ចិនអះអាងថាបានកំណត់អត្តសញ្ញាណចារកិច្ចម្នាក់ ដែលប្រមូលព័ត៌មានបម្រើឲ្យអង់គ្លេស
ចិនបានអះអាងថា ជនម្នាក់ដែលជាចារកិច្ច បម្រើឲ្យទីភ្នាក់ងារចារិក្ចអង់គ្លេស ត្រូវបានគេវែកមុខ កំណត់អត្តសញ្ញាណបាន។ ផ្អែកតាមក្រសួងសន្តិសុខផ្ទៃក្នុងចិន គឺគេបានរកឃើញភស្តុតាងជាច្រើន បញ្ជាក់ថាទីភ្នាក់ងារចារកិច្ចអង់គ្លេស MI6 បានប្រើប្រាស់ជននេះ ឲ្យប្រមូលព័ត៌មានសម្ងាត់ពីចិន ដោយបន្លំខ្លួន ធ្វើជាអគ្គនាយកក្រុមហ៊ុនប្រឹក្សាមួយ។
ចុះផ្សាយនៅថ្ងៃ៖
ស្តាប់ - ០៣:៣២
ក្រសួងសន្តិសុខផ្ទៃក្នុងចិន បានចេញសារប្រកាសមួយ នៅថ្ងៃចន្ទទី៨មករា នៅលើបណ្តាញសង្គម WeChat ដោយបានអះអាងថា ទីភ្នាក់ងារចារកិច្ចអង់គ្លេស MI6 បានប្រើប្រាស់ជនជាតិបរទេសម្នាក់ ដែលមាននាមត្រកូលថា Huong ឲ្យមកឈ្លបស៊ើបយកការណ៍សម្ងាត់ពីចិន។
ប្រភពដដែលអះអាងថា ជននេះ បានធ្វើដំណើរចូលមកចិនជាច្រើនលើក ដោយប្រើប្រាស់អត្តសញ្ញាណក្លែងក្លាយ បន្លំធ្វើជាអគ្គនាយកក្រុមហ៊ុនផ្តល់ប្រឹក្សា ដើម្បីមករៀបចំផ្សារភ្ជាប់ទំនាក់ទំនងសហប្រតិបត្តិការ ក្នុងវិស័យចារកិច្ចជាមួយចិន។ មិនត្រឹមប៉ុណ្ណោះទេ ជនឈ្មោះ Huong នេះមានតួនាទីស្វែងរកមនុស្សនៅចិន ដើម្បីបញ្ចុះបញ្ចូលឲ្យធ្វើការប្រមើទីភ្នាក់ងារចារកិច្ចអង់គ្លេស។
ឆ្លងកាត់ការស៊ើបអង្កេត អាជ្ញាធរចិនបានប្រមូលបានភស្តុតាង បញ្ជាក់ថាជនឈ្មោះ Huong បានបញ្ជូនព័ត៌មានសម្ងាត់ទៅឲ្យទីភ្នាក់ងារចារកិច្ចអង់គ្លេស MI6 យ៉ាងហោច ចំនួន១៧ព័ត៌មាន ដែលក្នុងនោះមានទាំងព័ត៌មានសម្ងាត់រដ្ឋចិនថែមទៀត។ អាជ្ញាធរចិនលើកឡើងថា ជននេះធ្លាប់បានទទួលការហ្វឹកហាត់ជំនាញឈ្លបយកការណ៍ និងត្រូវបានគេបង្រៀនឲ្យចេះប្រើសម្ភារៈបច្ចេកទេសទំនើប ដើម្បីប្រមូលព័ត៌មានហើយបញ្ជូនទៅកាន់MI6។ ក្រសួងសន្តិសុខផ្ទៃក្នុងចិនអះអាងថា គេបានចេញវិធានការបន្ទាន់ ដើម្បីឃាត់ខ្លួនជនសង្ស័យខាងលើ។
យ៉ាងណាក៏ដោយ គិតត្រឹមពេលនេះ ទីភ្នាក់ងារព័ត៌មានបារាំង AFP មិនអាចទទួលបានការបញ្ជាក់ព័ត៌មាននេះ ពីប្រភពឯករាជ្យណាមួយទេ។ ចំណែកក្រសួងការបរទេសអង់គ្លេសវិញ បានបដិសេធមិនប្រតិកម្មអ្វីទាំងអស់ ទាក់ទិននឹងការអះអាងថា របស់អាជ្ញាធរចិននេះ។
សូមបញ្ជាក់ថា អស់រយៈពេលជាច្រើនខែមកហើយ ដែលរដ្ឋាភិបាលចិន និងអង់គ្លេស បានចោទប្រកាន់គ្នាទៅវិញទៅមក ទាក់ទិននឹងសកម្មភាពចារកិច្ចឈ្លបយកការណ៍។ រដ្ឋាភិបាលអង់គ្លេស ធ្លាប់បានអះអាងថា ចិនបានធ្វើសកម្មភាពឈ្លបយកការណ៍ ពីក្រោយខ្នងមន្ត្រីធំៗរបស់អង់គ្លេសជាច្រើននាក់។ កាលពីខែកញ្ញា ឆ្នាំ២០២៣ អ្នកស្រាវជ្រាវម្នាក់ធ្វើការនៅសភាអង់គ្លេស ត្រូវបានគេចាប់ឃាត់ខ្លួន ដោយចោទថាបានធ្វើចារកិច្ចបម្រើឲ្យចិន
ពីខាងចិនវិញ គេបានអះអាងថាបានចាត់វិធានការប្រឆាំងនឹងការធ្វើចារកិច្ចពីបរទេស ជាច្រើនករណី ក្នុងរយៈពេលប៉ុន្មានខែមកនេះ។ ជាក់ស្តែង កាលពីខែឧសភា ជនជាតិអាមេរិកដើមកំណើតចិនម្នាក់ ឈ្មោះ John Shing-wan Leung អាយុ៧៨ឆ្នាំ ត្រូវបានតុលាការចិនផ្តន្ទាទោសជាប់ពន្ធនាគារមួយជីវិត ពីបទចារកិច្ច តែដោយគ្មានបង្ហាញភស្ដុតាង ឬព័ត៌មានលំអិត ទាក់ទិនការចោទនេះឡើយ។ ហើយកាលពីខែតុលា ជនម្នាក់ឈ្មោះ Hou ត្រូវក្រសួងសន្តិសុខផ្ទៃក្នុងចិន ចោទថាបានបញ្ជូនឯកសារសម្ងាត់រដ្ឋចិនជាច្រើនច្បាប់ ទៅឲ្យអាមេរិក។
កាលពីឆ្នាំ២០២៣ដែរ អាជ្ញាធរចិនបានចុះទៅឆែកឆេរ និងរឹបអូសឯកសារ នៅតាមទីតាំងក្រុមហ៊ុនបរទេសមួយចំនួននៅចិន។ ខែឧសភា អាជ្ញាធរចិនចុះទៅរឹបអូសឯកសារ នៅក្រុមហ៊ុនផ្តល់ប្រឹក្សាធុរកិច្ចអាមេរិកមួយ ឈ្មោះ Capvision ។ ខែមេសា សមត្ថកិច្ចចិនបានចុះទៅសាកសួរព័ត៌មាន បុគ្គលិកក្រុមហ៊ុនប្រឹក្សាធុរកិច្ចអាមេរិកមួយទៀត ឈ្មោះ Bain។ ហើយកាលពីខែធ្នូ ចិនបានឃាត់ខ្លួនបុគ្គលិក៥នាក់ របស់ក្រុមហ៊ុនសាវនកម្មអាមេរិក Mintz Group ព្រមទាំងបានសម្រេចបិទការិយាល័យក្រុមហ៊ុននេះ នៅក្រុងប៉េកាំងថែមទៀត។ រដ្ឋាភិបាលអាមេរិកព្រមទាំងសភាពណិជ្ជកម្មអាមេរិកប្រចាំនៅចិន បានបរិហារថា ការចុះទៅឆែកឆេររឹបអូសឯកសារ និងការសួរចម្លើយឥតស្រាកស្រានពីអាជ្ញាធរចិន បានធ្វើឲ្យប៉ះពាល់យ៉ាងខ្លាំងមកលើទំនុកចិត្តរបស់អ្នកវិនយោគ ព្រមទាំងសកម្មភាពរកស៊ី របស់ក្រុមហ៊ុនបរទេសនៅក្នុងប្រទេសចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ