ប្រជាជនភូមារត់ឆ្លងចូលដីថៃ ខណៈដែលកងទ័ពនិងក្រុមប្រឆាំងប្រយុទ្ធគ្នាកាន់តែខ្លាំងនៅរដ្ឋជាប់ព្រំដែន
នៅថ្ងៃអង្គារ ប្រជាជនភូមារស់នៅក្នុងរដ្ឋជាប់ព្រំដែនបានរត់ឆ្លងចូលទឹកដីថៃ នៅបន្ទាប់ពីលឺសំឡេងផ្ទុះគ្រាប់ និងការប្រកាសរបស់ក្រុមឧទ្ទាមប្រដាប់អាវុធដែរថា ខ្លួនទើបវាយដណ្តើមបានបន្ទាយទាហានរបស់របបសឹកនៅក្បែរព្រំដែនភូមា ថៃ។ បើតាមទីភ្នាក់ងារព័ត៌មានបារាំង AFPដែលស្រង់សំដីរបស់ប្រជាជនភៀសខ្លួនភូមា គេលឺសំឡេងប្រយុទ្ធគ្នាកាន់តែសន្ធឹកខ្លាំងនៅក្នុងទីក្រុងMyawaddy ដែលជាច្រកពាណិជ្ជកម្មសំខាន់មួយរបស់រដ្ឋាភិបាលភូមាជាមួយប្រទេសថៃ។ នៅថ្ងៃអង្គារដដែល រដ្ឋមន្រ្តីការបរទេសថៃប្រកាសថា ថៃត្រៀមខ្លួនដើម្បីទទួលពលរដ្ឋភៀសសឹកភូមាចំនួន ១សែននាក់។
ចុះផ្សាយនៅថ្ងៃ៖
ស្តាប់ - ០៣:៣១
នៅក្បែរទីក្រុងMyawaddy ដែលជាប់ព្រំដែនភូមា ថៃ ការប្រយុទ្ធគ្នារវាងកងទ័ពរដ្ឋាភិបាលសឹក និងក្រុមប្រឆាំងភូមាកាន់តែខ្លាំងក្លាឡើង គិតចាប់តាំងពីចុងសប្តាហ៍មុន។ នៅថ្ងៃអង្គារ អ្នកភូមិភូមារាប់រយនាក់បានរត់ឆ្លងស្ទឹងចូលទៅទីក្រុងMae Sot ក្នុងទឹកដីថៃ បន្ទាប់ពីពួកគេលឺសំឡេងផ្ទុះ និងការប្រយុទ្ធគ្នាកាន់តែកៀកចូលក្រុង។
នៅថ្ងៃសៅរ៍កន្លងទៅ ក្រុមទាហានរបស់សហភាពជនជាតិជាតិការ៉ែន ទើបបានអះអាងថា គេវាយដណ្តើមយកបានបន្ទាយទាហានមួយកន្លែងរបស់របបសឹកភូមា ដែលស្ថិតនៅចម្ងាយជាង ១០គីឡូម៉ែត្រពីទីក្រុង Myawaddy។ ទាហានជាង៦០០នាក់ និងក្រុមគ្រួសាររបស់ពួកគេបានទម្លាក់អាវុធ លើកទង់ជ័យស ចុះចាញ់។ នេះបើតាមក្រុមប្រដាប់អាវុធរបស់សហភាពជាតិការ៉ែន ។
រដ្ឋាភិបាលសឹកភូមាវិញមិនព្រមឆ្លើយតបនឹងសំណួររបស់អ្នកកាសែត ទាក់ទងនឹងការអះអាងរបស់ក្រុមប្រដាប់អាវុធជនជាតិភាគតិចការ៉ែន។ ប៉ុន្តែ ប្រជាជនដែលរត់គេចពីទីក្រុង Myawaddy បានប្រាប់អ្នកកាសែតរបស់ទីភ្នាក់ងារAFPថា កាលពីថ្ងៃអង្គារទី៩មេសា គេមិនឃើញមានទាហានការ៉ែន នៅក្នុងទីក្រុង Myawaddy។ ម្យ៉ាងស្ពានតភ្ជាប់ទីក្រុង Myawaddyទៅកាន់ទីក្រុងMae Sot ក្នុងទឹកដីថៃនៅតែបើកចរាចរណ៍ធម្មតា។
នេះអាចជាសញ្ញាថា ទីក្រុងរបស់របបសឹកភូមា នៅជាប់ព្រំដែនថៃនៅមិនទាន់ធ្លាក់ក្នុងដៃរបស់ក្រុមប្រដាប់អាវុធជនជាតិភាគតិចការ៉ែននៅឡើយ។
នៅថ្ងៃអង្គារ រដ្ឋមន្រ្តីការបរទេសថៃ លោក Parnpree Bahiddha Nukara បាននិយាយប្រាប់អ្នកកាសែតថា ទោះមិនទាន់មានការជម្លៀសប្រជាជនទ្រង់ទ្រាយធំ ចេញពីតំបន់ប្រយុទ្ធគ្នា ប៉ុន្តែ នៅប៉ុន្មានថ្ងៃមកនេះ ប្រជាជនភូមាចាប់ផ្តើមឆ្លងស្ទឹង ចូលទៅក្នុងទឹកដីថៃ។ បើតាមប្រមុខការបរទេសថៃដដែល រដ្ឋាភិបាលបាងកកត្រៀមខ្លួនទទួលជាបណ្តោះអាសន្ន ប្រជាជនភៀសខ្លួនភូមា ១សែននាក់ នៅក្នុងតំបន់មានសុវត្ថិភាពជាប់ព្រំដែនថៃភូមា។
ការប្រយុទ្ធគ្នាកាន់តែខ្លាំងរវាងកងទ័ពភូមា និងក្រុមប្រឆាំង ក្រុមប្រដាប់អាវុធភាគតិចការ៉ែន ដើម្បីដណ្តើមគ្រប់គ្រងទីក្រុងយុទ្ធសាស្រ្ត Myawaddy នៅជាប់ព្រំដែនថៃ កំពុងធ្វើឲ្យរដ្ឋាភិបាលថៃព្រួយបារម្ភខ្លាចក្រែងស្ថានការណ៍នៅព្រំដែនប្រទេសទាំងពីរកាន់តែធ្លាក់ចុះអាក្រក់។ នៅថ្ងៃចន្ទដើមសប្តាហ៍នេះ រដ្ឋាភិបាលរបស់លោកសេដ្ឋា ថៈវីស៊ីនប្រកាសថា របបសឹកភូមាបានសុំការអនុញ្ញាតដើម្បីបញ្ជូនយន្តហោះមកដឹកយកជនជាតិភូមាដែលបានរត់គេចចេញពីតំបន់ប្រយុទ្ធ ទៅជ្រកកោនក្នុងទឹកដីថៃ។
ជាច្រកព្រំដែនសំខាន់ទី៣របស់របបសឹកភូមា Myawaddyស្ថិតនៅផ្លូវAsia Highway ដែល តភ្ជាប់ទីក្រុងMae Sotរបស់ប្រទេសថៃទៅដល់ទីក្រុងរ៉ង់ហ្គូន។ នៅក្នុងរយៈពេលមួយឆ្នាំមកនេះ ទំនិញតម្លៃជាង១ពាន់លានដុល្លារបានឆ្លងកាត់ទីក្រុងមួយនេះ។ នេះបើតាមក្រសួងពាណិជ្ជកម្មរបស់រដ្ឋាភិបាលសឹកភូមា។
ទីក្រុង Myawaddyស្ថិតក្នុងរដ្ឋការ៉ែន ក៏ជាទីដែលក្រុមប្រដាប់អាវុធជនជាតិភាគតិចការ៉ែនប្រយុទ្ធគ្នាជាច្រើនទសវត្សរ៍ជាមួយកងទ័ពភូមាដើម្បីទាមទារគ្រប់គ្រងស្វយ័តទៅលើរដ្ឋការ៉ែន។ ចាប់តាំងពីរដ្ឋប្រហារយោធាទម្លាក់រដ្ឋាភិបាលស៊ីវិលនៅឆ្នាំ ២០២១ ចលនាប្រដាប់អាវុធជនជាតិភាគតិចការ៉ែនបានផ្តល់ជំរកដល់ក្រុមប្រឆាំងភូមា និងបានបង្វឹកហាត់ចលនាយុវជនប្រឆាំងរដ្ឋប្រហារ។ នៅដើមឆ្នាំនេះ ឆ្មាំការពារព្រំដែនក្នុងរដ្ឋការ៉ែន នៅជាប់ព្រំដែនថៃ បានប្រកាសថា ពួកគេលែងទទួលបញ្ជាពីពួកយោធាភូមាតទៅទៀត។ ការណ៍នេះធ្វើឲ្យកងទ័ពភូមាដែលកំពុងធ្លាក់ដៃ របូតបាត់ទីក្រុងធំៗនៅតាមព្រំដែនជាមួយចិន ឥណ្ឌា និងបង់ក្លាដែស រឹតតែចុះខ្សោយកម្លាំង លែងអាចឈរជើងនៅរដ្ឋការ៉ែន នៅជាប់ព្រំដែនថៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ