កោះណូរូ ផ្តាច់ទំនាក់ទំនងទូតជាមួយតៃវ៉ាន់ ហើយងាកទៅទទួលស្គាល់តែចិន
កាលពីថ្ងៃចន្ទ ទី១៥មករា ប្រទេសណូរូ ដែលជាកូនកោះមួយក្នុងមហាសមុទ្រប៉ាស៊ីហ្វិក បានប្រកាសផ្តាច់ទំនាក់ទំងការទូតទាំងស្រុងជាមួយតៃវ៉ាន់ ហើយងាកទៅទទួលស្គាល់សាធារណរដ្ឋប្រជាមានិតចិនតែមួយប៉ុណ្ណោះ។ ក្រោយការប្រកាសនេះ រដ្ឋាភិបាលតៃវ៉ាន់ បានអះអាងថា ច្បាស់ណាស់ គឺចិនបានប្រើប្រាស់ជំនួយសេដ្ឋកិច្ច ដើម្បីដាក់សំពាធទៅលើប្រទេសកូនកោះនេះ ឲ្យឈប់ទទួលស្គាល់តៃវ៉ាន់។
ចុះផ្សាយនៅថ្ងៃ៖
ស្តាប់ - ០២:១៨
រដ្ឋាភិបាល កោះណូរូ បានចេញលិខិតប្រកាសថា ចាប់ពីពេលនេះតទៅ ប្រទេសណូរូ នឹងលែងទទួលស្គាល់តៃវ៉ាន់ ជាប្រទេសដាច់ដោយឡែក តទៅទៀតហើយ។ ពីថ្ងៃនេះទៅ ណូរូចាត់ទុកតៃវ៉ាន់ គ្រាន់តែជាដែនដីមួយរបស់ចិន ដោយមិនអាចផ្តាច់ចេញបាន។ ដូច្នេះ ទំនាក់ទំនងគ្រប់វិស័យទាំងអស់ ជាមួយតៃវ៉ាន់ នឹងត្រូវបិទបញ្ចាប់ ហើយទៅថ្ងៃអនាគត ណូរូនឹងមិនអភិវឌ្ឍន៍ទំនាក់ទំនងផ្លូវការ ឬ ការដោះដូរពាណិជ្ជកម្មជាផ្លូវការ ជាមួយតៃវ៉ាន់តទៅទៀតឡើយ។
ការប្រកាសរបស់រដ្ឋាភិបាលណូរូនេះ ត្រូវបានក្រសួងការបរទេសចិនអបអរសាទរ ថាវាជាការសម្រេចចិត្តដ៏ត្រឹមត្រូវ។ នៅលើបណ្តាញសង្គម Facebook លោកប្រធានាធិបតីណូរូ David Adeang បានបង្ហោះសារបញ្ជាក់ ណូរូបានសម្រេចចិត្ត ប្រកាសទទួលស្គាល់ សាធារណរដ្ឋប្រជាមានិតចិនតែមួយប៉ុណ្ណោះ។
ភ្លាមៗក្រោយដំណឹងនេះ រដ្ឋាភិបាលតៃវ៉ាន់ បានបញ្ជាក់ឲ្យដឹងថា សាធារណរដ្ឋចិន ដែលជាឈ្មោះផ្លូវការរបស់តៃវ៉ាន់ នឹងបិទបញ្ចប់ទំនាក់ទំនងទាំងអស់ជាមួយកោះណូរូ។ ថ្លែងក្នុងសន្និសីទកាសែត នៅព្រឹកថ្ងៃចន្ទទី១៥មករា លោក Tien Chung-Kwang អនុរដ្ឋមន្ត្រីការបរទេសតៃវ៉ាន់ បានលើកឡើងចាប់ពីពេលនេះទៅ តៃវ៉ាន់សូមបិទបញ្ចប់ទំនាក់ទំនងការទូតជាមួយកោះណូរូ ដើម្បីរក្សាការពារកិត្តិយសជាតិ និងភាពថ្លៃថ្នូររបស់តៃវ៉ាន់។
លោកអនុរដ្ឋមន្ត្រីការបរទេសតៃវ៉ាន់ បានអះអាងទៀតថា ក្នុងរយៈពេលកន្លងមកនេះ ចិនបានព្យាយាមប្រើគ្រប់មធ្យោបាយ ដើម្បីបញ្ចុះបញ្ចូល អូសទាញថ្នាក់ដឹកនាំកោះណូរូ ឲ្យឈប់ទទួលស្គាល់តៃវ៉ាន់ជាផ្លូវការតទៅទៀត។ តៃវ៉ាន់អះអាងថា ចិនបានប្រើប្រាស់ ប្រាក់ជំនួយសេដ្ឋកិច្ច ដើម្បីទិញទឹកចិត្តថ្នាក់ដឹកនាំប្រទេសកូនកោះ ដែលមានប្រជាជនត្រឹមតែ ជាង១២០០០នាក់នេះ។
សូមបញ្ជាក់ថា គិតចាប់ពីពេលនេះទៅ គឺនៅសល់ប្រទេសតែ១២ប្រទេសប៉ុណ្ណោះ ដែលទទួលស្គាល់តៃវ៉ាន់ជាផ្លូវការ ក្នុងក្របខណ្ឌសហប្រតិបត្តិការអន្តរជាតិ។ កាលពីឆ្នាំ២០១៩ កោះសាឡូមុន ដែលជាប្រទេសកូនកោះមួយទៀត នៅក្នុងមហាសមុទ្រប៉ាស៊ីហ្វិកដែរ បានប្រកាសផ្តាច់ទំនាក់ទំនងការទូតជាផ្លូវការជាមួយតៃវ៉ាន់ ហើយបានងាកទៅទទួលស្គាល់ចិនតែមួយ។ គម្រោងសាងសង់ហេដ្ឋារចនាសម្ព័ន្ធ មានតម្លៃរាប់រយលានរបស់កោះសាឡូមុន គឺបានមកពីប្រាក់ជំនួយរបស់ចិន ដែលគេជឿថា គឺជាវិធីលួងលោមទិញទឹកចិត្ត ឲ្យប្រទេសកូនកោះនេះដោះដៃចោលតៃវ៉ាន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ