កូរ៉េខាងត្បូង៖ បក្សកាន់អំណាចបរាជ័យនៅក្នុងការបោះឆ្នោតសភាដែលមានតម្លៃជាប្រជាមតិ
បន្ទាប់ពីយុទ្ធនាការឃោសនាបោះឆ្នោតដែលបានឆ្លុះបញ្ចាំងឱ្យឃើញវិបត្តិជាក់ស្តែងជាច្រើនរបស់ប្រទេស នៅថ្ងៃពុធទី១០មេសានេះ កូរ៉េខាងត្បូងរៀបចំការបោះឆ្នោតសភា។ ជាការបោះឆ្នោតដ៏សំខាន់ដែលមានតម្លៃដូចធ្វើប្រជាមតិសម្រាប់លោកយូន ស៊ុកយោល ប្រធានាធិបតីកំពុងកាន់អំណាច។ ជាប់ឆ្នោតយ៉ាងប្រផុតប្រផើយកាលពីឆ្នាំ២០២២ លោកយូន ស៊ុកយោល ចង់ឃើញគណបក្សរបស់លោកឈ្នះឆ្នោតនៅលើកនេះនិងមានសំឡេងភាគច្រើនដាច់ខាតនៅក្នុងសភា ដែលកាន់កាប់ដោយបក្សប្រឆាំងតាំងពីឆ្នាំ២០១៦មក។ ប៉ុន្តែគួរឱ្យសោកស្តាយ បើតាមលទ្ធផលបឋម គណបក្សប្រជាធិបតេយ្យជាគូប្រជែង បានឈ្នះឆ្នោតយ៉ាងត្រចះត្រចង់ ដោយទទួលបាន១៩៧អសនៈលើ៣០០។
ចុះផ្សាយនៅថ្ងៃ៖
ស្តាប់ - ០២:៥៥
ប្រជាពលរដ្ឋកូរ៉េខាងត្បូង ត្រូវចេញទៅបោះឆ្នោតសភា ជ្រើសរើសតំណាងរាស្ត្រ៣០០រូប នៅថ្ងៃពុធទី១០មេសានេះ ក្នុងជម្រើសមួយដ៏លំបាក គឺរវាងគណបក្សដែលដឹកនាំដោយប្រធានាធិបតីអប្រជាប្រិយបំផុត និងគណបក្សប្រឆាំងរួតរឹតដោយរឿងអាស្រូវអំពើពុករលួយផង និងក្នុងស្ថានភាពសេដ្ឋកិច្ចសង្គមតានតឹងដោយលំហប្រជាធិបតេយ្យរួមតូចផង។
ក្នុងរយៈពេលពីរឆ្នាំក្រោមការដឹកនាំរបស់លោកយូន ស៊ុកយោល សារព័ត៌មានមានសេរីភាពពេញលេញជាទូទៅមែន តែដើម្បីគេចពីបណ្តឹងបរិហារកេរ្ត៍ អ្នកកាសែតខ្លះដាក់កំហិតខ្លួនឯង។ កាសែតរិះគន់រងការឆែកឆេរ វិទ្យុហ៊ានបរិហាររឿងអាស្រូវមួយបានបិទ។ តុលាការធ្លាប់តែឯករាជ្យក៏រងសម្ពាធពីអ្នកកាន់អំណាចនិងខ្លះមានពាក់ព័ន្ធនឹងអំពើពុករលួយ។ កូរ៉េខាងត្បូងបានធ្លាក់ចំណាត់ថ្នាក់ពីលេខ២៨ទៅជាង៤៧ក្នុងផ្នែកប្រជាធិបតេយ្យ។
កូរ៉េខាងត្បូងកំពុងប្រឈមនឹងការលំបាកជាច្រើនដូចជាវិបត្តិអតិផរណា សេដ្ឋកិច្ចបន្ថយល្បឿន តម្លៃអចលនទ្រព្យប៉ោងខ្លាំងស្ទើរផ្ទុះ ប្រជាពលរដ្ឋកាន់តែចាស់ អត្រាកំណើតធ្លាក់ទាបបំផុតមិនធ្លាប់មាន និងខ្លាំងជាងគេនៅលើពិភពលោក ព្រមទាំងបញ្ហាសន្តិសុខនិងការគំរាមកំហែងក្នុងតំបន់ទៀត។ លោកយូនស៊ុកយោល ដែលមាននយោបាយតឹងតែងខ្លាំងដាក់កូរ៉េខាងជើង ដោយសម្រេចពង្រឹងសម្ព័ន្ធភាពជាមួយអាមេរិក និងងាកទៅស្និទ្ធនឹងជប៉ុន សង្ឃឹមដណ្តើមបានសំឡេងភាគច្រើនដាច់ខាតនៅក្នុងសភា ដើម្បីអាចបន្តនយោបាយការបរទេសនេះ។
ប៉ុន្តែជាលទ្ធផល គណបក្សប្រឆាំងឈ្នះភ្លូកទឹកភ្លូកដី។ ដឹកនាំដោយ លោកលី ចែម្ញុង ដែលធ្លាប់ចាញ់លោកយូនស៊ុកយោល ក្នុងសម័យបោះឆ្នោតប្រធានាធិបតីឆ្នាំ២០២២ គណបក្សប្រជាធិបតេយ្យ បានទទួលជោគជ័យជាថ្មី មានសំឡេងភាគច្រើនដាច់ខាតនៅក្នុងសភា ដល់ទៅ១៩៧អាសនៈ លើអាសនៈសរុបចំនួន៣០០ នៅក្នុងសម័យបោះឆ្នោតសភានៅថ្ងៃពុធទី១០មេសានេះ។ ពោលគឺច្រើនជាងអាណត្តិមុនទៅទៀត។ ចំណែកគណបក្សប្រជាជនរបស់លោកយូនស៊ុកយោល និងសម្ព័ន្ធមិត្ត បានអាសនៈសរុបប្រមាណពី ៨៥ទៅ៩៩កៅអី ទល់នឹង១១៤កាលពីមុន។
មានប្រជាប្រិយភាពប្រមាណត្រឹមតែ៣០% តាំងពីបានជាប់ឆ្នោតក្លាយជាប្រធានាធិបតីនៅឆ្នាំ២០២២មក នេះជាបរាជ័យដ៏ធ្ងន់ធ្ងរបន្ថែមទៀតសម្រាប់លោកយូនស៊ុកយោល ដែលមិនត្រឹមតែមិនអាចសម្រេចកម្មវិធីដឹកនាំប្រទេសបែបអភិរក្សសង្គមខ្លាំងរបស់ខ្លួនបានទេ តែថែមទាំងអាចប្រឈមនឹងការធ្លាក់ពីតំណែងផង។
បើរួមដៃជាមួយគណបក្សស្ថាបនាកូរ៉េឡើងវិញ ដែលទើបបង្កើតថ្មីនិងក្លាយជាកម្លាំងនយោបាយទីបីនោះ គណបក្សប្រជាធិបតេយ្យ អាចប្រមូលសំឡេងភាគច្រើនដាច់ខ្លាំងខ្លាំងដល់ជាង ២ភាគបី ក្នុងការរៀបចំដំណើរបែបបទសភាទម្លាក់លោកយូនស៊ុកយោល ដែលលែងអាចប្រើសិទ្ធិប្រឆាំងវេតូការពារតួនាទីជាប្រធានាធិបតីបានហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ