះយ៉ាងនេះក្តី ក្នុងករណីនេះ លោក ខាចា តានៀរ មេធាវីម្នាក់របស់លោក មហាម៉ាត់ យូនូស បានប្រាប់សារព័ត៌មានថា សាលក្រមកាត់ទោសនេះ គ្មានន័យខ្លឹមសារ និងអយុត្តិធម៌រកលេខដាក់គ្មាន ហើយថា សំណុំរឿងនេះ នាំឲ្យបង់ក្លាដែស ខ្មាសគេពេញមួយទ្វីបលោក។
នៅបង់ក្លាដែស លោក មហាម៉ាត់ យូនូស រងបណ្តឹងនិងជាប់បទចោទប្រកាន់ជាច្រើនករណី រាប់ចាប់តាំងពីបទល្មើសពុករលួយ បទរំលោភច្បាប់ការងារ និងបំពានច្បាប់ធនគារ ជាដើម។ ផ្ទុយទៅវិញ អតីតប្រធានាធិបតីអាមេរិក លោក ប៉ារ៉ាក់ អូបាម៉ា និង អតីតអគ្គលេខាធិការអង្គការសហប្រជាជាតិ លោក បាន គីមមូន រួមទាំង ម្ចាស់ជ័យលាភីណូបែលជាង១០០នាក់ទៀត បានសរសេរលិខិតចំហ១ ពី ៣ ខែមុន ស្នើឲ្យទម្លាក់ចោលបទចោទទាំងអស់ប្រឆាំងនឹងរូបលោក។ ចំណែក អ្នកស្រី អ៊ីរែន ខាន់ អ្នករាយការណ៍ពិសេសរបស់អង្គការសហប្រជាជាតិ លើកឡើងថា បណ្ឌិត មហាម៉ាត់ យូនូស គួរតែត្រូវទទួលបានការកោតសរសើរ និងជាមោទនភាពសម្រាប់ជាតិ តែមិនគួរត្រូវចោទប្រកាន់ផ្លូវច្បាប់ ទាំងទទឹងទិសបែបនេះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ