លោក គីមជុងអ៊ុនព្រមានកូរ៉េខាងត្បូងពីការផ្ទុះសង្រ្គាម បើសិនជាហ៊ានរំលោភកូរ៉េខាងជើងតែមួយចំអាម
មេដឹកនាំកូរ៉េខាងជើង លោកគីម ជុងអ៊ុនព្រមានកូរ៉េខាងត្បូងពីការប្រកាសសង្រ្គាម បើសិនជាកូរ៉េខាងត្បូងហ៊ានតែរំលោភដែនដីកូរ៉េខាងជើងសូម្បីតែមួយចំអាម។ នេះបើតាមការចុះផ្សាយរបស់ទីភ្នាក់ងារព័ត៌មានផ្លូវរដ្ឋកូរ៉េខាងជើងKCNA នៅថ្ងៃអង្គារទី ១៦មករានេះ។ នៅមុនពាក្យព្រមានរបស់លោក គីម ជុងអ៊ុន សភាជាន់ខ្ពស់របស់កូរ៉េខាងជើង នៅថ្ងៃអង្គារនេះ បានបោះឆ្នោតរំលាយចោលទីភ្នាក់ងារជាច្រើនដែលទទួលបន្ទុកការផ្សះផ្សារជាមួយកូរ៉េខាងត្បូង។ នៅសេអ៊ូល លោកប្រធានាធិបតី យូន សុខយោលប្រតិកម្មទៅវិញថា នឹងវាយបករាល់ការញុះញង់របស់កូរ៉េខាងជើង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:២៣
មេដឹកនាំរបស់ បងប្អូនសត្រូវកូរ៉េកំពុងផ្ទុះសង្រ្គាមពាក្យសំដីដ៏គួរឲ្យព្រួយបារម្ភ។ នៅថ្ងៃចន្ទម្សិលមិញ មេដឹកនាំកូរ៉េខាងជើង គីម ជុងអ៊ុនបានគំរាមកូរ៉េខាងត្បូងពីការប្រកាសសង្រ្គាម បើសិនកូរ៉េខាងត្បូងហ៊ានរំលោភដែនដី ដែនអាកាស ឬដែនសមុទ្ររបស់កូរ៉េខាងជើងសូម្បីតែមួយចំអាម។
នៅក្នុងសារថ្លែងទៅកាន់សភាកូរ៉េខាងជើង មេដឹកនាំកូរ៉េខាងជើងបានបញ្ជាឲ្យមានវិធានការថ្មី ដើម្បីកំណត់ថា កូរ៉េខាងត្បូងជាប្រទេសដែលប្រឆាំង រករឿងកូរ៉េខាងជើង។ យោងតាមការចុះផ្សាយរបស់ទីភ្នាក់ងារព័ត៌មានរដ្ឋកូរ៉េខាងជើង KCNA លោកគីម ជុងអ៊ុនបានផ្តល់យោបល់ផងដែរឲ្យសភាសរសេរបញ្ជាក់ នៅក្នុងរដ្ឋធម្មនុញ្ញស្តីពីចូលកាន់កាប់ទាំងស្រុង ការវាយចូលគ្រប់គ្រងសាធារណរដ្ឋកូរ៉េ ឬការកាត់យកកូរ៉េខាងត្បូងមកធ្វើជាទឹកដីកូរ៉េខាងជើងតែម្តង នៅក្នុងករណីដែលមានផ្ទុះសង្រ្គាម នៅឧបទ្វីបកូរ៉េ។
គួរបញ្ជាក់ថា នៅក្នុងរដ្ឋធម្មនុញ្ញរៀងៗខ្លួន ប្រទេសកូរ៉េទាំងពីរតែងទាមទារគ្រប់គ្រងដែនអធិបតេយ្យភាពទាំងស្រុងរបស់ឧបទ្វីបកូរ៉។ នៅថ្ងៃចន្ទ មេដឹកនាំកូរ៉េខាងជើងប្រកាសមិនទទួលស្គាល់ខ្សែបន្ទាត់ដែនទឹកខាងជើង ដែលពុះខ័ណ្ឌកូរ៉េទាំងពីរ តាំងពីសម័យសង្រ្គាមកូរ៉េ។
ប្រតិកម្មនឹងពាក្យព្រមានរបស់មេដឹកនាំកូរ៉េខាងជើង ប្រធានាធិបតីកូរ៉េខាងត្បូង លោកយូន សុខយោលបានតបវិញថា សេអ៊ូលនឹងវាយបករាល់សកម្មភាពញុះញង់របស់កូរ៉េខាងជើង ព្រោះថា កងទ័ពកូរ៉េខាងត្បូងមានសមត្ថភាពពេញទំហឹង។
នេះមិនមែនជាលើកទី១ទេ ដែល ភាគីជម្លោះបងប្អូនកូរ៉េទាំងពីប្រើពាក្យសំដីគំរាមវាយកំទេចគ្នាទៅវិញ ទៅមក។ នៅដើមខែមករានេះ មេដឹកនាំកូរ៉េខាងជើងធ្លាប់បានប្រកាសចាត់ទុកកូរ៉េខាងត្បូងជាសត្រូវចំបង និងទាត់ចោលរាល់ការប្រឹងប្រែងដើម្បីបង្រួបបង្រួមផ្សះផ្សា ដែលលោកចាត់ទុកថា ជាកំហុសដែលកូរ៉េខាងជើងមិនអាចធ្វើជាលើកទី២។
ជាលទ្ធផល សភាកូរ៉េខាងជើងបោះឆ្នោត រំលាយចោលគ្រប់ស្ថាប័ន ទីភ្នាក់ងារ ដែលធ្វើការទៅលើការបង្រួបបង្រួមផ្សះផ្សាបងប្អូនកូរ៉េទាំងពីរ។ “ដោយសារប្រទេសទាំងពីរកំពុងប្រឈមតទល់គ្នាយ៉ាងស្រួចស្រាវ ការផ្សះផ្សាជាមួយសាធារណរដ្ឋកូរ៉េ ឬកូរ៉េខាងត្បូង ជារឿងមួយដែលមិនអាចកើតឡើងទៅរួច។
ស្ថានការណ៍នៅឧបទ្វីបកូរ៉េតានតឹងខ្លាំងឡើងៗ គិតចាប់តាំងពីកូរ៉េខាងជើងបញ្ជូនដោយជោគជ័យ ផ្កាយរណបយកការណ៍សម្ងាត់ទៅក្នុងគន្លងតារាវិថី ដែលកូរ៉េខាងត្បូងវាយតម្លៃថា បានទទួលជំនួយបច្ចេកវិទ្យាពីរុស្ស៊ី។ ដោយសារការផ្គើនបាញ់សាកល្បងមីស៊ីល និងការបាញ់បង្ហោះផ្កាយរណបរបស់កូរ៉េខាងជើង ប្រធានាធិបតីកូរ៉េខាងត្បូង ដែលមានជំហរអភិរក្សនិយម ប្រកាសផ្អាក ព្យួរកិច្ចព្រមព្រៀងយោធា ដែលគេបង្កើតឡើង នៅឆ្នាំ ២០១៨ នៅក្នុងគោលដៅបន្ថយភាពតានតឹងរវាងកូរ៉េទាំងពីរ។
នៅចុងឆ្នាំមុន បន្ទាប់ពីបាញ់សាកល្បងមីស៊ីលបាលីស្ទិក ជាញយដង លោកគីម ជុងអ៊ុននៅបានអំពាវនាវឲ្យកូរ៉េខាងជើងពន្លឿនលក្ខណៈត្រៀមសង្រ្គាម ព្រោះថា ស្ថានការណ៍នយោបាយ និងយោធានៅឧបទ្វីបកូរ៉េកាន់តែធ្លាក់ចុះដុនដាបដល់កំពូល ដោយសារតែ សមយុទ្ធយោធារបស់អាមេរិក និងកូរ៉េខាងត្បូង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ