តៃវ៉ាន់រងគ្រោះរញ្ជួយដីដ៏កំណាចខ្លាំង ស្លាប់មនុស្សជាច្រើននាក់
មានស្លាប់យ៉ាងហោចណាស់៧នាក់ និងជាង៧០០នាក់រងរបួស នៅក្នុងគ្រោះរញ្ជួយដី នៅតំបន់ភាគខាងកើតកោះតៃវ៉ាន់ នាព្រឹកថ្ងៃពុធទី៣មេសា២០២៤នេះ។ នេះបើតាមសេចក្តីជូនដំណឹងរបស់អាជ្ញាធរតៃវ៉ាន់។ ជាគ្រោះរញ្ជួយដីដ៏កំណាចដែលតៃវ៉ាន់មិនធ្លាប់ប្រទះទេក្នុងរយៈពេល២៥ឆ្នាំកន្លងមកនេះ និងដែលបានជំរុញឱ្យអាជ្ញាធរហ្វីលីពីននិងជប៉ុនទាញសញ្ញាអាសន្នរលកយក្សស៊ូណាមីផង មុនលើកចេញនៅពេលបន្តិចក្រោយមក។
ចុះផ្សាយនៅថ្ងៃ៖
ស្តាប់ - ០២:១៤
ទូរទស្សន៍តៃវ៉ាន់បានបង្ហាញរូបភាព អាគារយ៉ាងហោច២៦ខ្នង ត្រូវដួលរលំ សំណង់អាគារជាច្រើនផ្សេងទៀតបានផ្អៀង ទ្រេត លែងមានលំនឹង ហើយមានមនុស្សរាប់សិបនាក់កំពុងជាប់កុនក្នុងគំនរថ្មបាក់បែកនៅឡើយ។ ពលរដ្ឋជាង៦០នាក់ត្រូវបានសង្គ្រោះឱ្យរួចពីស្លាប់បានទាន់ពេលវេលា។ ចំណែកអ្នកបាត់បង់ជីវិតទាំងអស់សុទ្ធសឹងជាអ្នករស់នៅតំបន់Hualien ដែលជាតំបន់ភ្នំ ជាប់មាត់សមុទ្ទ និងក្បែរស្នូលរញ្ជូយដី។
ស្នូលដីស្ថិតក្នុងជម្រៅ១៥,៥គីឡូម៉ែត្រក្រោមបាតសមុទ្ទ ប៉ែកខាងកើតកោះតៃវ៉ាន់ បានរញ្ជួយឡើងនៅវេលាម៉ោង៨ព្រឹកម៉ោងនៅតៃវ៉ាន់ ត្រូវចំពេលមនុស្សម្នាត្រូវចេញទៅសាលារៀនឬទៅធ្វើការ ក្នុងកម្រិត៧,៥នៃមាត្រដ្ឋានរីស្ទែរ។ នេះបើតាមវិទ្យាស្ថានឧតុនិយមជប៉ុន និង៧,៤បើតាមវិទ្យាស្ថានសិក្សាភូគព្ភសាស្ត្រអាមេរិក។ ឯអ្នកវិទ្យាសាស្ត្រតៃវ៉ាន់បានវាស់ឃើញចលនារញ្ជួយដីថ្ងៃនេះថាមានកម្លាំងស្មើនឹងការផ្ទុះគ្រាប់បែកនុយក្លេអ៊ែរ៣២គ្រាប់។
កម្លាំងរញ្ជួយដីដ៏ខ្លាំងដែលតៃវ៉ាន់មិនធ្លាប់ជួបប្រទះនារយៈពេល២៥ឆ្នាំចុងក្រោយមកនេះ បានអង្រួញកោះតៃវ៉ាន់ទាំងមូល និងរង្គើដល់បណ្តាកោះជិតខាងផ្សេងទៀត អមដោយរលករញ្ជួយតូចតាមក្រោយប្រមាណ៥៨ដង ព្រមទាំងបង្កឱ្យមានរលកស៊ូណាមិជាច្រើន វាយដល់ឆ្នេរខាងត្បូងបំផុតរបស់កោះអូគីណាជប៉ុនផង។ ហេតុដូច្នេះហើយបានជាជប៉ុន និងហ្វីលីពីទាញសញ្ញាអាសន្នស៊ូណាមិភ្លាមដូចតៃវ៉ាន់ដែរ មុននឹងប្រកាសលើកចេញវិញ នៅពីរម៉ោងក្រោយ។
ប្រធានាធិបតីតៃវ៉ាន់ លោកស្រី សៃអ៊ីនវេន បានអំពាវនាវឱ្យស្ថាប័នរដ្ឋាភិបាល តំបន់និងមូលដ្ឋានទាំងអស់សហការគ្នាជួយសង្គ្រោះ។ ក្រុមយោធាក៏នឹងចេញមកជួយធ្វើអន្តរាគមន៍ដែរ។ មានទីតាំងភូមិសាស្ត្រស្ថិតនៅលើថាសតំណតិចតូនិក តៃវ៉ាន់ឧស្សាហ៍រងគ្រោះរញ្ជួយដីណាស់ តែដោយមានច្បាប់សុវត្ថិភាពសំណង់តឹងតែង ទើបមិនសូវមានការខូតខាត។ គ្រោះរញ្ជួយដីដ៏មរណៈបំផុតប្រចាំប្រវត្តិសាស្ត្រសម័យទំនើបតៃវ៉ាន់ គឺ មហន្តរាយរញ្ជួយដីកាលពីខែកញ្ញាឆ្នាំ១៩៩៩ ដែលបានផ្តាច់ជីវិតមនុស្សអស់២៤០០នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ