ឥណ្ឌូណេស៊ី៖ ផ្ទុះឃ្លាំងស្តុកគ្រាប់ នៅក្នុងបន្ទាយទាហានមួយ នាជាយក្រុងហ្សាកាតា
នៅឥណ្ឌូណេស៊ី បន្ទាប់ពីតស៊ូអស់ជាច្រើនម៉ោង ក្រុមពន្លត់អគ្គិភ័យបានសម្រេចពន្លត់ភ្លើងនៅឃ្លាំងស្តុកទុកអាវុធមួយកន្លែងនៅជាយក្រុងហ្សាកាតា។ ដោយសារអគ្គិភ័យ និងគ្រាប់ផ្ទុះជាបន្តបន្ទាប់ អាជ្ញាធរឥណ្ឌូណេស៊ីបានជម្លៀសមនុស្សជាង១៥០គ្រួសារចេញពីតំបន់ជុំវិញ។ យោងតាមមេបញ្ជាការកងទ័ពសម្រាប់ទីក្រុងហ្សាកាតា គេសង្ស័យថា ប្រតិកម្មសារធាតុគីមី នៅក្នុងឃ្លាំងស្តុកគ្រាប់ចាស់ៗ អាចជាដើមចមនៃការផ្ទុះឆេះឃ្លាំងកាលពីយប់ថ្ងៃសៅរ៍ម្សិលមិញ។
ចុះផ្សាយនៅថ្ងៃ៖
ស្តាប់ - ០២:១៣
យោងតាមអាជ្ញាធរឥណ្ឌូណេស៊ី អគ្គិភ័យផ្តើមឆាបឆេះចេញពីក្នុងឃ្លាំងស្តុកអាវុធមួយ នៅក្នុងបន្ទាយទាហាន នៅជាយក្រុងហ្សាកាតា។ ភ្លើងឆេះសន្ធោសន្ធៅ និងសំឡេងគ្រាប់ផ្ទុះរន្ទឺរាប់គីឡូម៉ែត្រ ចាប់មានតាំងពីម៉ោង ៦កន្លះល្ងាច រហូតដល់ម៉ោងជិត៤ភ្លឺ ទើបក្រុមពន្លត់អគ្គិភ័យ អាចប្រកាសថា គេអាចពន្លត់ភ្លើងបានទាំងស្រុង។
នៅក្នុងសន្និសីទកាសែត មេបញ្ជាការកងទ័ពសម្រាប់ទីក្រុងហ្សាកាតា លោក Mohamad Hasan ពន្យល់ថា នៅក្នុងឃ្លាំងស្តុកអាវុធដែលផ្ទុះឆេះ កាលពីយប់ថ្ងៃសៅរ៍ គ្មានចរន្តអគ្គិសនីនោះទេ។ ដូច្នេះ គេសង្ស័យថា ប្រតិកម្មសារធាតុគីមី នៅក្នុងឃ្លាំងដែលមានស្តុកគ្រាប់ចាស់ៗ ជាដើមហេតុបង្កើតឲ្យមានផ្កាភ្លើង ឆេះផ្ទុះគ្រាប់យ៉ាងដូច្នេះ។ បើតាមមេបញ្ជាការកងទ័ពឥណ្ឌូណេស៊ីដដែល ឃ្លាំងដែលឆេះផ្ទុះ មានស្តុកគ្រាប់ចាស់ៗប្រមាណ ១៦០ ពាន់គ្រាប់ ដែលគេប្រមូលយកមកពីតំបន់Kodam ក្នុងរដ្ឋធានីហ្សាកាតា។ គ្រាប់ចាស់ៗមួយចំនួនដែលមានអាយុច្រើនជាង១០ឆ្នាំ ត្រូវគេត្រូវស្តុកទុកក្នុងឃ្លាំង មុននឹងកម្ទេចចោល នៅថ្ងៃខាងមុខ។
អាជ្ញាធរពន្លត់អគ្គិភ័យអះអាងថា ដើម្បីជៀសវាងគ្រោះថ្នាក់ស្លាប់ជីវិតភ្នាក់ងារពន្លត់អគ្គិភ័យ គេបានប្រើគ្រឿងយន្តរ៉ូបូ និងសារធាតុរាវគីមី ដើម្បីពន្លត់ភ្លើងនៅឃ្លាំងស្តុកអាវុធ។ អគ្គិភ័យលើកនេះមិនបានសម្លាប់មនុស្ស ឬបង្កឲ្យមានអ្នករបួសម្នាក់ឡើយ។
ប្រជាជនជាង១៥០គ្រួសារដែលរស់នៅក្បែរបន្ទាយទាហានដែលមានផ្ទុះឃ្លាំងគ្រាប់ត្រូវបានគេជម្លៀសចេញជាបន្ទាន់ទៅកាន់កន្លែងមានសុវត្ថិភាព។ អ្នកភូមិមួយចំនួននិយាយថា គេតក់ស្លុតមែនទែននៅពេលលឺសំឡេងផ្ទុះ។ ដំបូងឡើយពួកគេបានរត់ចេញទៅក្រៅផ្ទះ ព្រោះគិតថា ជាសំឡេងគ្រោះរញ្ជួយដី ប៉ុន្តែ នៅពេលឃើញផ្សែង អណ្តាតភ្លើងពណ៌ទឹកក្រូច ទើបគេដឹងថា សំឡេងផ្ទុះមានប្រភពចេញមកពីក្នុងបន្ទាយទាហាន។
តាមអាជ្ញាធរ ទោះគេគ្រប់គ្រងស្ថានការណ៍បានទាំងស្រុង ពោលគឺលែងមានភ្លើងបង្កគ្រោះថ្នាក់ផ្ទុះឆេះតទៅទៀត ប៉ុន្តែ មេបញ្ជាការកងទ័ពឥណ្ឌូណេស៊ីបានណែនាំមិនឲ្យប្រជាជនត្រលប់ចូលផ្ទះវិញភ្លាមៗ ឬត្រូវប៉ះពាល់វត្ថុដែលអាចផ្ទុះ ដែលបានធ្លាក់បាចសាចនៅក្នុងតំបន់ជុំវិញដោយសារកម្លាំងផ្ទុះឆេះកាលពីយប់ថ្ងៃសៅរ៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ