កូរ៉េខាងត្បូងបង្ហោះផ្កាយរណបចារកិច្ចទីពីរ ដោយជោគជ័យ
កូរ៉េខាងត្បូងបានប្រកាសនៅថ្ងៃចន្ទទី ៨ មេសា២០២៤នេះ បាញ់បង្ហោះផ្កាយរណបចារកិច្ចទៅពីរ ទៅក្នុងគន្លងតារាវិថីដោយជោគជ័យ។ នេះជាផ្កាយរណបដែលផលិត នៅលើទឹកដីកូរ៉េខាងត្បូង ផ្ទាល់តែម្តង ហើយពាំបង្ហោះដោយក្រុមហ៊ុនអាមេរិកSpaceX។
ចុះផ្សាយនៅថ្ងៃ៖
ស្តាប់ - ០២:៣២
បង្ហោះចេញដោយកាំជ្រួចFalcon៩ របស់ក្រុមហ៊ុនSpaceX ផ្កាយរណបចារកិច្ចទីពីររបស់យោធាកូរ៉េខាងត្បូង បានផ្តាច់ចូលក្នុងគន្លងតារាវិថីនៅវេលាម៉ោង៩និង២នាទី ម៉ោងនៅក្នុងស្រុក។ ជាងមួយម៉ោងក្រោយមក ពោលគឺនៅម៉ោង១០និង៥៧នាទី ផ្កាយរណបបានភ្ជាប់ទំនាក់ទំនងពីអវកាសមកកាន់ស្ថានីយ៍នៅផ្ទាល់ដី នៅបរទេស។ នេះបើតាមសេចក្តីថ្លែងការណ៍របស់ក្រសួងការពារជាតិកូរ៉េខាងត្បូង។
នៅពេលផ្កាយរណបចារកិច្ចទីពីរនេះចាប់ផ្តើមបំពេញបេសកកម្មរបស់ខ្លួន យោធាកូរ៉េខាងត្បូងនឹងអាចឈ្លបមើលហេដ្ឋារចនាសម្ព័ន្ធសំខាន់ៗរបស់កូរ៉េខាងជើង ជារៀងរាល់ពីរម៉ោងម្តង។ កាលពីខែធ្នូ២០២៣ កូរ៉េខាងត្បូងបានបាញ់បង្ហោះផ្កាយរណបចារកិច្ចទីមួយ ដែលមានសមត្ថភាពថតរូបភាពប្រកបដោយគុណភាពខ្ពស់បំផុត អំពីសកម្មភាពនៅកណ្តាលក្រុងព្យុងយ៉ាង បញ្ជូនមកឱ្យអាជ្ញាធរ។ ផ្កាយរណបមួយនេះចាប់បំពេញតួនាទីរបស់ខ្លួននៅខែមិថុនា។
សម្រាប់យោធាកូរ៉េខាងត្បូង សមត្ថភាពចារកិច្ច ស៊ើបរកព័ត៌មាន និងតាមដានដោយឯករាជ្យ របស់កូរ៉េខាងត្បូង ត្រូវបានពង្រឹងយ៉ាងខ្លាំង តាមរយៈជោគជ័យនៃការបង្ហោះផ្កាយរណបជាលើកទីពីរថ្ងៃនេះ។ ដូច្នេះសេអ៊ូលនឹងបន្តបង្ហោះផ្កាយរណបថ្មីៗទៀត ដោយរំពឹងថានឹងអាចមានផ្កាយរណបចារកិច្ចចំនួនសរុប៥គ្រឿង នៅឆ្នាំ២០២៥ សម្រាប់ឈ្លបមើលកូរ៉េខាងជើង។
លោក ស្ហ៊ិន វុនស៊ិក រដ្ឋមន្ត្រីក្រសួងការពារជាតិកូរ៉េខាងត្បូងបានអះអាងនៅថ្ងៃចន្ទនេះថា កំពុងតាមដានកូរ៉េខាងជើងយ៉ាងប្រុងប្រយ័ត្នបំផុត ព្រោះព្យុងយ៉ាង ក៏ទំនងកំពុងមានចំណាត់ការបន្ថែមដើម្បីរៀបចំបង្ហោះផ្កាយរណបមួយទៀតដែរនៅថ្ងៃរវាងថ្ងៃទី១៥មេសាខាងមុខនេះ បន្ទាប់ពីគ្រោងបង្ហោះកាលពីខែមីនាមិនបានសម្រេច។ តាមទម្លាប់ នៅថ្ងៃ១៥មេសាដែលជាថ្ងៃខួបកំណើតរបស់ប្រមុខគីមអ៊ីលស៊ុង បិតាស្ថាបនាជាតិកូរ៉េខាងជើង ព្យុងយ៉ាងតែងអបអរដោយបាញ់សាកល្បងអាវុធនុយក្លេអ៊ែរឬព្យុះហយាត្រាធំៗ។ បន្ទាប់ពីបរាជ័យអស់ពីរលើក កូរ៉េខាងជើងបានប្រកាសបង្ហោះផ្កាយរណបចារកិច្ចទីមួយរបស់ខ្លួនទៅក្នុងគន្លងតារាវិថី ដោយជោគជ័យដែរ កាលពីខែវិច្ឆិកា២០២៣ ហើយបានទទួលរូបភាពជាច្រើនទាក់ទងនឹងមូលដ្ឋានយោធាអាមេរិកPearl Harbor នៅហាវៃ និងទីតាំងរសើបៗរបស់កូរ៉េខាងត្បូងផង។ បើជាប្រតិបត្តិការជោគជ័យមែន កូរ៉េខាងជើងអាចប្រមូលព័ត៌មានស្តីពីកូរ៉េខាងត្បូងបានកាន់តែច្រើននិងមានទិន្នន័យសំខាន់ៗលើគ្រប់ជម្លោះ។ នេះបើតាមការសន្និដ្ឋានរបស់អ្នកជំនាញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ