តុលាការប៉ាគីស្ថានកាត់ទោសអតីតនាយករដ្ឋមន្ត្រី ខណៈបេក្ខជនប្រឆាំងត្រូវសម្លាប់និងរបួស
នៅប៉ាគីស្ថាន ស្របពេលដែលការបោះឆ្នោតកាន់តែខិតកៀកចូលជិតមកដល់ អំពើហិង្សានិងការសម្លាប់មនុស្ស ក៏បានផុសឡើងព្រោងព្រាត។ នៅថ្ងៃពុធ ទី៣១មករា បេក្ខជនតំណាងរាស្ត្រម្នាក់ មកពីគណបក្សប្រឆាំង ត្រូវគេវាយសម្លាប់ ហើយបេក្ខជនឈរឈ្មោះបោះឆ្នោត២រូបទៀត រងរបួសធ្ងន់។ ចំណែក អតីតនាយករដ្ឋមន្ត្រី អ៊ីមរ៉ាន់ ខាន់ ជាបុគ្គលប្រឆាំងនឹងរដ្ឋអំណាច ក៏ត្រូវតុលាការកាត់ទោសបន្ថែមទៀត ឲ្យជាប់ពន្ធនាគារ ចំនួន ១៤ ឆ្នាំ។
ចុះផ្សាយនៅថ្ងៃ៖
ស្តាប់ - ០២:៤៧
១៤ ឆ្នាំ ក្រោយចម្រឹងដែក ពីបទប្រព្រឹត្តអំពើពុករលួយ។ នេះជាស្ថានទម្ងន់ទោសចំពោះ អតីតនាយករដ្ឋមន្ត្រី អ៊ីមរ៉ាន់ ខាន់ ដែលត្រូវ តុលាការប៉ាគីស្ថាន កាត់ទោស នៅថ្ងៃពុធ ទី៣១មករា។ សាលក្រមនេះ បន្ទាប់ពីថ្ងៃអង្គារ ទី៣០មករា តុលាការបានសម្រេចផ្តន្ទាទោសរូបលោកម្តងហើយ ចំនួន១០ឆ្នាំក្នុងពន្ធនាគារ ចំពោះបទល្មើសចែកចាយឯកសារសម្ងាត់ជាតិ។ ភរិយារបស់លោក អ៊ីមរ៉ាន់ ខាន់ ក៏ត្រូវតុលាការដាក់ទោសពន្ធនាគារ ១៤ឆ្នាំដូចស្វាមីដែរ ។
អ្នកនាំពាក្យរបស់ គណបក្សប្រឆាំង ប៉េតេអ៊ី ជាបក្សរបស់លោក អ៊ីមរ៉ាន់ ខាន់ បានថ្លែងប្រាប់បណ្តាញសារព័ត៌មាន ថា «សាលក្រមដូច្នេះ មិនអាចទទួលបានសោះឡើយ ហើយថ្ងៃជម្រះក្តីនេះជាទិវាខ្មៅងងឹតនៃប្រព័ន្ធយុត្តិធម៌ប៉ាគីស្ថាន។»
បើតាមអ្នកជំនាញកិច្ចការប៉ាគីស្ថាន អតីតនាយករដ្ឋមន្ត្រី អ៊ីមរ៉ាន់ ខាន់ ត្រូវរងការធ្វើទុក្ខបុកម្និញពីប្រព័ន្ធតុលាការ ជាការបង្កឡើងពីពួកយោធា។ ពួកយោធា ដែលរារាំងមិនចង់ឲ្យរូបលោកវិលត្រឡប់មកកាន់អំណាចជាថ្មីឡើងវិញ។ ទុក្ខសោកមិនមែនធ្លាក់មកត្រឹមតែថ្នាក់ដឹកនាំបក្សទេ បេក្ខជនឈរឈ្មោះបោះឆ្នោតនិងអ្នកគាំទ្រនយោបាយផ្សេងទៀត ក៏ត្រូវរងការវាយប្រហារ រងរបួសហូរហែដែរ នៅកន្លែងជាច្រើន ក្នុងប្រទេស ប៉ាគីស្ថាន។
ជាក់ស្តែង បេក្ខជនម្នាក់ ឈរឈ្មោះបោះឆ្នោតសមាជិកសភា ត្រូវគេវាយសម្លាប់យ៉ាងហិង្សានៅក្នុងរថយន្ត ក្រោយពីលោកត្រឡប់មកពីកម្មវិធីឃោសនាបោះឆ្នោត។ ឃាតកម្មនេះ កើតឡើង នៅស្រុកបាឈួរ ជិតព្រំដែនអាហ្វហ្កានីស្ថាន កាលពីថ្ងៃពុធ។ ថ្ងៃពុធដដែល បេក្ខជនឈររបស់បក្សប្រឆាំង ២ នាក់ទៀត ត្រូវរងការវាយប្រហារនៅក្រុងហ្កេត្តា ប៉ែកនីរតីនៃផ្ទៃប្រទេស។ ក្នុងតំបន់ដដែលនេះ កាលនៅថ្ងៃអង្គារ មានស្លាប់មនុស្ស៤នាក់ ហើយ៦នាក់រងរបួស ព្រោះតែផ្ទុះគ្រាប់បែក១ នៅក្បែរនឹងកន្លែងជួបជុំគ្នារបស់គណបក្សប្រឆាំង ។ នៅក្បែរព្រំដែនអ៊ីរ៉ង់ សមាជិកបក្សប្រឆាំងម្នាក់ ត្រូវគេបោកគ្រាប់បែកក្នុងផ្ទះតែម្តង នៅថ្ងៃពុធ។
ប៉ាគីស្ថានប្រឈមមុខនឹងបញ្ហាអសន្តិសុខខ្លាំងៗឡើង ចាប់តាំងពីពួកតាលីបង់ បានឡើងកាន់អំណាច ឆ្នាំ២០២១ នៅអាហ្វហ្កានីស្ថាន ក្បែររបងប៉ាគីស្ថាន។ ជាក់ស្តែង យ៉ាងមនុស្ស ១ ៥០០ នាក់ត្រូវគេសម្លាប់ គ្រាន់តែ១ឆ្នាំ ២០២៣។ នេះបើតាមមជ្ឈមណ្ឌលស្រាវជ្រាវនិងសិក្សាអំពីសន្តិសុខ មូលដ្ឋាននៅទីក្រុងអ៊ីស្លាម៉ាបាត។
ប្រឈមនឹងអំពើហិង្សាផ្ទួនៗ គណៈកម្មាធិការជាតិរៀបចំបោះឆ្នោតនៅប៉ាគីស្ថាន បានកោះប្រជុំជាបន្ទាន់ ជាមួយនឹងអ្នកតំណាងរដ្ឋាភិបាល និងក្រុមអ្នកស៊ើបការណ៍សម្ងាត់ ដើម្បីរៀបចំផែនសន្តិសុខសុវត្ថិភាព ក្នុងការបោះឆ្នោត។ ការបោះឆ្នោតថ្នាក់ជាតិនិងថ្នាក់ខេត្ត នឹងត្រូវរៀបចំនៅថ្ងៃទី ៨ កុម្ភៈខាងមុខ ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ