អេស្ប៉ាញក្លាយជាប្រទេសមានអ្នកឆ្លងនិងស្លាប់ដោយកូវីដ១៩ច្រើនជាងគេនៅអឺរ៉ុបបន្ទាប់ពីអ៊ីតាលី
គណៈរដ្ឋមន្ត្រីនៃរដ្ឋាភិបាលអេស្ប៉ាញទាំងអស់ ត្រូវឆ្លងកាត់ការធ្វើតេស្តវិភាគរកមេរោគកូរ៉ូណាថ្មី។ អេស្ប៉ាញ បានក្លាយជាប្រទេសដែលមានករណីឆ្លង និងស្លាប់ដោយកូវីដ១៩ច្រើនជាងគេទីពីរ នៅអឺរ៉ុប បន្ទាប់ពីអ៊ីតាលី។ បើតាមតួលេខចុងក្រោយ នៅថ្ងៃព្រហស្បតិ៍ទី ១២មីនា មានពលរដ្ឋអេស្ប៉ាញជិតបីពាន់ឆ្លងកូរ៉ូណាវីរុសថ្មី និង៨៤នាក់បានស្លាប់។ ជំនួបប្រជុំដោះស្រាយវិបត្តិបន្ទាន់ដឹកនាំដោយប្រមុខរដ្ឋាភិបាល ប្រព្រឹត្តទៅតាមរយៈវីដេអូខុនហ្វេរ៉ង់។
ចុះផ្សាយនៅថ្ងៃ៖
ស្តាប់ - ០១:៣៩
សមាជិករដ្ឋាភិបាលអេស្ប៉ាញទាំងមូល សុទ្ធតែបានធ្វើតេស្តក្រែងមានឆ្លងមេរោគកូរ៉ូណាថ្មី។ រដ្ឋមន្ត្រីនិងឧបនាយករដ្ឋមន្ត្រីដែលបានចុះទៅចូលរួមក្នុងកម្មវិធីជួបជុំអបអរទិវាសិទ្ធិនារីអន្តរជាតិ កាលពីថ្ងៃអាទិត្យ និងដែលមានផ្ទុកមេរោគកូវីដ១៩ ត្រូវបានដាក់ឱ្យនៅដាច់ដោយឡែកពីគេហើយ។ ព្រះមហាក្សត្រ មហាក្សត្រីយានី បានយាងទៅចូលរួមក្នុងកម្មវិធីជារដ្ឋមន្ត្រីខាងលើ ក៏បានយាងទៅធ្វើតេស្តដែរ។
តាំងពីដើមសប្តាហ៍មក ជំងឺរាតត្បាតកូវីដ១៩ ចាប់មានសន្ទុះខ្លាំង។ ពេលនេះ អេស្ប៉ាញបានក្លាយជាប្រទេសមួយដែលរាប់ឃើញមានចំនួនអ្នកឆ្លងនិងអ្នកស្លាប់ដោយកូរ៉ូណាវីរុសខ្លាំងជាងគេទីពីរ នៅអឺរ៉ុប បន្ទាប់ពីអ៊ីតាលី។ រដ្ឋធានីម៉ាទ្រីត រងគ្រោះខ្លាំងជាងគេ។ សាលារៀនទាំងអស់ក្នុងក្រុង បានបិទទ្វារតាំងពីថ្ងៃពុធទី ១១មីនាមក។
បាល់ទាត់ដែលជាកីឡាដ៏ចំបងរបស់អេស្ប៉ាញក៏រងគ្រោះពីកូវីដខ្លាំងដែរ។ ក្លឹបReal Madridដ៏ល្បីល្បាញ ត្រូវដាក់ឱ្យនៅដាច់ឡែកពីគេ។ សម្ព័ន្ធកីឡាបាល់ទាត់អេស្ប៉ាញបានប្រកាសព្យូរយ៉ាងតិចការប្រកួតបាល់ទាត់ចំនួនពីរ។
ប្រឈមនឹងស្ថានភាពកាន់តែធ្ងន់ធ្ងរឡើងៗជាលំដាប់ ប្រមុខរដ្ឋាភិបាលអេស្ប៉ាញបានអះអាងថារាល់ជំនួបប្រជុំផ្សេងឬរាប់ទាំងសន្និសីទកាសែតប្រចាំថ្ងៃផងនឹងប្រព្រឹត្តទៅតាមវីដេអូខុនហ្វេរិន។ ជាក់ស្តែងនៅថ្ងៃព្រហស្បតិ៍ទី ១២មីនា លោកនាយករដ្ឋមន្ត្រីបានកោះប្រជុំក្រុមប្រឹក្សាគណៈរដ្ឋមន្ត្រីវិសាមញ្ញ តាមរយៈវីដេអូខុនហ្វេរិន ដើម្បីអនុម័តផែនការសង្គ្រោះសេដ្ឋកិច្ចដែលរងវិបត្តិកូរ៉ូណាវីរុសថ្មីផង និងដើម្បីចាត់វិធានការតឹងតែងកុំឱ្យប្រទេសធ្លាក់ក្នុងវិបត្តិធ្ងន់ធ្ងរដូចអ៊ីតាលីផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ