ប្រធានាធិបតីតួកគី បញ្ជាឲ្យហាម កុំឲ្យជនភៀសខ្លួនឆ្លងទៅក្រិកតាមផ្លូវសមុទ្រ
នៅតាមព្រំដែន រវាងក្រិក និងតួកគី កំពុងតែមានភាពតានតឹងយ៉ាងខ្លាំង ទាក់ទិននឹងបញ្ហាជនភៀសខ្លួនស៊ីរី ដែលធ្វើដំណើរមកពីតួកគី ចង់ឆ្លងចូលទឹកដីអឺរ៉ុប តាមរយៈប្រទេសក្រិក។ លោកអ៊ែរដូហ្កាន់ ប្រធានាធិបតីតួកគី បានចេញបញ្ជា កាលពីថ្ងៃសៅរ៍ទី៧មីនា ដោយបានហាមដាច់ខាត មិនឲ្យជនភៀសខ្លួន ឆ្លងទៅកាន់ប្រទេសក្រិក តាមផ្លូវសមុទ្រឡើយ ដោយហេតុប្រឈមគ្រោះថ្នាក់ខ្លាំង។ តែយ៉ាងណាក្រិកបានចោទតួកគី ថាជាអ្នកបើកផ្លូវ បង្ហូរជនភៀសខ្លួនស៊ីរីរាប់ពាន់នាក់ ឲ្យសម្រុកចូលមកទឹកដីខ្លួន។
ចុះផ្សាយនៅថ្ងៃ៖
ស្តាប់ - ០២:៣៧
ដោយយោងលើកត្តាប្រឈមគ្រោះថ្នាក់ខ្ពស់ លោកប្រធានាធិបតីតួកគី បានចេញបញ្ជា ឲ្យឆ្មាំសមុទ្រតួកគី ហាមដាច់ខាតនូវការឆ្លងទូកតាមសមុទ្ររបស់ជនភៀសខ្លួន ទៅកាន់ដែនកោះរបស់ក្រិក។ តែមិនមែនមានន័យថា តួកគី នឹងហាមមិនឲ្យជនភៀសខ្លួន ធ្វើដំណើរទៅកាន់ព្រំដែនក្រិក តាមផ្លូវផ្សេងនោះឡើយ។
កាលពីថ្ងៃសៅរ៍ទី៧មីនា ឆ្មាំសមុទ្រតួកគី បានអះអាងថា ខ្លួនបានសង្រ្គោះជនភៀសខ្លួន ចំនួន៩៧នាក់ ហើយបានចោទថា អាជ្ញាធក្រិកថាគ្មានមនុស្សធម៌ កំទេចទូករបស់ជនភៀសខ្លួន និងបានរារាំងទូកមិនឲ្យចូលចតនៅឆ្នេររបស់ខ្លួន។ ចំណែកភាគីក្រិកវិញ បានចោទថា គឺតួកគីទេ ដែលជាអ្នកទទួលខុសត្រូវ ព្រោះជាអ្នកបើកផ្លូវ បង្ហូរជនភៀសខ្លួន ឲ្យផ្សងជីវិតធ្វើដំណើរមកកាន់ព្រំដែនក្រិក។ ក្រិកបានអះអាងថា គេនឹងប្រើគ្រប់វិធី ដើម្បីការពារព្រំដែន មិនឲ្យជនភៀសខ្លួនចូលទៅក្នុងទឹកដីគេឡើយ។ នៅរសៀលថ្ងៃសៅរ៍ទី៧មីនា នៅចំណុចព្រំដែនគោក តំបន់Kastanies គេសង្កេតឃើញ អាជ្ញាធរក្រិក បានប្រើឧស្ម័នបង្ហូរទឹកភ្នែក និងបាញ់ទឹក ទៅលើក្រុមជនភៀសខ្លួន ដែលព្យាយាមឆ្លងព្រំដែន។
ដោយឡែក នៅតាមកោះក្រិក ដូចជាកោះLesbos ប៉ុន្មានថ្ងៃចុងក្រោយនេះ មានជនភៀសខ្លួន ភាគច្រើនជាជនជាតិស៊ីរី ចំនួនប្រមាណ១៧០០នាក់ បានទៅដល់។ លើកោះតូចរបស់ក្រិកនេះ មានជនភៀសខ្លួនប្រមាណជា៣៨០០០នាក់រួចទៅហើយ ហើយដែលក្រិកអំពាវនាវរកជំនួយ និងដំណោះស្រាយ។
គួរកត់សំគាល់ថា កាលពីចុងខែកុម្ភៈ លោកប្រធានាធីបតីតួកគី បានប្រកាសថា តួកគីនឹងលែងគោរពកិច្ចព្រមព្រៀងឆ្នាំ២០១៦ ដែលតួកគីបានចុះសន្យាជាមួយសហភាពអឺរ៉ុបទៀតហើយ។ កិច្ចព្រមព្រៀងនេះ បានតម្រូវឲ្យតួកគីទប់ជនភៀសខ្លួនស៊ីរី កុំឲ្យឆ្លងចូលទឹកដីអឺរ៉ុប ជាថ្នូរនឹងប្រាក់ជំនួយ ជាច្រើនពាន់លានអឺរ៉ូ។ ក្រោយការប្រកាសដូចនេះ សហភាពអឺរ៉ុប បានស្នើបន្ថែមទឹកប្រាក់ឲ្យតួកគី តែលោកប្រធានាធិបតីតួកគី បានបដិសេធ ដោយបានរន្ធាន់ឲ្យសហភាពអឺរ៉ុប ត្រូវគាំទ្រខ្លួន ក្នុងប្រតិបត្តិការយោធានៅស៊ីរី ពុំនោះទេ តួកគីនឹងបើកឲ្យជនភៀសខ្លួនសម្រុកចូលអឺរ៉ុប។
រហូតមកត្រឹមពេលនេះ មិនទាន់មានដំណោះស្រាយណាមួយទេ។ សហភាពអឺរ៉ុបបានបរិហារតួកគី ថាយកជនភៀសខ្លួនជាចំណាប់ខ្មាំង ដើម្បីសម្រេចគោលដៅវាទទីឥទ្ធិពលរបស់ខ្លួនក្នុងទឹកដីស៊ីរី។ កាលពីថ្ងៃទី៧មីនា លោកអ៊ែរដូហ្កាន់ បាននិយាយទូរស័ព្ទជាមួយនឹងលោកស្រីអង់ហ្គេឡា មែរកិល តែគេមិនទាន់ដឹងអំពីលទ្ធផលនៃការនិយាយគ្នា រវាងមេដឹកនាំទាំងពីរនេះទេ។ សម្រាប់ពេលនេះ អង្គការមនុស្សធម៌ជាច្រើន បានរន្ធាន់ឲ្យមានការសម្រេចឆាប់ៗ ព្រោះជនភៀសខ្លួនកំពុងស្ថិតក្នុងស្ថានភាពលំបាកជាទីបំផុត នៅតាមព្រំដែនក្រិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ