ក្រុមប្រឆាំងភូមាវាយប្រហារដ្រូនទ្រង់ទ្រាយធំនៅភូមា
នៅរដ្ឋធានីណៃពិដោរ, របបសឹកភូមា រងការវាយប្រហារដោយដ្រូនបំពាក់គ្រាប់បែក ប្រមាណជិត ៣០ គ្រឿង។ នេះជាលើកទី១ហើយ ដែល ក្រុមប្រដាប់អាវុធរបស់រដ្ឋាភិបាលស្រមោលភូមា បានប្រកាសអះអាងជាចំហថាជាស្នាដៃរបស់ខ្លួន ហើយនិងបានព្រមានថា ពួកយោធារបបសឹកលែងអាចដេកស្រុកស្រួលទៀតហើយ។ របបសឹកវិញ ជាផ្លូវការ បញ្ជាក់ថាកងកម្លាំងយោធាភូមាបានបាញ់កម្ទេចដ្រូនទាំងនោះ បានដោយជោគជ័យ ហើយគ្មានរងការខូចខាតនិងអ្នករបួសសោះឡើយ។
ចុះផ្សាយនៅថ្ងៃ៖
ស្តាប់ - ០៣:១៩
នៅថ្ងៃព្រហស្បតិ៍ ទី៤មេសា ដ្រូនបំពាក់គ្រឿងផ្ទុះនិងគ្រាប់បែក ប្រមាណ ២៩ គ្រឿង ត្រូវបញ្ជាទៅវាយប្រហារទម្លាក់គ្រាប់ សំដៅលើទីតាំងសំខាន់ៗរបស់រដ្ឋអំណាចរបបសឹកភូមា ជាច្រើនកន្លែង ដូចជានៅព្រលានយន្ត ហោះ ទីបញ្ជាការយោធា និងមូលដ្ឋានទ័ពអាកាស។ ប្រព័ន្ធផ្សព្វផ្សាយផ្លូវការរបបសឹក បានអះអាងថា មានដ្រូន១៣គ្រឿងដែលហោះសំដៅទៅកន្លែងយុទ្ធសាស្ត្រនៅរដ្ឋធានីណៃពិដោរ ត្រូវយោធាភូមាបាញ់កម្ទេចអស់គ្មានសល់ និងដែលគ្មានបង្កគ្រោះថ្នាក់ គ្មានអ្នករបួសនិងខូចខាតអ្វីឡើយ។
បុគ្គលិកម្នាក់របស់ព្រលានយន្តហោះភូមា ក្រោមក្របខណ្ឌមិនចេញឈ្មោះ បានប្រាប់ទីភ្នាក់ងារព័ត៌មានបារាំងអាអែហ្វប៉េ ថាអាកាសយានដ្ឋានត្រូវបិទផ្អាកដំណើរការជាបណ្តោះអាសន្ន នៅវេលាម៉ោង១០ព្រឹក ម៉ោងនៅក្នុងស្រុក។
ភ្លាមៗដែរ រដ្ឋាភិបាលរួបរួមជាតិ ជារដ្ឋាភិបាលស្រមោល អះអាងថាជាស្នាដៃរបស់ខ្លួន។ រដ្ឋាភិបាលស្រមោល ដឹកនាំដោយក្រុមអ្នកនយោបាយប្រឆាំងនឹងរបបសឹក ហើយសមាជិកចំនួនច្រើននាក់ ជាអ្នកតំណាងរាស្ត្រ មុនពេលរបបសឹកធ្វើរដ្ឋប្រហារ។ នេះជាលើកទី១ដែលរដ្ឋាភិបាលស្រមោល អះអាងជាចំហតែម្តង ថាពួកខ្លួនជាអ្នកវាយប្រហារដ្រូន ហើយថែមទាំងប្រកាសសារប្រាប់រដ្ឋអំណាចភូមាឲ្យយល់ច្បាស់ថា ពួកគេលែងមានសុវត្ថិភាព លែងអាចដេកស្រណុកស្រួលទៀតហើយ។ ហើយបើតាមព័ត៌មានក្នុងស្រុក, សូម្បីតែ និវេសនដ្ឋានរបស់ប្រមុខរបបសឹក លោក មីន អ៊ុងឡាំង ក៏ឋិតនៅក្នុងផ្ទាំងស៊ីបរបស់ដ្រូនដែរ។
កម្លាំងក្រុមប្រដាប់អាវុធប្រឆាំងនឹងរបបសឹកភូមា បានរីករាលដាលច្រើន និងកាន់តែកើនកម្លាំងខ្លាំង ព្រោះតែបានជំនួយថវិកានិងសម្ភារៈពីសំណាក់រដ្ឋាភិបាលស្រមោល។ នៅចន្លោះព្រំដែនរវាងចិននិងភូមា ក្រុមសម្ព័ន្ធប្រដាប់អាវុធជនជាតិភាគតិច ៣ក្រុម បានវាយដំណើមយកទីតាំងឈរជើងរបស់ពួកទាហានរបបសឹក ហើយថែមទាំងគ្រប់គ្រងច្រកនាំទំនិញចេញចូលស្រុកចិន និងជាច្រកផ្លូវដង្ហើមរបស់របបសឹក ទៀតផង។ ចំណែក នៅក្បែរព្រំដែន បង់ក្លាដែស និងឥណ្ឌា មូលដ្ឋានទីតាំងយោធាភូមាមួយចំនួន ក៏ត្រូវក្រុមប្រដាប់អាវុធប្រឆាំងនឹងរបបសឹក យកដណ្តើមខ្លះដែរ។ រីឯ នៅព្រំដែនថៃ ក៏មានក្រុមជនជាតិភាគតិចងើបបះបោរប្រឆាំងទៀត។ បើតាមបណ្តាញផ្សព្វផ្សាយព័ត៌មានអង់គ្លេស BBC, ពួកក្រុមប្រដាប់អាវុធប្រឆាំងនឹងរបបសឹក បានវាយលុក ស្ទើរតែ ៦០% នៃផ្ទៃប្រទេស។
សង្គ្រាមស៊ីវិលនៅភូមាបានធ្វើឲ្យមនុស្សស្លាប់រាប់ពាន់នាក់។ ប្រជាជនជាង២លាន៦សែននាក់រត់ភៀសខ្លួនចោលផ្ទះសម្បែង។ នេះបើតាមទិន្ន័យនៅឆ្នាំ២០២៤ របស់ អង្គការសហប្រជាជាតិ ដោយបញ្ជាក់ទៀតថា ជនជាតិភូមា១២,៩លាននាក់កំពុងតែខ្វះស្បៀងអាហារទទួលទាន។ នៅបុរីញូវយ៉ក ថ្ងៃព្រហស្បតិ៍ ទី៤មេសា លោកស្រី Lisa Doughten អ្នកតំណាងមួយរូប នៃការិយាល័យមនុស្សធម៌របស់អង្គការសហប្រជាជាតិ បានថ្លែងរំឭកដាស់តឿននៅចំពោះមុខ ក្រុមប្រឹក្សាសន្តិសុខ ថាមិនត្រូវភ្លេច ឬបំភ្លេចប្រជាពលរដ្ឋភូមាសោះឡើយ។ ពេលនេះ ពួកគេកំពុងតែជួបគ្រោះអត់ឃ្លាន រងអំពើហិង្សា និងរស់នៅក្នុងភាពភិតភ័យជាប្រចាំ ព្រោះតែការធ្វើទុក្ខបុកម្នេញពីរបបសឹកភូមា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ