កូរ៉េខាងត្បូង៖ អាជ្ញាធររកឃើញមានកាមេរ៉ាលួចបង្កប់ក្នុងការិយាល័យបោះឆ្នោត
កូរ៉េខាងត្បូងនឹងរៀបចំការបោះឆ្នោតសភានៅថ្ងៃទី ១០មេសា។ ប៉ុន្តែ នៅមិនដល់២សប្តាហ៍ផង អាជ្ញាធរកូរ៉េខាងត្បូងបានរកឃើញមានកាមេរ៉ាជាច្រើនគ្រឿងដែលលួចបង្កប់នៅក្នុងបន្ទប់គូសសន្លឹកឆ្នោត ឬហិបសន្លឹកឆ្នោតនៅក្នុងការិយាល័យបោះឆ្នោត។ នៅថ្ងៃសុក្រទី២៩មីនា អាជ្ញាធរបានចាប់ខ្លួនជនសង្ស័យម្នាក់ដែលជាអ្នកលេងយូធូប នៅក្នុងបទចោទប្រកាន់ថា រូបគេជាអ្នកលួចបង្កប់កាមេរ៉ាយកការណ៍សម្ងាត់។
ចុះផ្សាយនៅថ្ងៃ៖
ស្តាប់ - ០៤:១១
នៅកូរ៉េខាងត្បូង ការិយាល័យបោះឆ្នោតត្រូវបានរៀបចំរួចរាល់នៅទូទាំងប្រទេស នៅប៉ុន្មានសប្តាហ៍មុនការបោះឆ្នោតសភា(៣០០អាសនៈ)ដែលត្រូវប្រព្រឹត្តទៅនៅថ្ងៃទី១០មេសាខាងមុខ។ ប៉ុន្តែ គណៈកម្មការរៀបចំការបោះឆ្នោតកូរ៉េខាងត្បូងត្រូវទើសទាល់យ៉ាងខ្លាំង ព្រោះថា នៅតែជាង១០ថ្ងៃមុនការបោះឆ្នោត គេបានរកឃើញមានកាមេរ៉ា ២៦ ត្រូវគេលួចបង្កប់នៅក្នុងការិយាល័យបោះឆ្នោតចំនួន១៨។
នៅយប់ថ្ងៃសុក្រទី២៩មីនា អាជ្ញាធរបានចាប់ខ្លួនជនសង្ស័យដែលបានលួចដាក់កាមេរ៉ានៅក្បែរហិបឆ្នោត និងនៅក្នុងបន្ទប់គូសសន្លឹកឆ្នោត។ គឺកាមេរ៉ាតាមដានអគារដែលមានការិយាល័យបោះឆ្នោត ដែលបានជួយឲ្យគេកំណត់បានអត្តសញ្ញាណរបស់ជនល្មើសដែលមានអាយុប្រមាណជាង ៤០ឆ្នាំ។ តាមអាជ្ញាធរកូរ៉េខាងត្បូង ជនសង្ស័យដែលជាអ្នកលេងយូធូបបានសារភាពថា ខ្លួនគេលួចបង្កប់កាមេរ៉ាវីដេអូតាមដានការលួចបន្លំសន្លឹកឆ្នោតតែប៉ុណ្ណោះ។ នេះមិនមែនជាលើកទី១ទេ ដែលជនសង្ស័យខាងលើលួចបង្កប់កាមេរ៉ានៅក្នុងការិយាល័យបោះឆ្នោត។ កន្លងមក គេធ្លាប់បង្ហោះវីដេអូដែលគេលួចថតបានពីក្នុងបន្ទប់គូសសន្លឹកឆ្នោត នៅក្នុងអំឡុងបោះឆ្នោតប្រធានាធិបតីឆ្នាំ ២០២២។ នៅក្នុងវីដេអូដែលបង្ហោះក្នុងគណនីយូធូបរបស់ខ្លួន ជនសង្ស័យបាននិយាយថា គេរកឃើញមានចំណុចមិនប្រក្រតីមួយចំនួនទាក់ទងនឹងការរាប់សន្លឹកឆ្នោត និងបានអំពាវនាវឲ្យអ្នកដទៃធ្វើតាមខ្លួនដូចជាទិញកាមេរ៉ា និងលួចដាក់កាមេរ៉ានៅក្នុងបន្ទប់គូសសន្លឹកឆ្នោត និងត្រូវតវ៉ាពីការលួចបន្លំសន្លឹកឆ្នោត។
គ្មានសំណាងរួចខ្លួនដូចលើកមុនៗ ជនសង្ស័យត្រូវចាប់ឃុំខ្លួន នៅក្នុងដំណាក់កាលស៊ើបអង្កេតរបស់ប៉ូលិសកូរ៉េខាងត្បូង។
ដោយសារតែហេតុការណ៍នេះ អាជ្ញាធរកូរ៉េខាងត្បូងត្រូវបើកការស៊ើបអង្កេត ត្រួតពិនិត្យស៊ីជម្រៅនៅតាមគ្រប់ការិយាល័យ ជាង ៣៥០០នៅទូទាំងប្រទេស ដើម្បីធានាថា គ្មានកាមេរ៉ាលួចបង្កប់យកការណ៍នៅក្នុងថ្ងៃបោះឆ្នោត។
ដូចនៅក្នុងការបោះឆ្នោតប្រធានាធិបតីកាលពីឆ្នាំ ២០២២ គណបក្សកាន់អំណាចរបស់លោកប្រធានាធិបតីយូន ស៊ុកយោល និងគណបក្សប្រឆាំងគឺគណបក្សប្រជាធិបតេយ្យមានសំឡេងគាំទ្រយ៉ាងប្រកៀកប្រកិតនៅក្នុងការបោះឆ្នោតសភា។
ការបោះឆ្នោតសភាជាវិញ្ញាសារសំខាន់មួយដើម្បីបញ្ជាក់ថា តើគណបក្សប្រឆាំងនៅបន្តទទួលបានការទុកចិត្តពីប្រជាជនកូរ៉េខាងត្បូងដើម្បីបន្តគ្រប់គ្រងសំឡេងភាគច្រើននៅសភាដែរឬទេ។ ការបោះឆ្នោតសភាលើកនេះសំខាន់ណាស់សម្រាប់លោកប្រធានាធិបតីយូយូន ស៊ុកយោល ល ព្រោះថា បើសិនគណបក្សអំណាចប្រជាជនរបស់លោកទទួលជ័យជំនះ ទទួលបានអាសនៈភាគច្រើននៅរដ្ឋសភា នោះលោកនឹងអាចមានអំណាចកាន់តែខ្លាំង ដើម្បីសម្រេចគោលនយោបាយរបស់លោក ដូចជាការធ្វើកំណែទម្រង់ប្រព័ន្ធសុខាភិបាល ការអប់រំ ការបង្កើតការងារ និងការសន្យារបស់លោកដើម្បីលុបចោលក្រសួងដើម្បីសមភាពយេនឌ័រដែលប្រធានាធិបតីអាណត្តិបានបង្កើតឡើង។ ម្យ៉ាង លោកប្រធានាធិបតីកូរ៉េខាងត្បូងសង្ឃឹមថា ជ័យជំនះនៅក្នុងការបោះឆ្នោតសភានឹងទៅពង្រឹងគោលនយោបាយរបស់លោកដែលចង់ឲ្យកូរ៉េខាងត្បូងទៅចូលកៀកជិតស្និទ្ធនឹងអាមេរិក។
ផ្ទុយមកវិញ បរាជ័យរបស់គណបក្សកាន់អំណាច ដែលនឹងទៅបើកផ្លូវឲ្យគណបក្សប្រឆាំងនៅបន្តគ្រប់គ្រងសភា នឹងទៅបង្កឧបសគ្គ ចាប់ចងដៃ មិនឲ្យលោកប្រធានាធិបតីយូន ស៊ុកយោល អាចសម្រេចគោលដៅនយោបាយ។ ម្យ៉ាង គណបក្សប្រឆាំង គណបក្សប្រជាធិបតេយ្យក៏ធ្លាប់ឧស្សាហ៍រិះគន់ថា ជំហរតឹងពេករបស់លោកយូន ស៊ុកយោល ជាមួយកូរ៉ខាងជើងកំពុងបង្កឲ្យមានភាពតានតឹងដ៏គ្រោះថ្នាក់។ នេះជាហេតុផលមួយដែលធ្វើឲ្យការបោះឆ្នោតសភានៅកូរ៉េខាងត្បូងជាពឹ្រត្តិការណ៍សំខាន់មួយដែរដែលបរទេសកំពុងតាមដានមើលដែរ ជាពិសេសអាមេរិក ជប៉ុន ឬកូរ៉េខាងជើង។
ការស្ទង់មតិនៅសប្តាហ៍ចុងក្រោយនេះបង្ហាញថា ប្រជាជនកូរ៉េខាងត្យូងភាគច្រើនមិនសូវពេញចិត្តនឹងការដឹកនាំរបស់លោកប្រធានាធិបតីយូន ស៊ុកយោល នៅក្នុងខណៈពេលដែលកូរ៉េខាងត្បូងកំពុងមានបញ្ហា សេដ្ឋកិច្ចនៅទ្រឹង ការកើនឡើងចំនួនមនុស្សចាស់ គម្លាតប្រាក់ខែ និងការគំរាមកំហែងមីស៊ីលរបស់កូរ៉េខាងជើង។ លោកប្រធានាធិបតីកូរ៉េខាងត្បូងកំពុងធ្លាក់កូដប្រជាប្រិយភាពនៅក្នុងចំណោមយុវជន និងមនុស្សវ័យ៥០ឆ្នាំ។ ប៉ុន្តែ ការស្ទង់មតិដដែលបង្ហាញថា ប្រជាជនកូរ៉េខាងត្បូងក៏អស់ក្តីសង្ឃឹមណាស់ដែរលើគណបក្សប្រឆាំង បន្ទាប់ពីប្រមុខដឹកនាំរបស់បក្សនេះគឺលោក លី ចែម៉្ញុងកំពុងជាប់ ក្តីក្តាំនៅតុលាការនៅក្នុងសំណុំរឿងប្រព្រឹត្តអំពើពុករលួយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ