នៅពេលជនជាតិចិនក្លាយជាគោលដៅវាយប្រហារភេរវកម្មអត្តឃាតនៅប៉ាគីស្ថាន
នៅប៉ាគីស្ថាន ក្រុមហ៊ុនចិនប្រកាសផ្អាកការដ្ឋានសាងសង់ទំនប់វារីអគ្គិសនីចំនួន២កន្លែង នៅភាគខាងជើងប្រទេស បន្ទាប់ពីភេរវកម្មអត្តឃាតបានសម្លាប់វិស្វករចិន ៥នាក់ កាលពីថ្ងៃអង្គារកន្លងទៅ។ នេះបើតាមការអះអាងរបស់អ្នកទទួលខុសត្រូវរបស់ខេត្ត Khyber Pakhtunkhwa។ ប៉ាគីស្ថានបានទទួលប្រយោជនរាប់ពាន់លានដុល្លាពីគម្រោងការវិនិយោគផ្លូវមួយ ខ្សែក្រវ៉ាត់មួយរបស់ចិន ប៉ុន្តែ ប៉ាគីស្ថាននៅតែមិនទាន់អាចធានាសុវត្ថិភាពឲ្យក្រុមហ៊ុន បុគ្គលិកចិនដែលឈរជើងប្រចាំការ នៅប៉ាគីស្ថាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:៥៥
យោងតាមអ្នកទទួលខុសត្រូវរបស់ក្រសួងមហាផ្ទៃប្រចាំខេត្ត Khyber Pakhtunkhwa ក្រុមហ៊ុនចិនបានផ្អាកការងារនៅការដ្ឋានសង់ទំនប់វារីអគ្គិសនីនៅ Dasu និងDiamer Bhasha នៅភាគខាងជើង ប៉ាគីស្ថាន តាំងពីថ្ងៃពុធ ទី ២៨ ពោលគឺនៅមួយថ្ងៃក្រោយដែលវិស្វករចិន៥នាក់ ដែលធ្វើការនៅការដ្ឋានទំនប់វារីអគ្គិសនី Dasu ស្លាប់នៅក្នុងការវាយប្រហារភេរវកម្មអត្តឃាត។
នៅថ្ងៃអង្គារទី ២៦មីនា ភេរវជនអត្តឃាតបានបើករថយន្តទៅបំផ្ទុះខ្លួន នៅកណ្តាលក្បួនរថយន្តដែលដឹកបុគ្គលិករបស់ក្រុមហ៊ុនចិន។ កម្លាំងផ្ទុះបណ្តាលឲ្យរថយន្តមួយគ្រឿងដឹកវិស្វករចិន៥នាក់ និងអ្នកបើកបរជនជាតិប៉ាគីស្ថាន ធ្លាក់ផ្ទុះ នៅក្នុងជ្រលងភ្នំ។
យោងតាមអ្នកទទួលខុសត្រូវប៉ាគីស្ថាន នៅក្រោយពីមានភេរវកម្មអត្តឃាតសម្លាប់វិស្វកររបស់ខ្លួន កាលពីថ្ងៃអង្គារ ក្រុមហ៊ុនចិនដែលទទួលបន្ទុកសាងសង់ទំនប់វារីអគ្គិសនី នៅ Dasu និងDiamer Bhasha បានប្រកាសផ្អាកសកម្មភាពសាងសង់ និងទាមទារផែនការការពារសុវត្ថិភាពពីរដ្ឋាភិបាលប៉ាគីស្ថាន។ បើតាមក្រុមហ៊ុនចិន នៅក្នុងអំឡុងពេលរង់ចាំការធានាសុវត្ថិភាពមធ្យ័ត ពីសំណាក់អាជ្ញាធរប៉ាគីស្ថាន វិស្វករចិនប្រមាណ ១២៥០នាក់ ត្រូវស្ថិតនៅក្នុងជំរំស្នាក់នៅ មិនអាចដើរចេញទៅក្រៅដាច់ខាត ដើម្បីសុវត្ថិភាព។
ការដ្ឋានសាងសង់ទំនប់វារីអគ្គិសនី នៅ Dasu និងDiamer Bhasha ជាគម្រោងការវិនិយោគមួយសំខាន់របស់ចិន នៅប៉ាគីស្ថាន។ គិតចាប់តាំងពីឆ្នាំ ២០១៥ ប៉ាគីស្ថានបើកផ្លូវឲ្យចិន បោះទុនវិនិយោគលើហេដ្ឋារចនាសម្ព័ន្ធរបស់ខ្លួនជាច្រើន ដូចជា រោងចក្រផលិតអគ្គិសនី កំពង់ផែ និងគម្រោងសាងសង់ផ្លូវដឹកជញ្ជូនជាច្រើននៅប៉ាគីស្ថាន។
ជាអ្នកទទួលបានប្រយោជន៍ពីទឹកប្រាក់វិនិយោគរាប់ពាន់លានដុល្លារពីគម្រោងផ្លូវមួយ ខ្សែក្រវ៉ាត់មួយរបស់ចិន ប៉ាគីស្ថានកាលពីថ្ងៃពុធបានប្រកាសពង្រឹងសន្តិសុខ នៅតាមការដ្ឋានសាងសង់ហេដ្ឋារចនាសម្ព័ន្ធជាង ២០កន្លែង នៅខេត្តភាគខាងជើង ជាទីដែលកើតមានភេរវកម្មអត្តឃាតសម្លាប់ជនជាតិចិន។ នៅថ្ងៃពុធ រដ្ឋមន្រ្តីក្រសួងមហាផ្ទៃប៉ាគីស្ថាន នៅបានទៅចូលរួមសំដែងទុក្ខសោកជាមួយឯកអគ្គរដ្ឋទូតចិន នៅអ៊ីស្លាម៉ាបាត។
រដ្ឋមន្រ្តីក្រសួងព័ត៌មានប៉ាគីស្ថានវិញនៅបានសន្យាសើរើដំណើរការរក្សាសន្តិសុខ ដើម្បីស្វែងរកចំណុចខ្សោយ និងការខ្វះចន្លោះ ដែលអនុញ្ញាតក្រុមអត្តឃាតជនអាចធ្វើភេរវកម្មសម្លាប់វិស្វករចិន។ ពីទីក្រុងប៉េកាំង អ្នកនាំពាក្យរបស់ក្រសួងការបរទេសចិនថ្កោលទោសការវាយប្រហារភេរវកម្មសម្លាប់ជនជាតិចិន។ សម្រាប់អ្នកនាំពាក្យចិន មិត្តភាពប៉ាគីស្ថាន និងចិន ជាមិត្តភាពដែកថែប ប៉ុន្តែ ប៉ាគីស្ថានត្រូវតែស៊ើបអង្កេត ស្វែងរកឃើញ មុខអ្នកទទួលខុសត្រូវលើការវាយប្រហារភេរវកម្មសម្លាប់វិស្វករចិន។
ក្រុមតាលីបង់ប៉ាគីស្ថាន ដែលសកម្ម និងធ្លាប់វាយប្រហារផលប្រយោជន៍របស់ចិន នាពេលកន្លងមក នៅតំបន់ភាគខាងជើងប៉ាគីស្ថាន បានចេញមុខបដិសេធភ្លាមៗថា ភេរវកម្មអតុ្តឃាតកាលពីថ្ងៃអង្គារមិនមែនជាស្នាដៃរបស់ក្រុមខ្លួន។
ទោះក្រុមតាលីបង់ប៉ាគីស្ថានមិនចេញមុខទទួលខុសត្រូវលើការវាយប្រហារភេរវកម្ម ប៉ុន្តែ នៅប៉ាគីស្ថាន កន្លងមក បុគ្គលិកជនជាតិចិនធ្លាប់ជាផ្ទាំងស៊ីបវាយប្រហាររបស់ក្រុមជនប្រដាប់អាវុធ ដែលអរិភាព មិនស្វាគមវត្តមានជនបរទេសនៅក្នុងទឹកដីប៉ាគីស្ថាន។ ក្រុមខ្លះធ្លាប់តវ៉ាថា ប៉ាគីស្ថានចាញ់ប្រៀប នៅក្នុងការវិនិយោគជាមួយចិន និងថា ប្រជាជនដែលរស់នៅក្នុងតំបន់ដែលមានគម្រោងសាងសង់របស់ក្រុមហ៊ុនចិន តាមពិតមិនដែលបានទទួលប្រយោជន៍អ្វីទាំងអស់។
ភេរវកម្មអត្តឃាតសម្លាប់វិស្វករចិន កាលពីថ្ងៃអង្គារកើតឡើងនៅតែប៉ុន្មានថ្ងៃ ក្រោយដែលក្រុមប្រដាប់អាវុធប៉ុនប៉ងវាយចូលការិយាល័យធ្វើការនៅកំពង់ផែទឹកជ្រៅ Gwadar ដែលជាគម្រោងវិនិយោគមហាសាល និងយុទ្ធសាស្រ្តរបស់ចិន នៅប៉ាគីស្ថាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ