ថៃ៖ លោកថាក់ស៊ីន ត្រូវគេដោះលែងឲ្យមានសេរីភាពវិញ
លោកថាក់ស៊ីន ស៊ីណាវ៉ាត្រ អតីតនាយករដ្ឋមន្ត្រីថៃ ត្រូវបានគេដោះលែង នៅព្រឹកថ្ងៃអាទិត្យទី១៨កុម្ភៈនេះ បន្ទាប់ពីបានជាប់ឃុំអស់រយៈពេល៦ខែ។ ការដោះលែង ដែលត្រូវបានធ្វើឡើង ដោយអាជ្ញាធរយុត្តិធម៌ថៃអះអាងថា លោកថាក់ស៊ីន បានបំពេញកាតព្វកិច្ចល្អ និងដោយយោងលើកត្តាសុខភាព ព្រមទាំងវ័យចំណាស់របស់លោកផង។ តែគណបក្ស Move Forward ចោទជាសំណួរថា តើលោកថាក់ស៊ីនបានទទួលបុព្វសិទ្ធិពិសេសឬយ៉ាងណា បានជាត្រូវគេដោះលែងមុនកាលកំណត់បែបនេះ?
ចុះផ្សាយនៅថ្ងៃ៖
ស្តាប់ - ០៣:០២
ព្រឹកព្រលឹមស្រាងៗថ្ងៃអាទិត្យទី១៨កុម្ភៈ រថយន្តមួយគ្រឿង បានដឹករូបលោក ថាក់ស៊ីន ស៊ីណាវ៉ាត្រ ចេញពីមន្ទីរពេទ្យនគរបាលក្រុងបាងកក ឆ្ពោះទៅកាន់គេហដ្ឋានលោក។ ក្នុងរថយន្តគេឃើញមានលោកស្រី ភែថងថាន កូនស្រីរបស់លោកថាក់ស៊ីន មកអមដំណើរដែរ។ ផ្អែកតាមអ្នកយកព័ត៌មាន នៅខាងមុខមន្ទីរពេទ្យ មានមនុស្សមួយក្រុម បានមកជួបជុំគ្នា ស្រែកតវ៉ាប្រឆាំងនឹងការដោះលែងលោកថាក់ស៊ីន មុនកាលកំណត់បែបនេះ។
គួរបញ្ជាក់ថា លោកថាក់ស៊ីន ត្រូវតុលាការថៃកាត់ទោសឲ្យជាប់ពន្ធនាគារ៨ឆ្នាំ ពីបទប្រព្រឹត្តិអំពើពុករលួយ និងបំពានអំណាចដោយខុសច្បាប់។ បន្ទាប់ពីបាននិរទេសខ្លួនទៅក្រៅស្រុក អស់រយៈពេល១៥ឆ្នាំ លោកបានសម្រេចចិត្តត្រលប់ចូលស្រុកថៃវិញ កាលពីថ្ងៃទី២២សីហាឆ្នាំ២០២៣។ មកដល់បាងកកភ្លាម លោកត្រូវបានអាជ្ញាធរថៃចាប់ខ្លួនយកទៅអនុវត្តទោស។ តែនៅខែកញ្ញា ព្រះមហាក្សត្រថៃ បានប្រកាសសម្រាលទោសលោក ពី៨ឆ្នាំមកនៅត្រឹម១ឆ្នាំវិញ។
ក្នុងរយៈពេលប្រមាណ៦ខែនៃការអនុវត្តទោសកន្លងមកនេះ តាមពិតទៅលោកថាក់ស៊ីន មិនបានជាប់ក្នុងឃុំនោះទេ គឺលោកត្រូវគេយកទៅសម្រាកនៅមន្ទីរពេទ្យនគរបាលក្រុងបាងកក ដើម្បីតាមដានសុខភាព និងព្យាបាលជំងឺ។ ផ្អែកតាមក្រុមគ្រួសារលោកថាក់ស៊ីន គឺលោកមានជំងឺថប់ដង្ហើមតឹងទ្រូង និងជំងឺលើសឈាម ហើយលោកបានទទួលការវះកាត់ចំនួន២ដង ក្នុងពេលសម្រាកនៅមន្ទីរពេទ្យនគរបាល។
កាលពីដើមខែកុម្ភៈនេះ អាជ្ញាធថៃបានបញ្ជាក់ឲ្យដឹងថា គេគ្រោងនឹងដោះលែងលោកថាក់ស៊ីនឲ្យមានសេរីភាព ដោយសារតែលោកបានបំពេញកាតព្វកិច្ចបានយ៉ាងល្អ និងមួយវិញទៀត ដោយយោងលើវ័យចំណាស់ ព្រមទាំងបញ្ហាសុខភាពរបស់លោកផង។ តែយ៉ាងណា មិនទាន់មានការបញ្ជាក់ឲ្យច្បាស់ណាមួយពីអាជ្ញាធរថៃ ថាលោកថាក់ស៊ីន ត្រូវបានដោះលែងឲ្យមានសេរីភាពទាំងស្រុង រឺក៏ត្រូវឲ្យនៅក្នុងផ្ទះដោយពាក់ខ្សែជើង តាមដានការផ្លាស់ទី ឬយ៉ាងណានោះទេ។
ដោយឡែក គណបក្សMove Forward ដែលជាបក្សប្រឆាំងដ៏ធំបំផុត បានចេញលិខិតប្រកាសមួយ ដោយបានចោទជាសំណួរថា តើលោក ថាក់ស៊ីន បានទទួលចំណាត់ការពិសេសឬយ៉ាងណា បានជាត្រូវគេដោះលែងឲ្យមានសេរីភាព មុនកាលកំណត់បែបនេះ។ លិខិតនេះបន្តថា ប្រទេសថៃត្រូវការពង្រឹងប្រព័ន្ធប្រជាធិបតេយ្យនិងនីតិរដ្ឋ ដោយប្រព័ន្ធយុត្តិធម៌ ត្រូវអនុវត្តច្បាប់ឲ្យបានស្មើៗគ្នាទៅលើមនុស្សទាំងអស់ មិនមែនមានមនុស្សខ្លះ មានអភ័យឯកសិទ្ធិពិសេស លើសមនុស្សផ្សេងទៀតនោះទេ។
គួររំលឹកថា លោកថាក់ស៊ីន ដែលមានអាយុ៧៤ឆ្នាំ ត្រូវបានគេចាត់ទុកថាគឺជាខ្លាចាស់មួយ នៃនយោបាយថៃ។ លោកបានធ្វើជានាយករដ្ឋមន្ត្រីរវាងពីឆ្នាំ២០០១ ដល់២០០៦ មុននឹងត្រូវក្រុមយោធាថៃធ្វើរដ្ឋប្រហារទំលាក់។ បច្ចុចប្បន្នគណបក្សភឿថៃរបស់លោក ត្រូវដឹកនាំដោយកូនស្រីលោក ឈ្មោះ ភែថងថាន ស៊ីណាវ៉ាត្រ។ មតិវិភាគខ្លះបានលើកឡើងថា លោកថាក់ស៊ីនបានត្រឡប់ចូលស្រុកវិញ បន្ទាប់ពីគណបក្សភឿថៃ បានចរចាដោយសំងាត់ ជាមួយក្រុមយោធានិងក្រុមរាជានិយមថៃ។ តែដោយឡែក ផ្អែកតាមលោក សេដ្ឋា ថៈវីស៊ីន នាយករដ្ឋមន្ត្រីថៃបច្ចុប្បន្ន គឺលោកថាក់ស៊ីន គ្មានចេតនាត្រឡប់មកធ្វើនយោបាយវិញឡើយ តែលោកនឹងត្រៀមខ្លួនជានិច្ច ដើម្បីផ្តល់ជាគំនិតយោបល់ ដល់សមាជិករដ្ឋាភិបាល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ