ចិនច្រឡោតនឹងសមយុទ្ធរវាងអាមេរិកនិងហ្វីលីពីននៅសមុទ្ទចិនខាងត្បូង
ការប៉ះទង្គិចគ្នា ក្នុងតំបន់ដែនទឹកជាប់ជម្លោះមានជាបន្តបន្ទាប់។ ឯសមយុទ្ធក៏មានសកម្មភាពកាន់ច្រើន។ នៅថ្ងៃព្រហស្បតិ៍នេះចិនបានចាត់ទុកសមយុទ្ធរបស់សហរដ្ឋអាមេរិកនិងហ្វីលីពីន នៅក្នុងសមុទ្ទចិនខាងត្បូង ថាជាទង្វើបង្ករឿង។ ប៉ុន្តែទន្ទឹមពេលគ្នានេះ យោធាចិនក៏កំពុងធ្វើលំហាត់សឹកដែរ។
ចុះផ្សាយនៅថ្ងៃ៖
ស្តាប់ - ០២:៣៩
សហរដ្ឋអាមេរិកបានប្រកាសធ្វើសមយុទ្ធរួមជាមួយនាវិកហ្វីលីពីន ដោយមានការចូលរួមពីសំណាក់កងពលអាកាសនាវិក នៃក្រុមនាវាផ្ទុកយន្តហោះដើរដោយនុយក្លេអ៊ែរUSS Carl Vinson នៅក្នុងសមុទ្ទចិនខាងត្បូង រយៈពេលពីរថ្ងៃ។ ជាលំហាត់សឹកជាប្រចាំដើម្បីពង្រឹងចំណងរវាងជាតិជាសម្ព័ន្ធមិត្តនិងជាដៃគូគ្នា។ នេះបើតាមសេចក្តីថ្លែងការណ៍របស់យោធាជើងទឹកអាមេរិកUS Navy។
ប៉ុន្តែសម្រាប់ចិន សមយុទ្ធអាមេរិកហ្វីលីពីន ជាសកម្មភាពបង្កហេតុ ដែលប៉ះពាល់ដល់បូរណភាពដែនដីចិន។ នេះបើតាមអ្នកនាំពាក្យក្រសួងការបរទេសចិន ដោយបញ្ជាក់ថា លំហាត់សឹកអាមេរិកហ្វីលីពីន ធ្វើឡើងក្នុងបំណងបង្អួតបង្ហាញកម្លាំង និងមិនសមនឹងស្ថានការណ៍និងការគ្រប់គ្រងជម្លោះទេ។
សម្រាប់ពេលនេះចិនក៏កំពុងដឹកនាំធ្វើសមយុទ្ធនៅក្នុងសមុទ្ទចិនខាងត្បូងដែរ។ យោធាចិនបានប្រកាសកាលពីថ្ងៃពុធទី៣មករា ថា កងកម្លាំងយោធាជើងទឹក និងអាកាសកំពុងចេញល្បាត តាមទម្លាប់ រហូតដល់ថ្ងៃព្រហស្បតិ៍។ តែចិនមិនបានបញ្ជាក់ថាអំពីទីតាំង និងចំនួនទាហាន ឬប្រភេទនាវា និងយន្តហោះ ដែលចូលរួមធ្វើលំហាត់សឹកនេះទេ។ សមយុទ្ធ ដែលចិនបានប្រកាសឱ្យដឹងជាសាធារណៈចុងក្រោយគេបំផុត គឺសមយុទ្ធកាលពីខែវិច្ឆិកា២០២៣ និងកាលពីខែកញ្ញាចិនមានធ្វើសមយុទ្ធបួន។
ក្រៅអំពីសមយុទ្ធជាបន្តបន្ទាប់ ស្ថានភាពក្នុងសមុទ្ទចិនខាងត្បូងក៏ឡើងតានតឹងរវាងចិន ជាមួយនឹងបណ្តាប្រទេសជាប់ជម្លោះជាពិសេសហ្វីលីពីន។ កាលពីខែធ្នូ នាវាចិនបានបាញ់ទឹកសំដៅនាវាហ្វីលីពីនដែលចេញធ្វើបេសកកម្មផ្គត់ផ្គត់ស្បៀងដល់ក្រុមប្រចាំការនៅកូនកោះថ្មប៉ប្រះទឹក Second Thomas ក្នុងសមុទ្ទចិនខាងត្បូង។ នាវាឆ្មាំសមុទ្ទចិននិងនាវាហ្វីលីពីនធ្លាប់បានទាំងបុកទង្គិចគ្នានៅសមុទ្ទចិនខាងត្បូងទៀត កាលពីខែតុលា។
សម្រាប់អ្នកវិភាគសិង្ហបុរី ចិនកំពុងប្រែក្លាយសមុទ្ទចិនខាងត្បូងទៅជាតំបន់ដែនទឹកគន្លឹះរបស់ចិនដែលត្រូវការពារ និងគ្រប់គ្រងដោយចិន ដើម្បីពង្រឹង ពង្រីកឥទ្ធិពលនិងសមត្ថភាពរបស់ខ្លួន។ ប៉េកាំងបានថែមទាំងអះអាងទៀតថា ចិនជាប្រជាជាតិដំបូងគេដែលបានរកឃើញប្រជុំកូនកោះប៉ប្រះទឹកនិងជាអ្នកដាក់ឈ្មោះឱ្យកូនកោះនៅក្នុងសមុទ្ទចិនខាងត្បូង ដ៏ធំទូលាយដែលមានចរាចរណ៍ពាណិជ្ជកម្មសំខាន់សម្រាប់អាស៊ីនិងផ្នែកផ្សេងទៀតនៃពិភពលោកឆ្លងកាត់។ ចិនមិនខ្វល់នឹងសេចក្តីសម្រេចរបស់តុលាការអន្តរជាតិកាលពីឆ្នាំ២០១៦ ដែលច្រានចោលការទាមទារគ្រប់គ្រងសមុទ្ទចិនខាងត្បូងតែម្នាក់ឯងរបស់ប៉េកាំងថាគ្មានមូលដ្ឋានត្រឹមត្រូវឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ