ថៃចង់ធ្វើច្បាប់ ត្រលប់មកហាមឃាត់ការប្រើប្រាស់កញ្ឆា ដែលគ្មានកម្មវត្ថុសុខភាពនិងវេជ្ជសាស្ត្រ
ជិត២ឆ្នាំ បន្ទាប់ពីបានអនុញ្ញាតការប្រើប្រាស់កញ្ឆាដោយស្របច្បាប់ រដ្ឋាភិបាលថ្មីរបស់ថៃ បានបង្ហាញអត្ថបទគម្រោងច្បាប់ថ្មីមួយ នៅថ្ងៃពុធទី១០មករា ដើម្បីឈានជើងដកថយវិញ។ អត្ថបទថ្មីនេះ នឹងហាមឃាត់ការប្រើប្រាស់កញ្ឆា ក្នុងលក្ខណៈកម្សាន្តសប្បាយ ហើយអនុញ្ញាតការប្រើប្រាស់កញ្ឆា បានតែក្នុងករណីចាំបាច់ដើម្បីព្យាបាលជម្ងឺ ឬពេលមានបញ្ហាសុខភាពតែប៉ុណ្ណោះ។ ការដាំដំណាំកញ្ឆា ក៏នឹងត្រូវស្ថិតនៅក្នុងការគ្រប់គ្រងតាមដានយ៉ាងម៉ដ្ឋចត់ផងដែរ។
ចុះផ្សាយនៅថ្ងៃ៖
ស្តាប់ - ០២:២៨
តាមរយៈអត្ថបទគម្រោងច្បាប់ថ្មីនេះ លោកនាយករដ្ឋមន្ត្រីសេដ្ឋា ថៈវីស៊ីន មានបំណងប្រាប់ប្រជាជនថៃ ថាលោកគោរពការសន្យា កាលក្នុងពេលឃោសនាបោះឆ្នោត ដែលលោកតែងតែអះអាងថា លោកមិនគាំទ្រឲ្យថៃមានច្បាប់អនុញ្ញាតការប្រើប្រាស់កញ្ឆា ដោយសេរីនោះឡើយ។ លោកគាំទ្រ ឲ្យមានការប្រើប្រាស់កញ្ឆាដោយស្របច្បាប់បាន តែក្នុងករណីចាំបាច់ ផ្នែកវេជ្ជសាស្ត្រតែប៉ុណ្ណោះ។
សូមរំលឹកថា កាលពីខែកក្កដា ឆ្នាំ២០២២ ថៃបានក្លាយជាប្រទេសអាស៊ីអាគ្នេយ៍ដំបូងគេបង្អស់ ដែលលែងផ្តន្ទាទោសព្រហ្មទណ្ឌ ទៅលើការប្រើប្រាស់ និងការដាំដំណាំកញ្ឆា។ ការបើកចំហរធូររលុងផ្នែកច្បាប់នេះ បានញ៉ាំងឲ្យវិស័យដំណាំកញ្ឆា ក្លាយជាឧស្សាហកម្មមួយដ៏មានសន្ទុះខ្លាំងនៅថៃ។ យោងតាមការប៉ាន់ស្មាន ឧស្សាហកម្មដំណាំកញ្ឆានៅថៃ អាចមានទំហំទឹកប្រាក់ប្រមាណ ១២០០លានដុល្លារ ក្នុងរវាងប៉ុន្មានឆ្នាំខាងមុខ។ ជិត២ឆ្នាំមកនេះ ចំការដំណាំកញ្ឆារីកកាន់តែធំ ខណៈហាងលក់ទំនិញធ្វើពីកញ្ឆា រីកដូចផ្សិតនៅតាមទីក្រុងធំៗនានារបស់ថៃ។
គឺដោយសង្កេតឃើញ គ្រោះថ្នាក់នៃភាពធូរលុងខ្លាំងពេកនេះហើយ ទើបរដ្ឋាភិបាលថ្មីរបស់លោក សេដ្ឋា ថៈវីស៊ីន បានសម្រេចស្នើច្បាប់ថ្មី ដកថយមួយជំហានវិញ ដើម្បីគ្រប់គ្រងនឹងរិតបន្តឹងវិស័យនេះ។ យោងតាមគម្រោងច្បាប់ថ្មី គេអាចប្រើប្រាស់កញ្ឆាបាន តែក្នុងករណីវេជ្ជសាស្ត្រ ពោលគឺដើម្បីព្យាបាលជំងឺតែប៉ុណ្ណោះ។
អ្នកប្រើប្រាស់កញ្ឆាក្នុងកម្មវត្ថុដើម្បីគ្រាន់តែកម្សាន្តសប្បាយ អាចប្រឈមទោសពិន័យជាប្រាក់ ៦ម៉ឺនបាត។ ចំណែកអ្នកលក់ចែកចាយ ឬអ្នកផ្សព្វផ្សាយពាណិជ្ជកម្មកញ្ឆាវិញ អាចប្រឈមទោសជាប់ពន្ធនាគារដល់១ឆ្នាំ និងពិន័យជាប្រាក់ ១សែនបាត។ការដាំដំណាំកញ្ឆា នឹងលែងសេរីទៀតហើយ គឺត្រូវតែទទួលបានការអនុញ្ញាតពីអាជ្ញាធរ។ អ្នកដាំដោយគ្មានការអនុញ្ញាត អាចប្រឈមទោសជាប់ពន្ធនាគារពី ១ទី៣ឆ្នាំ និងពិន័យជាប្រាក់ ពី២ម៉ឺន ទៅ៣សែនបាត។
អត្ថបទគម្រោងច្បាប់ថ្មីនេហ ត្រូវបានបង្ហោះផ្សាយនៅលើគេហទំព័រ របស់ក្រសួងសុខាភិបាលថៃ ដើម្បីឲ្យប្រជាជនថៃទូទៅ ចូលរួមបញ្ចេញមតិ តាមរយៈសារប្រតិកម្ម គាំទ្រ ឬរិះគន់កែលម្អ ចាប់ពីពេលនេះ រហូតដល់ថ្ងៃ២៣មករា។ បន្ទាប់មកទៀត ទើបរដ្ឋាភិបាលថៃ ប្រមូលយកមតិទាំងអស់មកពិចារណា មុននឹងរុញបញ្ជូនគម្រោងច្បាប់របស់ខ្លួន ទៅកាន់រដ្ឋសភាប្រជុំពិភាក្សាអនុម័ត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ