រដ្ឋមន្ត្រីការបរទេសកូរ៉េខាងជើង ធ្វើដំណើរទៅរុស្ស៊ីតាមការអញ្ជើញរបស់លោកប្រមុខការទូតរុស្ស៊ី
បន្ទាប់ពីបានបាញ់មីស៊ីលបាលីស្ទីកថ្មីមួយគ្រាប់ទៀត កាលពីថ្ងៃអាទិត្យទី១៤មករា ផ្អែកតាមការផ្សាយរបស់បណ្តាញព័ត៌មានផ្លូវការកូរ៉េខាងជើង លោកស្រីរដ្ឋមន្ត្រីកូរ៉េខាងជើង ត្រូវធ្វើដំណើរទៅទស្សនកិច្ចផ្លូវការនៅរុស្ស៊ី ចាប់ពីថ្ងៃទី១៥ ដល់១៧មករា។ គួរកត់សំគាល់ថា ទំនាក់ទំនងរវាងរុស្ស៊ីនិងកូរ៉េខាងជើង បានបង្ហាញភាពស្អិតល្មួត ខ្លាំងឡើងៗ។ សហរដ្ឋអាមេរិកបានថ្កោលទោសកូរ៉េខាងជើង ថាបានជួយផ្តល់សព្វាវុធទៅឲ្យរុស្ស៊ី ដើម្បីធ្វើសង្គ្រាមនៅអ៊ុយក្រែន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៣
ទីភ្នាក់ងារព័ត៌មានផ្លូវការកូរ៉េខាងជើង KCNA បានផ្សាយឲ្យដឹងថា ចាប់ពីថ្ងៃទី ១៥ ដល់ ១៧មករា លោកស្រី Choe Son Hui រដ្ឋមន្ត្រីកាបរទេសសាធារណរដ្ឋប្រជាមានិតប្រជាធិបតេយ្យកូរ៉េ នឹងទៅបំពេញទស្សនកិច្ចផ្លូវការនៅរុស្ស៊ី។ ជាទស្សនកិច្ច ធ្វើឡើងតាមការអញ្ជើញ ពីលោកប្រមុខការទូតរុស្ស៊ី Sergueï Lavrov។
គិតត្រឹមពេលនេះ មិនទាន់មានការបញ្ជាក់លំអិតណាមួយ ស្តីពីកម្មវិធីនៃទស្សនកិច្ច និងថាតើរដ្ឋមន្ត្រីការបរទេសកូរ៉េខាងជើង នឹងត្រូវទៅជួបថ្នាក់ដឹកនាំរុស្ស៊ី ណាខ្លះទេ។
យ៉ាងណាក៏ដោយ គេសង្កេតឃើញថា ទំនាក់ទំនងរវាងរុស្ស៊ី និងកូរ៉េខាងជើង កាន់តែស្អិតល្មួតលែងលាក់លៀមទៀតហើយ ជាពិសេសបន្ទាប់ពី មេដឹកនាំកូរ៉េខាងជើង គីម ជុងអ៊ុន បានទៅជួបលោកពូទីន នៅឯទីក្រុង Vladivostok កាលពីខែកញ្ញាឆ្នាំ២០២៣។ ហើយប៉ុន្មានខែមកនេះ មន្ត្រីជាន់ខ្ពស់រុស្ស៊ីជាច្រើននាក់ បានធ្វើដំណើរទៅព្យុងយ៉ាង ដែលគេជឿថា ទៅដើម្បីនិយាយអំពីផែនការយកអាវុធកូរ៉េខាងជើង ទៅធ្វើសង្គ្រាមនៅអ៊ុយក្រែន។
យ៉ាងណាមិញ កាលពីដើមខែមករានេះ សេតវិមានអាមេរិក បានចោទថា កូរ៉េខាងជើង បានប្រគល់មីស៊ីលបាលីស្ទីកជាច្រើនគ្រាប់ ព្រមទាំងប្រព័ន្ធបាញ់ប្លោងផង ទៅឲ្យកងទ័ពរុស្ស៊ី។ ផ្អែកតាមមន្ត្រីអាមេរិកដែរ មីស៊ីលកូរ៉េខាងជើង ដែលអាចរត់បានចំងាយ ៩០០គីឡូម៉ែត្រ ត្រូវបានរុស្ស៊ីយកទៅប្រើរួចហើយ ដើម្បីបាញ់ប្លោងទៅលើអ៊ុយក្រែន។
ការខិតចូលជិតគ្នា ផ្នែកយោធា រវាងរុស្ស៊ីនិងកូរ៉េខាងជើងនេះ បានធ្វើឲ្យអាមេរិកនិងកូរ៉េខាងត្បូងមានការព្រួយបារម្ភជាខ្លាំង។ នៅខែតុលាឆ្នាំ២០២៣ សហរដ្ឋអាមេរិកបានអះអាងថា កូរ៉េខាងជើងបានបញ្ជូនសម្ភារៈយោធា និងគ្រាប់កាំភ្លើងចំនួន ១០០០កុងទឺនឺ ទៅឲ្យរុស្ស៊ី។ ចំណែកកូរ៉េខាងត្បូងវិញ បានអះអាងដែរថា គេមានភស្តុតាងជាក់ច្បាស់ បញ្ជាក់ថា កូរ៉េខាងជើងបានប្រគល់គ្រាប់កាំភ្លើងត្បាល់ជាង១លានគ្រាប់ទៅឲ្យរុស្ស៊ី ជាថ្នូរនឹងការជួយពីរុស្ស៊ី ក្នុងផ្នែកបច្ចេកវិទ្យាបង្ហោះផ្កាយរណប។ កាលពីចុងឆ្នាំ២០២៣ កូរ៉េខាងជើង បានបាញ់បង្ហោះបានជោគជ័យ នូវផ្កាយរណបយោធាឈ្លបយកការណ៍របស់ខ្លួន បន្ទាប់ពីបានបរាជ័យ២លើក។
គួរកត់សំគាល់ដែរថា គេសង្កេតឃើញថាកូរ៉េខាងជើងបញ្ចេញឫកខែងរែង កាន់តែខ្លាំងមួយរយៈចុងក្រោយនេះ បែបប្រហែលជាសប្បាយចិត្ត ដោយសារខ្លួនមានទំនាក់ទំនងស្និទ្ធស្នាល ជាមួយរុស្ស៊ី។ ក្រោយពីបានធ្វើសមយុទ្ធបាញ់គ្រាប់ពិត កៀកបំផុតនឹងកោះមួយរបស់កូរ៉េខាងត្បូង នៅថ្ងៃអាទិត្យទី១៤មករា កូរ៉េខាងជើងបានបាញ់មីស៊ីលបាលីស្ទីកមួយគ្រាប់ថែមទៀត ចូលទៅក្នុងសមុទ្រជប៉ុន។ មិនត្រឹមប៉ុណ្ណោះទេ មេដឹកនាំផ្តាច់ការ គីម ជុងអ៊ុង បានប្រកាសចាត់ទុកថា កូរ៉េខាងត្បូងគឺជាសត្រូវដ៏ធំមួយរបស់កូរ៉េខាងជើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ